قازاقستاندىق سۇلۋ وڭتۇستىك كورەيادا وتكەن بايقاۋدىڭ جۇلدەگەرى اتاندى - فوتو
بايقاۋدىڭ قالاي وتكەندىگى تۋرالى زارينا توتايەۆانىڭ ءوزى «قازاقپارات» تىلشىسىنە ايتىپ بەردى.
ايتا كەتەيىك، بايقاۋعا 30 ەلدەن سۇلۋلار قاتىسقان. باس جۇلدەنى بولگاريالىق جەڭىپ السا، ەكىنشى ورىندى قازاقستاندىق (1- ۆيتسە ميسس، «World Beauty Queen»)، ءۇشىنشى ورىندى تايلاندقا جاقىن تاك ارالىنىڭ سۇلۋى يەلەندى.
زارينا توتايەۆا 1- ۆيتسە-ميسس اتاعىمەن قاتار، «بيكيني توپ 5 نە» ەنگەن. بۇل - زارينا قاتىسىپ وتىرعان 5- سۇلۋلىق بايقاۋى. ول وتكەن اپتادا نيۋ-يوركتە وتكەن ءسان اپتالىعىنا قاتىسقان. وندا 26 ديزاينەردىڭ تۋىندىسى تانىستىرىلدى. سونداي-اق، KFW-2016 قورىتىندىسى بويىنشا «ۇزدىك مودەل» اتاعىنا دا يە بولعان.
«بايقاۋدان مەن ۇمىتىلماس تاجىريبە جينادىم. 10 كۇن بويى ءبىز سەۋلدىڭ اتاقتى گانگنام اۋدانىنداعى 5 جۇلدىزدى قوناق ۇيدە بولدىق. سول كۇن ارالىعىندا ءبىز قىزدارمەن دوستاسىپ كەتتىك، سوڭىندا قيماي قوشتاستىق. بايقاۋ باعدارلاماسى وتە قىزىقتى بولدى. بىزدەرگە قالانى كورسەتتى، كورەي اسحاناسىمەن تانىستىردى، ءتۇرلى فوتوسەسسيالار ءوتتى. فينال بىرنەشە كەزەڭگە ءبولىندى. وندا ۇلتتىق كيىمدە، سۋدا ءجۇزۋ كيىمىندە، كەشكى سالتاناتتى كيىمدە ءوزىڭدى كورسەتۋ قاجەت بولدى. سودان كەيىن، «توپ-12»، «توپ-5» ۇزدىكتەرى ىرىكتەلدى. مۇنداي بايقۋعا 5- رەت قاتىسىپ وتىرسام دا، اقتىق سىندا قاتتى تولقىدىم. ەلىمنىڭ نامىسىن قورعاپ وتىرعاندىقتان، بارلىعىنىڭ جاقسى بولعانىن قالادىم. 1- ۆيتسە-ميسس اتاعىن بەرگەنىنە قۋانىشتىمىن. فينالدا بولگاريالىق قىز ەكەۋمىز عانا قالعاندا تولقىعانىمدى بىلسەڭىز. ءبىر-ءبىرىمىزدىڭ قولىمىزدان ۇستاپ الدىق، ەكەۋمىزدىڭ بىرەۋىمىز ميسس بولاتىنىمىز انىقتالىپ جاتىر... ونىڭ جەڭىمپاز اتانعانىنا قۋاندىم. ول قىز شىنىمەن دە سوعان لايىق»، - دەدى زارينا.
ونىڭ ايتۋىنشا، بۇل بايقاۋ وعان حالىقارالىق ساحناعا شىعۋدا جانە ءسان مانسابىندا جوعارىلاۋدا جاڭا بەلەستەرگە شىعارماق.
«مەن قازاقستاندى سۇيەمىن. ارى قاراي دا ەلىمدى حالىقارالىق ساحنالاردا تانىتا بەرەتىن بولامىن. بايقاۋدى ۇيىمداستىرعان دجۋن حۋن-دجۋن مىرزاعا جانە ماعان قولداۋ تانىتقان ەلميرا سەيدازيموۆاعا العىس ايتامىن»، - دەيدى زارينا.
اۆتور: الماس مۇقاش ۇلى
