مىرزاعالي ايتجانوۆ: ۇلتتىق قۇراماعا ىلىككەن بوكسشىلارعا بوساڭسۋعا بولمايدى
ءبىر اپتاعا سوزىلعان تارتىستى جەكپە-جەكتەردە توپ جارعان بىلعارى قولعاپ شەبەرلەرىن باس باپكەر مىرزاعالي ايتجانوۆ ۇلتتىق قۇراما ساپىنا تاڭداپ الدى. جارىستان كەيىن ايتجانوۆ مىرزاعا ارنايى قوڭىراۋ شالىپ، جاساقتالعان جاڭا كوماندا جايىندا وي بولىستىك.
- مىرزاعالي قۇلان ۇلى، ەل بىرىنشىلىگى قالاي ءوتتى؟ بوكسشىلاردىڭ ونەرىنە كوڭىلىڭىز تولدى ما؟
- جالپى، ەل بىرىنشىلىگى وتە جوعارى دەڭگەيدە ءوتتى. بارلىق وبلىستار جوعارى دايىندىقپەن كەلگەنى كورىنىپ تۇردى. وزدەرىڭىز بىلەسىزدەر، ءبىز ريو وليمپياداسىندا قورجىنىمىزعا مەدال سالعان ازاماتتاردى وسى ەل بىرىنشىلىگىنەن بوساتقان بولاتىنبىز. سوعان قاراماستان، ءار سالماقتا باسەكەلەستىك وتە جوعارى بولدى. وسىنداي باسەكەلەستىكتى كورىپ، ەلىمىزدىڭ بارلىق وڭىرىندە بوكستىڭ قالاي دامىپ جاتقانىن بايقاۋعا بولادى.
- وسىعان دەيىن ەڭ جەڭىل 49 كەلى سالماقتا ءبىرجان جاقىپوۆ ۇزاق جىل كوشباسشىلىقتى بەرمەي كەلگەنى انىق. بيىل ونىڭ ورنىن تەمىرتاس ءجۇسىپوۆ باسىپ وتىر. بۇل ازاماتقا قانشالىق ءۇمىت ارتۋعا بولادى؟
- تەمىرتاس وسىعان دەيىن دە سپورتتا ورنى بار، تاجىريبەلى بوكسشىلارىمىزدىڭ ءبىرى ەكەنىن كورسەتىپ كەلگەن. ال سەنىم ارتۋ ماسەلەسىنە توقتالاتىن بولساق، ونى الداعى ۋاقىت كورسەتەدى. سەبەبى، الدىمىزدا كوپتەگەن حالىقارالىق جارىستار كۇتىپ تۇر. سوندا بۇگىنگى مىقتىلارىمىزدىڭ ناعىز سىنالاتىن كەزدەرى بولادى.
- ال ەگەر ىشكى بىرىنشىلىكتە چەمپيون اتانىپ، ۇلتتىق قۇراماعا ىلىككەن بوكسشىلارىمىز سونداي حالىقارالىق دودالاردا ەل ءۇمىتىن اقتاي الماي جاتسا، ولارعا قانداي شارا قولدانىلادى؟
- كەز-كەلگەن بوكسشىعا «ۇلتتىق قۇراماعا ىلىكتىم. ەندى بولدى» دەپ بوساڭسۋعا بولمايدى. ۇلتتىق قۇراماعا كىردى مە، وعان ۇلكەن جاۋاپكەرشىلىك ارتىلادى. ءوزىمىزدىڭ ىشكى ءتارتىبىمىز، ىشكى ەرەجەلەرىمىز بار. سوعان باعىنباعان، جاتتىعۋعا سەلقوس قاراعان بوكسشىلارعا بىزدە ورىن جوق.
- ال بيىل كوپتەگەن بوكسشىلارىمىز جاڭا سالماققا اۋىستى. وسى جايىنداعى وزگەرىستەردى دە ايتا كەتسەڭىز...
- ءيا، قاتىپ قالعان ەشتەڭە جوق. سپورتتا وزگەرىستىڭ بولىپ تۇرعانى جاقسى. جاس بوكسشىلار ءوسىپ كەلەدى. دەنە ءبىتىمى تولىعىپ، وسكەن سايىن سالماعى دا وسەتىنى زاڭدىلىق. ءىلياس سۇلەيمەنوۆ 52 كەلى سالماقتان 56 كەلىگە، ابىلايحان ءجۇسىپوۆ 64 كەلى سالماقتان 69 كەلىگە، جانىبەك ءالىمحان ۇلى 75 كەلى سالماقتان 81 كەلىگە ءوتتى. بۇل سالماقتاردىڭ بارلىعىندا باسەكەلەستىك ەڭ جوعارى. ەندى ناعىز كىمنىڭ كىم ەكەنىن انىقتايتىن بولامىز. مىنە، وسى جاڭا سالماقتا ابىلايحان ءجۇسىپوۆ پەن جانىبەك ءالىمحان ۇلى ەل چەمپيونى اتانىپ وتىر. بۇل ۇلكەن جەتىستىك.
- 69 كەلىدە وليمپيادا چەمپيونى دانيار ەلەۋسىنوۆ، ال 81 كەلىدە وليمپيادانىڭ ەكى دۇركىن كۇمىس جۇلدەگەرى ادىلبەك نيازىمبەتوۆ بار. ءجۇسىپوۆ پەن ءالىمحان ۇلى ولاردىڭ كولەڭكەسىندە قالىپ قويماي ما؟
- ونىڭ بارلىعىن ۋاقىت پەن رينگ كورسەتەتىن بولادى. ءبىراق، ەشكىم ەشكىمنىڭ كولەڭكەسىندە قالىپ قويمايدى. ۇلتتىق قۇراماداعى بارلىق بوكسشىلار بىرگە جاتتىعادى. ەشكىمدى ءبولىپ جارىپ، جەكە-جەكە جاتتىقتىرمايمىز. كىم ەڭبەكتەنەدى، سونىڭ جۇلدىزى جانادى. ءجۇسىپوۆ تە، ءالىمحان ۇلى دا ءالى كوپ تەر توگۋلەرى كەرەك.
- ۇلتتىق قۇراما جاساقتالدى. ەندى وقۋ-جاتتىعۋ جينالىسىن قاشان باستايسىزدار؟
- اللا قالاسا، العاشقى وقۋ-جاتتىعۋىمىزدى جاڭا جىلدان كەيىن، 5-26- قاڭتار ارالىعىندا الماتى وبلىسىنداعى دۇنيەجۇزىلىك بوكس اكادەمياسىندا وتكىزۋدى جوسپارلاپ وتىرمىز.
- اڭگىمەڭىزگە راحمەت!
اۆتور: كۇنسۇلتان وتارباي
