ارىستانبەك مۇحامەدي ۇلى: فەيسبۋكتەگى پاراقشامدى جەكە ءوزىم جۇرگىزىپ وتىرمىن
«قادىرلى دوستار! بىرىنشىدەن، سىزدەرگە پاراقشادا جازىلعان اۋقىمدى پىكىرلەرىڭىز ءۇشىن العىسىمدى ايتامىن. الەۋمەتتىك جەلىگە شىعۋ تۋرالى شەشىم قابىلداۋ كەزىندە ءتۇرلى وي-پىكىر بولاتىنىن بولجاعان ەدىم. مەنىڭ ويىمشا، ءاربىر ادام ءوزىنىڭ كوزقاراسىنا قۇقىلى. وسىندا كەيبىر پىكىر بىلدىرۋشىلەر پاراقشادا كونسترۋكتيۆتى ۇسىنىس جاساماستان تەك سىناپ جۇرگەن اۆتورلاردىڭ پىكىرلەرىن ءوشىرىپ تاستاۋعا كەڭەس بەرگەن بولاتىن. مەنىڭ ويىما قاراما-قارسى بولسا دا، كوزقاراسى ءۇشىن ادامدارعا قۇرمەتپەن قارايمىن، الايدا بالاعات سوزدەر مەن ءتىل تيگىزۋ سەكىلدى ارەكەتتەر جاعىمسىز. اتاپ ايتقاندا، بارىنشا اشىق بولۋعا، وزىمە نەمەسە باسقارىپ وتىرعان مينيسترلىككە قاتىستى ۇسىنىستار مەن سىندارىڭىزعا جاۋاپ قايتارۋعا ۋادە ەتەمىن»، - دەپ جازادى ا. مۇحامەدي ۇلى.
سونىمەن قاتار ول حابارلامالارعا جاۋاپ بەرمەسە جانە فەيسبۋكتە دوستىققا ۇسىنىستاردى قابىلداپ ۇلگەرمەي جاتسا، وندا وسى جايتتارعا تۇسىنىستىكپەن قاراۋعا شاقىردى. «سىزدەردىڭ سۇراقتارىڭىزدى ەسكەرە وتىرىپ، اككاۋنتىمدى جەكە ءوزىم جۇرگىزىپ وتىرعانىمدى جانە بۇل مەن ءۇشىن العاشقى تاجىريبە ەكەنىن ناقتىلاعىم كەلەدى. بۇگىن مەن بارلىق پىكىرلەردى وقىپ شىقتىم، الداعى پوستىمدا ولارعا جاۋاپ بەرۋگە تىرىسامىن»، - دەپ اتاپ وتكەن مينيستر پاراقشاسىندا.
ەستەرىڭىزگە سالا كەتەيىك، 26- قاراشادا فەيسبۋك الەۋمەتتىك جەلىسىندە ق ر مادەنيەت جانە سپورت ءمينيسترى ارىستانبەك مۇحامەدي ۇلى جەكە پاراقشاسىن اشقاندىعى حابارلانعان ەدى. ەكى كۇنگە جۋىق ۋاقىتتا ءمينيستردىڭ پاراقشاسىنداعى دوستارىنىڭ سانى قارقىندى تۇردە ارتىپ كەلەدى.
