قازاق مۋلتفيلمى تاعى ءبىر تىڭ تۋىندىمەن تولىعادى
فيلم رەجيسسەرلەرى مەملەكەت تاراپىنان قارجىلىق قولداۋمەن قاتار، پروكاتقا شىققان كەزىندە قاداعالاۋ بولسا دەيدى. سەبەبى، قازاق تىلىندەگى وتاندىق ءونىم كورسەتىلىم كەزىندە شەتتەتىلىپ جاتادى.
60 مينۋتتىق انيماتسيالىق فيلمدى جارىققا شىعارۋ ءۇشىن ءۇش جىل تاپجىلماي ەڭبەك ەتۋ كەرەك. 22 ادامنان تۇراتىن شىعارماشىلىق توپ شامامەن 85 مىڭ سۋرەت سالۋى ءتيىس. فيلمنىڭ رەجيسسەرلەرى تىلەك تىلەۋعازى مەن تۇردىبەك مايدان دايىندىق جۇمىستارى 2015-جىلدىڭ قىركۇيەگىندە باستالعانىن جەتكىزدى.
كادرلىق تاپشىلىق پەن ءتۇرلى اكىمشىلىك كەدەرگىلەردىڭ بولۋىنان جۇمىس توقتاپ تۇرىپتى. انيماتسيالىق فيلم 2017-جىلدىڭ تامىز ايىندا دايىن بولماق. الايدا، رەجيسسەر پروكاتقا شىققان كەزدە وتاندىق ونىمگە كوڭىل كوبىرەك بولىنسە دەيدى.
«مىسالى قىتاي ەلىن الاتىن بولساق. ولار وزدەرىنىڭ ۇلتتىق فيلمى شىعاتىن كەزدە ونى مەرەكەگە تۋرالاپ، پروكاتقا شىعاتىن كەزدە شەت ەلدىڭ باسقا فيلمدەرىن سول ايلاردا توقتاتا تۇرۋ دەگەن سياقتى باعىتتاردى كورسەتەدى. ولار شەت ەلدىڭ كينوسى مەن وتاندىق ونىمدەرىن سالىستىرىپ، جارىستىرمايدى»، - دەدى «مۇزبالاق» انيماتسيالىق فيلمىنىڭ رەجيسسەرى تۇردىبەك مايدان.
رەجيسسەردىڭ پىكىرىنشە، شەت ەلدىك ونىمدەرگە قاراعاندا وتاندىق فيلمدەردىڭ بەرەرى مول. پاتريوتتىق سەزىمدى وياتىپ، ءداستۇردى دارىپتەپ، ۇلتتىق يدەولوگيانى ناسيحاتتايتىن بىردەن ءبىر قۇرال - انيماتسيالىق فيلمدەر.
«مۇزبالاق» كورىنىسىنىڭ جەلىسىندە ادامنىڭ بۇركىتتى العاش رەت قولعا ۇيرەتۋى باياندالادى. وندا قىران قۇستىڭ قازاق اراسىنداعى ەرەك ورنى مەن قاسيەتى كورسەتىلەدى. دايىندىق بارىسىندا قازاقستاننىڭ كورىكتى جەرلەرى زەرتتەلىپ، ۇلتتىق ناقشتا كەيىپكەرلەردى كورسەتۋگە اسا كوڭىل بولىنگەن.
«ارينە، فيلم ۇلتتىق بولعاننان كەيىن، قازاقي بولعاننان كەيىن ونىڭ ءستيلىن دە قازاقي ەتىپ شىعارۋ كەرەك بولدى. دەمەك، كورىنىستەردىڭ تەرەڭدىگىن، قازاق جەرىنىڭ بايلىعىن، كەڭدىگىن، ادەمىلىگىن، سۇلۋلىعىن كورسەتۋ كەرەك بولدى. سول ءۇشىن وسى كورىنىستەرگە بارىمىزدى سالىپ، ارنايى ەكسپەديتسيامەن شىعىپ، فوتوعا ءتۇسىرىپ، سونى زەرتتەگەنىنىڭ بارلىعىن، تۇيگەنىمىزدى وسى فيلمگە سالىپ وتىرمىز»، - دەدى «مۇزبالاق» انيماتسيالىق فيلمىنىڭ قويۋشى - سۋرەتشىسى اداي ءابىلدانوۆ. سونىمەن قاتار، «قازاق فيلم» كينو ستۋدياسىندا «كۇلتەگىن» تولىقمەترلى مۋلتفيلمىنىڭ وندىرىسكە دايىندىق جۇمىستارى باستالدى. بۇل جوبا اداي ءابىلدانوۆتىڭ رەجيسسەرلىك ەتۋىمەن جارىق كورمەك. الداعى ۋاقىتتا ونىڭ شىعۋ ۋاقىتى بەلگىلى بولادى، دەپ جازادى «الماتى» ارناسى.
