العاش رەت «الپامىس باتىر» مۋزىكا تىلىندە سويلەدى
استانا كونسەرت زالىندا العاش رەت باستان-اياق ورىندالعان كولەمدى مۋزىكالىق تۋىندىنىڭ اۆتورى - جاس كومپوزيتور ارمان جايىم. بۇل كونسەرت اتالعان ونەر ۇجىمىنىڭ ەل تاۋەلسىزدىگىنىڭ 25 جىلدىعى قارساڭىندا كورەرمەن نازارىنا ۇسىنعان ايرىقشا تارتۋى بولدى.
ءبىر ساعاتتىڭ ۇستىندە ورىندالعان شىعارما تەاترلاندىرىلعان كورىنىستەرىمەن، ياعني، رولدە ويناۋشىلار مەن مۋزىكانىڭ ءوزارا ۇندەستىگىمەن ەرەكشەلەندى.
قيلى كەزەڭنىڭ قاسىرەتتەرى، اۋمالى-توكپەلى زاماننىڭ تراگەديالىق كورىنىستەرى، جاۋگەرشىلىك تۇسىنداعى قازاق حالقىنىڭ باستان كەشكەن قيىندىقتارى، الپامىس باتىردىڭ جاۋعا قارسى كۇرەسى - ءبارى-ءبارى مۋزىكا تىلىمەن باياندالدى. ءارى سوعان وراي اتالعان تۋىندىنىڭ كەيىپكەرلەرىن كورەرمەندەر ساحنادان كورە ءبىلدى. ءبىر ايتا كەتەرلىك جايت، قازاق حالىق اسپاپتارى وركەسترىنىڭ قۇرامىندا كاسىبي اكتەرلەر بولماعانمەن، «الپامىس باتىر» جىرىنداعى كەيىپكەرلەردى ونەر ۇجىمىنداعى انشىلەر مەن بيشىلەر ساحناعا لايىقتى شىعارا ءبىلدى.
اتاپ ايتقاندا، جىراۋدىڭ ءرولىن - نۇراي تانابايەۆ، الپامىس - ايان وماروۆ، گۇلبارشىن - لاۋرا مينەيەۆا، تايشىق حان - دانيار مۇقان، مىستان كەمپىر ينديرا عابدراحمانوۆا، كەيقۋات - ولجاس مىرزابايەۆ سومدادى. بيشىلەر ونەرىن «شالقىما» ءبي ءانسامبلى ۇسىندى. قازاق حالىق اسپاپتارى وركەسترىنە وسى ۇجىمنىڭ كوركەمدىك جەتەكشىسى ءارى باس ديريجەرى، قر ەڭبەك سىڭىرگەن قايراتكەرى، پروفەسسور ايتقالي جايىموۆ ديريجەرلىك جاسادى. كونسەرت سوڭىندا ساحناعا كوتەرىلگەن ق ر پارلامەنتى ءماجىلىسىنىڭ دەپۋتاتى اباي تاسبولاتوۆ: «تاريحسىز ەل بولمايدى. «الپامىس باتىر» جىرى دا قازاق حالقىنىڭ باستان كەشكەن قيىن كەزەڭدەرىن سۋرەتتەيتىن ەپوس.
بۇگىن اسا كۇردەلى شىعارمانى ساحناعا شىعارعاندارىڭىزعا بىزدەر وتە تاڭعالدىق ءارى ريزا بولدىق. جۇرەكتى تەبىرەنتكەن، كورگەن ادامداردىڭ ەسىندە ماڭگى قالاتىن ونەر كەشىن تاماشالادىق. جاستاردىڭ بويىنا پاتريوتتىق سەزىمدى قالىپتاستىراتىن ءدال وسىنداي شىعارمالار. مۇنداي كونتسەرتتەردى حالىققا ءجيى كورسەتۋ كەرەك. قيىن شىعارمانى ۇسىنعان وركەستر ۇجىمىنا كورەرمەن رەتىندە بىزدەر باسىمىزدى يەمىز»، - دەپ ريزاشىلىعىن ءبىلدىردى.
سونداي-اق وسى كونتسەرتتى تاماشالاعان قۇرمەتتى قوناقتاردىڭ ءبىرى كومپوزيتور، كۇيشى ايتباي مۇزداحانوۆ: «ارمان جايىمنىڭ وركەسترگە ارنالىپ جازىلعان بۇل كولەمدى تۋىندىسى تۋرالى پىكىرىمدى ءبىر-اق سوزبەن ايتار بولسام، «الپامىس باتىر» مۋزىكالىق ەڭبەگىن دۇنيەجۇزىنىڭ كەز كەلگەن ەلىنىڭ ساحناسىنا شىعارساق، مارتەبەمىزدى وسىرەتىنىنە ايقىن كوزىم جەتتى!» - دەدى.
قازاقپارات تىلشىسىنە ءوز پىكىرىن بىلدىرگەن مادەنيەت قايراتكەرى نۇرلان بەكەنوۆ: «وتە كاسىبي دەڭگەيدە جازىلعان تۋىندى. بۇل مۋزىكالىق شىعارما «الپامىس باتىر» ەپوسىنىڭ وبرازىن تولىققاندى اشتى دەۋگە بولادى»، - دەسە، ال ونەر جاناشىرى وڭعارباي دانەبەكوۆ:
«الپامىس باتىر» شىعارماسىنىڭ ساحنالانۋى جوعارى دەڭگەيدە ءوتتى. وپەرا، ليبەرەتتا تۇرىندە جازىلعان مۋزىكالىق تۋىندىنى كورەرمەندەر وتە جىلى قابىل الدى. بۇدان كەيىن ۇلكەن ساحنالاردا دا ورىندالادى دەگەن سەنىمدەمىن. ويتكەنى الپامىس باتىر - بۇكىل تۇركى حالقىنا ورتاق تۇلعا.
سوندىقتان تەك قازاقستاندا عانا ەمەس، كورشى ەلدەردىڭ ساحنالارىندا دا وپەرا تۇرىندە قويىلاتىن تاماشا تۋىندى دەپ ەسەپتەيمىن. وسىنداي مۋزىكالىق ەڭبەگىن حالىققا ۇسىنعان ارمان جايىمعا شىعارماشىلىق تابىستار تىلەيمىز»، - دەدى.
تارتىمدى شىققان تۋىندىنىڭ باس رەجيسسەرى استانا مەملەكەتتىك اكادەميالىق فيلارمونياسىنىڭ كوركەمدىك جەتەكشىسى جانە باس ديرەكتورى، ق ر ەڭبەك سىڭىرگەن قايراتكەرى ساكەن ءابدىراحمانوۆ، رەجيسسەرى اسحات قوشايەۆ.
