ءابىش گەولوگ بولۋدى ارمانداعان - جازۋشىنىڭ زايىبى كلارا

سول جەردە جازۋشىنىڭ جۇبايى كلارا جۇمابايەۆا ءابىشتىڭ گەولوگ بولۋدى ارمانداعانى تۋرالى ءبىر جىلى ەستەلىكپەن ءبولىستى، دەپ حابارلايدى قازاقپارات ءتىلشىسى.

«ءابىش مەكتەپكە بارماي تۇرىپ، دالادا ۇشىپ بارا جاتقان گازەتتى قۋىپ ءجۇرىپ، وقۋدى تانىعان. سوندا جاتىپ الىپ، قازاقشا-ورىسشا كىتاپ وقيدى. بىردە ءتورتىنشى سىنىپتا وقىپ جۇرگەنىندە، ءۇيدىڭ ىرگەسىندە كىتاپ وقىپ جاتقان شاعىندا دوستارى اۋلادا لاڭگى ويناپ جۇرەدى. ءدال سول كەزدە ءبىر توپ ورىستىڭ گەولوگتارى كەلىپ قالادى. سويتسە، ورىسشا سويلەيتىن ادام ىزدەپ ءجۇر ەكەن. ءابىشتىڭ ورىسشا كىتاپ وقىپ جاتقانىن كورىپ، مىناۋ ءتىلدى بىلەدى دەپ، اناسىنان سۇراپ الىپتى. ونى ەكى جىل ەرتىپ ءجۇردى. ماڭعىستاۋدىڭ بۇكىل تاۋىن، تاسىن سونىڭ كومەگىمەن جازىپ العان. سول كەزدەن باستاپ ءابىش ومىرگە ەتەنە ارالاسىپ، گەولوگ بولۋدى ارمانداعان. وسى ارماننىڭ جەتەگىندە ءبىراز جىل ءجۇردى. ارتىنان كىتاپتى كوپ وقىعاننان كەيىن-اۋ دەيمىن، جازۋشىلىعى باسىم بولىپ كەتتى»، - دەدى كلارا اپاي بۇگىنگى شارا كەزىندە.

ايتا كەتەيىك، بۇگىن ليەۆ گۋميليەۆ اتىنداعى ەۋرازيا ۇلتتىق ۋنيۆەرسيتەتىندە مەملەكەت جانە قوعام قايراتكەرى، حالىق جازۋشىسى ءابىش كەكىلبايەۆ اتىنداعى اۋديتوريا اشىلدى. «بۇگىن ءابىش اعانىڭ دۇنيەدەن وزعانىنا جىل تولىپ وتىر. جىلدىق اسى بەرىلىپ جاتىر. سول كۇنگە سايكەستەندىرىپ، ەۋرازيا ۇلتتىش ۋنيۆەرسيتەتىندە اتاقتى جازۋشى، قوعام قايراتكەرى ءابىش كەكىلبايەۆتىڭ اۋديتورياسىن اشىپ وتىرمىز. بەلگىلى تۇلعالاردىڭ ەسىمىمەن اۋديتوريا اشۋ - بۇل ۋنيۆەرسيتەمىزدە قالىپتاسقان جاقسى ءبىر ءداستۇر. ويتكەنى سول تۇلعالاردىڭ ءومىرى، شىعارماشىلىعى مەن قايراتكەرلىگىنەن بۇگىنگى جاستار تاربيە الۋى قاجەت»، - دەيدى ۋنيۆەرسيتەت رەكتورى ە. سىدىقوۆ. شارا اياسىندا ۋنيۆەرسيتەتتىڭ جۋرناليستيكا جانە ساياساتتانۋ فاكۋلتەتىنىڭ 2-كۋرس ستۋدەنتى ءازيزا سۇيىنىشقاليەۆاعا ءا. كەكىلبايەۆ اتىنداعى اتاۋلى ستيپەنديا تابىستالدى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى