استانادا كونكيدەن الەم كۋبوگىنىڭ كەزەڭى وتەدى
28 ەلدىڭ ەڭ تاڭداۋلى كونكيشىلەرى قاتىساتىن حالىقارالىق جارىسقا قازاقستان قۇراماسى دا دايىندىقتى باستادى.
ناگانو وليمپياداسىنىڭ قولا جۇلدەگەرى ليۋدميلا پروكاشيەۆادان ءتالىم الاتىن ۇلتتىق قۇراما سپورتشىلارى «الاۋ» مۇز سارايىندا وقۋ-جاتتىعۋلارىن پىسىقتاۋدا. بيىلعى ماۋسىم قازاقستاندىق كونكيشىلەر ءۇشىن تابىستى باستالدى.
قىتايدىڭ حاربين قالاسىنداعى الەم كۋبوگىنىڭ ەكىنشى كەزەڭىندە رومان كرەچ 500 مەترلىكتە توپ جارىپ، جالپى ەسەپتە ەكىنشى ورىنعا كوتەرىلدى. كەڭەسشى-جاتتىقتىرۋشى ۆاديم ءسايۋتيننىڭ ايتۋىنشا، كرەچ بۇل جولى دا مەدالدان ءۇمىتتى سپورتشىنىڭ ءبىرى.
«نەگىزگى ءۇمىتتى رومان كرەچكە ارتامىز. ايدوۆا دا جاراقاتىنان ايىعىپ، بابىنا ەنە باستادى. ول جارىس سايىن ءوز ناتيجەسىن جوعارىلاتىپ، مىقتىلار توبىندا سايىسقا تۇسۋگە مۇمكىندىك الدى.
ال، دەنيس كۋزين ءالى بابىنا ەنگەن جوق. الىس قاشىقتىققا جۇگىرەتىن دميتري بابەنكو وتكەن الەم كۋبوگى كەزەڭىندە سەگىزىنشى ورىن الدى. ماسس-ستارتتا بابەنكونىڭ جولىنا كوز تىگەمىز. مەدالدان ءۇمىت بار»، - دەيدى ق ر قۇراماسىنىڭ جاتتىقتىرۋشىسى ۆاديم سايۋتين.
