دەپۋتات ەرتايەۆ ەكى ۆيتسە-مينيستر تۋرالى: بۇل - ناعىز ماسقارا
جالپى، بۇل بىرەگەي زاۋىت تۋرا ءبىر جىل بۇرىن، 2015 -جىلدىڭ 30 -قاراشاسىندا اشىلعان بولاتىن. قازىر كاسىپورىن وق وتپەيتىن كولىكتەردى، ب ت ر ماشينالارىن، تانكتەر مەن ازاماتتىق ماقساتقا ارنالعان كولىكتەردى شىعارادى. جانە بۇگىن ءوندىرىس بارىسىن كورسەتۋ ءۇشىن دەپۋتات باقىتجان ەرتايەۆ پەن عارىشكەر ۇشقىش، حالىق قاھارمانى توقتار اۋباكىروۆتى تاۋەلسىزدىكتىڭ 25 جىلدىعىنا ارنالعان شاراعا شاقىرعان ەكەن.
زاۋىتتىڭ جۇمىسىمەن تانىسىپ، قورعانىسقا قاتىستى كوپ سۇراق قويعان باقىتجان ەرتايەۆ بۇل شاراعا جاڭادان قۇرىلعان قورعانىس جانە اەروعارىش ونەركاسىبى مينيسترلىگىنىڭ وكىلدەرى نەگە قاتىسپادى دەپ، قىنجىلىس تانىتتى. جالپى، بۇكىل ءومىرىن قورعانىس سالاسىنا ارناعان گەنەرال ءۇشىن جاڭا مينيسترلىكتىڭ باسشىلىعىنا دا كوڭىلى تولمايدى ەكەن.
«وسىدان ءۇش جىل بۇرىن پارلامەنتتە ۇكىمەت باسشىسىنا قاراتا ءسوز سويلەي وتىرىپ، قورعانىس ونەركاسىبىن قۇرۋ كەرەك دەگەن ەدىم. قازاقستان ءوزىنىڭ قورعانىس ونەركاسىبىن ءوزى قۇرۋ كەرەك. ەندى مىنە، جاڭادان مينيسترلىك قۇرىلدى. ياعني، ءبىز قارۋ- جاراق، وق- ءدارى تەحنيكاسىن ساتىپ الاردا بازاردا تۇرعان ادامداي، باسقا جاقپەن ساۋدالاسىپ تۇرۋعا بولمايدى. باس شتاب تەحنيكانى تاپسىرىسپەن ءوز ەلىندە جاساتۋ كەرەك. اسكەري ادامدى وسىنداي ساۋدا- ساتتىققا جولاتپاعان ابزال. بۇگىن مىنا زاۋىتتى كورىپ ءجۇرمىز، ءبىراق قورعانىس ونەركاسىبى سالاسىنىڭ ماماندارىن كورىپ تۇرعان جوقپىن. اتامقۇلوۆتىڭ (قورعانىس جانە اەروعارىش ءمينيسترى بەيبىت اتامقۇلوۆ - اگەنتتىك) مينيسترلىگىندە بولدىم. ءبىراق، ول جەردە دە اسكەري ادام جوق. ەكى ۆيتسە-مينيستر وتىر، ەكەۋى دە اسكەري ادام ەمەس. بۇل نە ماسقارا! بۇلاي بولماۋى كەرەك. مينيسترلىكتە تىم بولماعاندا ءبىر ۆيتسە-مينيستر اسكەري ادام بولعانى مىندەتتى. الگى ەكى ۆيتسە-مينيستر مىنا جەرگە كەلسە، تانك پەن ب ت ر-دى اجىراتا المايدى دا»، - دەدى اشۋلانعان گەنەرال، پارلامەنت دەپۋتاتى ب. ەرتايەۆ.
ەستەرىڭىزگە سالا كەتەيىك، مەملەكەت باسشىسى نۇرسۇلتان نازاربايەۆتىڭ جارلىعىمەن 7 -قازان كۇنى بەيبىت باكىر ۇلى اتامقۇلوۆ قازاقستان رەسپۋبليكاسىنىڭ قورعانىس جانە اەروعارىش ونەركاسىبى ءمينيسترى قىزمەتىنە تاعايىندالعان بولاتىن.
اۆتور: كەنجەكەي توقتامۇرات قىزى
