پوليتسەيلەر قىرعىز ءنومىرلى اۆتوكولىكتەردى جاپپاي ايىپ تۇراعىنا قاماپ جاتىر
اكىمشىلىك كودەكستى نەگىزگە العان پوليتسەيلەر قازاقستاندا تىركەۋدە جوق كولىكتەردى ەندى ءبىرجولا ەلدەن شىعارۋعا شىنداپ كىرىسكەن.
بۇل تۋرالى 31 -ارنا حابارلايدى.
تولەنبەگەن ايىپپۇل كولەمى بويىنشا ەكىنشى ورىندا تۇرعان الماتى وبلىسىنىڭ ءتارتىپ ساقشىلارى كولىك جۇرگىزۋشىلەرىنە شۇيلىكتى. پروكۋراتۋرا قىزمەتكەرلەرىمەن بىرلەسە جول بويىنا شىققان پوليتسەيلەر زاڭدى ورەسكەل بۇزعان مەن ايىپپۇلى جينالعانداردى انىقتاپ، قىرعىز كولىكتەرىن جاپپاي تۇراققا قويدى.
«ەندى ەستىپ جاتىرمىز بولمايتىنىن. تەك قىرعىز ازاماتى ايداۋ كەرەك ەكەنىن. ەندى قىرعىز كولىگىمەن جۇرمەيتىن بولامىز»، - دەيدى جۇرگىزۋشىلەردىڭ ءبىرى.
«بورىشكەر» ارنايى شاراسىنا بىلەك سىبانا كىرىسكەن پوليتسەيلەر جول ەرەجەسىن ەلەمەيتىن ونداعان جۇرگىزۋشىگە حاتتاما تولتىرىپ، كولىكتەرىن تۇراققا توعىتتى. قىرعىز كولىگىن تىزگىندەگەندەر العاشىندا قازاقستان اۋماعىندا زاڭسىز جۇرگەندەرىن مويىنداعىسى كەلمەدى.
«جۇرگىزىلىپ جاتقان «بورىشكەر» شاراسى ءبىر كۇندىك جۇمىس ەمەس، كۇندەلىكتى جۇرگىزىلە بەرەدى. تەك جامبىل اۋدانى ەمەس، بۇكىل الماتى وبلىسى بويىنشا. سوندىقتان جۇرگىزۋشىلەرگە قوسىمشا ەسكەرتىپ جاتىرمىز»، - دەدى جامبىل اۋداندىق ءىىب باسشىسىنىڭ ورىنباسارى المات راقىمبايەۆ.
ءبىر ساعاتتا مەملەكەتتىك تىركەۋ ءنومىرى جوق 3 كولىك پەن مۇلدەم قۇجاتى جوق ءتورت كولىك انىقتالدى. ال قىرعىز ءنومىرلى 7 كولىكتىڭ جۇرگىزۋشىلەرىنە حاتتاما تولتىرىلدى. قازاقستاندا زاڭسىز جۇرگەن كورشى ەلدىڭ كولىكتەرىن قىسپاققا الۋ جالعاسا بەرمەك.
