وڭتۇستىك قازاقستان وبلىسى اكىمىنىڭ ورىنباسارى ەسەپ كوميتەتىن الداي المادى
دەپ حابارلايدى قازاقپارات ءتىلشىسى.
وتىرىس بارىسىندا كوميتەتى مۇشەسى تالعات جاقان تۇركىستان قالاسىندا 1,3 ميلليارد تەڭگەگە سالىنعان ەلەكتر ستانساسىنا قاتىستى سۇراق قويدى. «ول قالاي ءوزى؟ ەلەكتر ستانسانى ءبىر جىل بۇرىن سالدىڭىزدار. قانشاما اقشا جۇمسالدى. ءبىراق ءالى كۇنگە دەيىن ىسكە قوسقان جوقسىڭدار. سوندا حالىققا جارىق قاجەت ەمەس پە؟»، - دەدى ت. جاقان.
اتالعان ماسەلە بويىنشا ەسەپ بەرگەن وڭتۇستىك قازاقستان وبلىسى اكىمىنىڭ ورىنباسارى ەربول سادىر: «ول جەردە... ءبارى مونوپوليستەرگە بايلانىستى. جەلتوقساننىڭ 1-ىنە دەيىن ونى قابىلدايدى. قازىر نورماتيۆتىك قۇجاتتار بويىنشا مونوپوليستەردىڭ تاراپىنان قۇرىلىسى بىتكەن نىسانداردى قابىلداۋدىڭ ناقتى مەرزىمى جوق... ولار وسى جۇمىستى ۇنەمى سوزىپ وتىرادى. سول سەبەپتى بۇل ماسەلەنى ىلعي شەشۋگە تۋرا كەلەدى...»، - دەپ جاۋاپ بەردى.
وسى جەردە ەسەپ كوميتەتىنىڭ باسشىسى قوزى- كورپەش جاڭبىرشين كۇلىپ جىبەردى. «ەربول ءابىلقايىر ۇلى، وسىعان قاتىستى جاقسى ءبىر ءسوز بار. وندايدى «شاياندى تاستىڭ تاساسىنا كىرگىزۋ» دەيدى. بىلەسىز بە، بۇل ماقالدى؟ ماسەلەنىڭ ءمانىسىن ايتپاي، ادامدى شاتاستىرعاندا سولاي ايتادى. مونوپوليستىڭ قانداي قاتىسى بار؟ ايماقتىڭ قوجايىنى كىم؟ اكىمدىك. سىزدەردە ماسەلەنى شەشۋگە قاجەتتى بارلىق رەسۋرستار بار. وسى جەردە وتىرعانداردىڭ ىشىندە اكىمدىكتە ءبىر جىل ەمەس، بىرنەشە جىل ىستەگەندەر بار. ولار ءبارىن ءبىلىپ، ءتۇسىنىپ وتىر. سوندىقتان، ەرەكە، «شاياندى تاستىڭ تاساسى كىرگىزۋدىڭ» قاجەتى جوق»، - دەدى قوزى- كورپەش جاڭبىرشين. وڭتۇستىك قازاقستان وبلىسى اكىمىنىڭ ورىنباسارى كوميتەت باسشىسىنىڭ بۇل سوزىمەن كەلىستى. ايتا كەتەيىك، وڭستۇستىك قازاقستان وبلىسىنا بولىنگەن بيۋدجەت قاراجاتىن پايدالانۋىنا جۇرگىزىلگەن مەملەكەتتىك اۋديت كەزىندە سان الۋان زاڭ بۇزۋشىلىقتار انىقتالدى. اتاپ ايتقاندا، جالپى سوماسى 4,9 ميلليارد تەڭگەنىڭ كوممۋنالدىق مۇلىگى ءۇش جىلدان بەرى شىمكەنت قالاسىنىڭ بالانسىنا قابىلدانباي جاتىر. تۇركىستاندا «كوممۋنالنايا» اتتى ەلەكتر ستانساسىنىڭ قۇرىلىسىنا 1,3 ميلليارد تەڭگە جۇمسالدى. ءبىراق ونىڭ ىسكە قوسىلماي تۇرعانىنا ءبىر جىل بولدى.
ال ءدارى- دارمەكتەردى ۋاقىتىندا تاراتپاۋدىڭ سالدارىنان ماقتارال، سوزاق، سايرام، شاردارا مەن ورداباسى اۋداندارىنىڭ حالقى ەم- دومسىز قالدى. كاسىبي مامانداردىڭ تاپشىلىعى، اسىرەسە، بىلىكتى بۋحالتەرلەردىڭ بولماۋى كوپتەگەن قارجىلىق زاڭ بۇزۋشىلىقتارعا سەبەپ بولدى. جالپى، مەملەكەتتىك اۋديت كەزىندە 14,1 ميلليارد تەڭگەنىڭ قارجىلىق ءتارتىپ بۇزۋشىلىقتارى انىقتالدى. ال ءتيىمسىز يگەرىلگەن اقشانىڭ كولەمى 5,5 ميلليارد تەڭگەنى قۇرادى. الايدا اۋديت كەزىندە قۇزىرەتتى ورگاندار قارجىلىق ءتارتىپ بۇزۋشىلىقتارعا (14,1 ميلليارد تەڭگەنىڭ - اۆت.) تيەسىلى 10,8 ميلليارد تەڭگەنى قالپىنا كەلتىردى. بۇگىنگى وتىرىستا «اگروبيزنەس - 2020» باعدارلاماسىنا جۇرگىزىلگەن مەملەكەتتىك اۋديتتىڭ ناتيجەسى دە جاريالاندى. باعدارلاما اياسىندا قىرۋار قارجى ءتيىمسىز جۇمسالدى. ميللياردتاعان اقشاعا سالىنعان قۇرىلىس نىساندارى ءالى كۇنگە دەيىن قاڭىراپ بوس تۇر. ال اۋىل شارۋاشىلىعى مينيسترلىگىنىڭ وكىلدەرى قىمبات قوندىرعىلاردى نە ءۇشىن ساتىپ العانىن تۇسىندىرە المادى.
