ق ر پرەزيدەنتى كونكۋرستىق ىرىكتەۋ نەگىزىندە مانساپتىق ىلگەرىلەۋدىڭ ماڭىزدى ەكەنىن اتاپ ءوتتى
كەڭەسكە پرەمەر- مينيستر ب. ساعىنتايەۆ، پرەزيدەنت اكىمشىلىگىنىڭ باسشىسى ءا. جاقسىبەكوۆ، ۇلتتىق بانك ءتوراعاسى د. اقىشيەۆ، ۇكىمەت مۇشەلەرى مەن مەملەكەتتىك ورگاندار باسشىلارى قاتىستى.
قازاقستان پرەزيدەنتى «100 ناقتى قادام» ۇلت جوسپارىنىڭ ىسكە اسىرىلۋى زاڭنىڭ ۇستەمدىگى قاعيداتىن نىعايتۋعا، مەملەكەتتىك قىزمەت ساتىلارىنان ءوتۋ جۇيەسىن جەتىلدىرۋگە، بيزنەستىڭ دامۋىنا جاعداي جاساۋعا، قوعامدىق تۇراقتىلىقتى نىعايتۋعا، سونداي- اق ازاماتتار الدىندا ەسەپ بەرەتىن اشىق ۇكىمەت قالىپتاستىرۋعا باعىتتالعانىن اتاپ ءوتتى.
- بۇل بەس تارماقتىڭ ورىندالۋى قازاقستاننىڭ دامىعان 30 ەل قاتارىنا قوسىلۋ كەزەڭى بولىپ سانالادى، - دەدى نۇرسۇلتان نازاربايەۆ. ەلباسى مەملەكەتتىك قىزمەتشىلەردى قىزمەت ناتيجەلەرى بويىنشا كوتەرمەلەۋدىڭ بونۋستىق جۇيەسىنە كوشۋدىڭ ماڭىزدىلىعىن، ادەپ كودەكسىنىڭ مۇلتىكسىز ورىندالۋ كەرەكتىگىن، وزگە وڭىرگە قىزمەت اۋىستىرۋ بارىسىندا مەملەكەتتىك قىزمەتكەرلەردى جەكەشەلەندىرۋگە جاتپايتىن قىزمەتتىك باسپانامەن قامتاماسىز ەتۋ ءىسىن جانداندىرۋ قاجەتتىگىن ايتتى. مەملەكەت باسشىسى كونكۋرستىق ىرىكتەۋ نەگىزىندە مانساپتىق ىلگەرىلەۋدىڭ ماڭىزدى ەكەنىنە توقتالىپ ءوتتى.
- تومەنگى لاۋازىمداعى مەملەكەتتىك قىزمەتكەردىڭ كونكۋرس بويىنشا ىلگەرىلەۋى مەريتوكراتيا قاعيداتىن نىعايتۋدىڭ قازىرگى ءتيىمدى تەتىگى وتىر، - دەدى قازاقستان پرەزيدەنتى. سونىمەن بىرگە، نۇرسۇلتان نازاربايەۆ قۇقىق قورعاۋ ورگاندارىنا قىزمەتكە قابىلداۋ بارىسىندا كونكۋرستىق راسىمدەردى قولدانۋ قاجەتتىگىنە نازار اۋداردى.
- پوليتسيانىڭ ەلىمىزدە قالىپتاسقان كەلبەتى وزگەرۋگە ءتيىس. قىزمەتكەرلەر ازاماتتاردىڭ سەنىمىنە يە بولىپ، ولاردىڭ قىزمەتى ەڭ الدىمەن حالىققا كومەك كورسەتۋگە باعىتتالۋعا ءتيىس، - دەدى ەلباسى. بۇدان بولەك، مەملەكەت باسشىسى جەرگىلىكتى پوليتسيا قىزمەتىنىڭ قۇزىرەتىن بەلگىلەپ، ولاردىڭ ەسەپتىلىگىنە قاتىستى ەلىمىزدىڭ قۇقىق قورعاۋ ورگاندارىن جاڭعىرتۋ ماسەلەلەرىن قوسىمشا تاعى پىسىقتاۋدى تاپسىردى. سونداي- اق، قازاقستان پرەزيدەنتى «استانا» حالىقارالىق قارجى ورتالىعى جانىنان حالىقارالىق اربيتراجدىق ورتالىق قۇرۋ جونىندەگى جۇمىستاردى تەزدەتۋ كەرەكتىگىن ايتتى.
نۇرسۇلتان نازاربايەۆ شەتەلدىك ينۆەستورلاردى تارتۋدىڭ، سونداي- اق رەسپۋبليكا بويىنشا ءوندىرىس كۇشتەرىن جۇيەلى تۇردە ءبولۋدىڭ ايرىقشا ءمانى بار ەكەنىن اتاپ ءوتتى. بۇدان بولەك، ەلباسى الەۋمەتتىك مەديتسينالىق ساقتاندىرۋ جۇيەسىن ەنگىزۋ جونىندە جۇرگىزىلىپ جاتقان رەفورمالاردىڭ ماڭىزدىلىعىنا توقتالدى.
- مەن وسى ماسەلەنىڭ شەشىمىنە قاتىستى ەرەكشە تۇسىنىستىك تانىتقاندارىڭىزدى قالايمىن. قازىرگى كەزدە قيىندىقتار بار ەكەنىنە قاراماستان، بۇل - وتە پروگرەسسيۆتى باعىت. حالىق اراسىندا ءتيىستى دايىندىق وتكىزىپ، ءتۇسىندىرۋ جۇمىستارىن جۇرگىزۋ قاجەت، - دەدى مەملەكەت باسشىسى. كەيبىر قادامنىڭ ىسكە اسىرىلۋىن تالقىلاۋ بارىسىندا قازاقستان پرەزيدەنتى ۇكىمەت پەن باسقا دا مۇددەلى ورگاندار جۇمىسىنداعى كەمشىن تۇستاردى اتاپ ءوتىپ، بۇل باعىتتاعى جۇمىستى جانداندىرۋدى تاپسىردى.
سونداي- اق، ەلباسى تۋريستىك سالانى دامىتۋدىڭ 2020 -جىلعا دەيىنگى تۇجىرىمداماسىن ىشكى تۋريزمنىڭ باسىمدىعى بار باعىتتارىن ەسكەرە وتىرىپ جاڭارتۋدى تاپسىردى.
- وڭىرلىك تۋريزمدى ىلگەرىلەتۋ ءۇشىن بارلىق كۇش- جىگەردى جۇمىلدىرۋ قاجەت. بۇل ەكونوميكامىز ءۇشىن دە، قازاقستاندىق بىرتەكتىلىك پەن بىرلىكتى نىعايتۋ ءۇشىن دە ماڭىزدى، - دەدى مەملەكەت باسشىسى. قازاقستان پرەزيدەنتى «ۇكىمەت - ازاماتتار ءۇشىن» باعدارلاماسى ارقىلى حالىققا كورسەتىلەتىن قىزمەتتەر ساپاسىن ارتتىرۋ جونىندەگى جۇمىستاردى دا ودان ءارى جەتىلدىرۋ قاجەتتىگىن اتاپ ءوتتى.
نۇرسۇلتان نازاربايەۆ كەڭەسكە قاتىسۋشىلارعا ۇلت جوسپارىنىڭ بارلىق باعىتى بويىنشا جۇمىستى ىلگەرىلەتىپ، باقىلاۋ جۇرگىزۋدى كۇشەيتۋ قاجەتتىگىن ايتتى، سونداي- اق باسشىلاردىڭ دەربەس جاۋاپكەرشىلىگى جونىندە ەسكەرتتى. سوڭىندا مەملەكەت باسشىسى قازاقستاننىڭ ەكونوميكاسى ءۇشىن ماڭىزدى جەتىستىكتەرگە قول جەتكىزۋ جانە ەلىمىزدىڭ ءار ازاماتىنىڭ ءال- اۋقاتىن ارتتىرۋ ۇلت جوسپارى مەن باستى مەملەكەتتىك باعدارلامالاردىڭ تۇپكى ماقساتى بولىپ سانالاتىنىن ايتتى.
