مينيسترلىك وكىلدەرى قىمبات قوندىرعىنى نە ءۇشىن ساتىپ العانىن تۇسىندىرە المادى

جيىن بارىسىندا كوميتەت باسشىسى قوزى- كورپەش جاڭبىرشين اسا قىمبات قوندىرعىنى نە ءۇشىن ساتىپ الىنعانىن سۇرادى، دەپ حابارلايدى قازاقپارات ءتىلشىسى.

«2014 -جىلى اگروحيميالىق قىزمەت 46,6 ميلليون تەڭگەگە اۆتوماتتاندىرىلعان تالداۋ جۇيەسىن ساتىپ العان ەكەن. الايدا ونى ءالى كۇنگە دەيىن قويمادان شىعارعان دا جوق. ەكى جارىم جىل ءوتتى. ول قوندىرعىنى نە ءۇشىن ساتىپ الدىڭىزدار؟ كىم جاۋاپ بەرە الادى؟» - دەپ سۇرادى كوميتەت ءتوراعاسى.

 وسى ماسەلە بويىنشا ەسەپ بەرگەن اۋىل شارۋاشىلىعى ۆيسە- ءمينيسترى گۇلميرا يسايەۆا بيۋدجەتتىك جوسپارلاۋ باسقارماسىنىڭ جەتەكشىسى باقىتجان سالەموۆتىڭ جاۋاپ بەرۋىن سۇرادى. الايدا ول تۇشىمدى جاۋاپ بەرە المادى. «قۇرمەتتى قوزى- كورپەش ەسىم ۇلى، قۇرمەتتى كوميتەت مۇشەلەرى، تام... جاڭاعى... اگروحيميالىق... جاڭاعى مەكەمەسى بويىنشا 2014-2015 -جىلدارى لابوراتوريالىق قۇرال- جابدىقتار الىنعان... ىزدەستىرۋدى جۇرگىزۋ بويىنشا... ول كەمشىلىكتەردى جويۋ بويىنشا قازىر مينيسترلىكتىڭ ىشكى جوسپارى جاسالدى. قازىر كەمشىلىكتەردى جويۋ ءجۇرىپ جاتىر. ول جابدىقتى جاقىن ارادا ىسكە قوسۋعا...» - دەپ جاۋاپ بەرىپ جاتقاندا ەسەپ كوميتەتىنىڭ باسشىسى: «ول جۇيە قايدا قازىر؟ قويمادا جاتىر ما؟ نە ءۇشىن الدىڭدار؟» - دەپ سۇرادى.

 ب. سالەموۆ اتالعان قوندىرعىنى جەردىڭ قۇنارلىعىن تەكسەرۋ ءۇشىن الىنعانىن جەتكىزدى.

«ەشتەڭە تەكسەرىپ جاتقان جوقسىڭدار عوي. ءۇش جىل بولدى. قويمادا جاتىر. 50 ميلليون جۇمسالدى. نە ءۇشىن الدىڭدار؟ سول كۇيى جاتىر ما؟ ول ءشىرىپ كەتكەن دە شىعار»، - دەدى قوزى- كورپەش جاڭبىرشين.

ايتا كەتەيىك، بۇگىنگى وتىرىستا «اگروبيزنەس - 2020» باعدارلاماسىنا جۇرگىزىلگەن مەملەكەتتىك اۋديتتىڭ ناتيجەسى جاريالاندى. باعدارلاما اياسىندا قىرۋار قارجى ءتيىمسىز جۇمسالدى. ميللياردتاعان اقشاعا سالىنعان قۇرىلىس نىساندارى ءالى كۇنگە دەيىن قاڭىراپ بوس تۇر.

 اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى