الماتىدا ورىس جاستارى اراسىندا قازاق ءتىلىن جەتىك مەڭگەرگەن ءبىلىمپازدى انىقتايدى
دەپ حابارلايدى «قازاقپارات» ءتىلشىسى.
بايقاۋدى قازاقستان رەسپۋبليكاسى مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق- ساياسي جۇمىستار كوميتەتى وتكىزۋدە. ۇيىمداستىرۋشىلاردىڭ ايتۋىنشا، كونكۋرستىڭ باستى ماقساتى - ورىس جاستارى اراسىندا مەملەكەتتىك ءتىلدىڭ قولدانىس اياسىن كەڭەيتۋ، قازاق ءتىلىن ەركىن مەڭگەرگەن ورىس جاستارىنا قولداۋ كورسەتۋ، سونداي- اق ءسوز مادەنيەتىن كوتەرۋ جانە جەتىلدىرۋ.
بيىلعى سايىسقا «ءتىل - پاراسات» بايقاۋىنىڭ وڭىرلىك جەڭىمپازدارى اتانعان 12 قىز- جىگىتتەر قاتىسادى. ولاردىڭ اراسىندا - كريستينا چەرۆينسكايا (اقتوبە وبلىسى)، ەلنۇر ستەپانوۆ (استانا)، اناستاسيا پاۆليۋك (پاۆلودار وبلىسى)، الينا جۋكوۆا (س ق و)، نادەجدا كوستەنكو (جامبىل وبلىسى)، ۆيكتور تاتاشينسكي (قوستاناي)، كيريلل دەنيسوۆ ( قىزىلوردا وبلىسى)، كريستينا گونچاروۆا (الماتى وبلىسى)، وكسانا دراچكو (الماتى)، الينا گاگارينا (قاراعاندى وبلىسى)، ماريا ماسيموۆا (ش ق و)، الەنا پولۋحوۆا (اقمولا وبلىسى) بار.
اقتوبە وبلىسىنىڭ اتىنان قاتىسقان كريستينا چەرۆينسكايا بولاشاقتا حورەوگراف بولۋدى ارماندايدى. اسقاق ارمانىنا قاراي العاشقى قادامىن قازىردىڭ وزىندە جاساپ ۇلگەرگەن - ول باستاۋىش سىنىپ وقۋشىلارىنا ۇلتتىق بي ۇيرەتۋدە. كريستينا قازاق ءتىلىن ۇيرەنۋدى 6 جاسىنان باستاعان. پاۆلودار وبلىسىنىڭ قاتىسۋشىسى اناستاسيا پاۆليۋك قازاق مەكتەبىندە 9 جىل ءبىلىم نارىمەن سۋسىنداعان. قازىرگى تاڭدا پاۆلودار مەملەكەتتىك ۋنيۆەرسيتەتىندە جۋرناليستيكا ماماندىعىنا بەيىمدەلۋدە، بولاشاقتا تەلەجۇرگىزۋشى بولعىسى كەلەدى. جاستارعا قولداۋ كورسەتۋگە قازاقستانداعى ورىس قاۋىمداستىعىنىڭ ءتوراعاسى، قازىلار القاسىنىڭ مۇشەسى يۋريي بۋناكوۆ اتسالىسقان.
«ماعان بايقاۋدىڭ باستاماشىسى بولۋ باقىتى بۇيىردى. مەن 8 جىل بۇرىن ءمينيستردى (مادەنيەت - مىس.) مەملەكەتتىك ءتىلدىڭ قاجەتتىلىگى، ەڭ الدىمەن ورىس جاستارىنا بايلانىستى ەكەنىنە سەندىردىم. ەگەر ءبىز جاستارعا مەملەكەتتىك ءتىلدىڭ ماڭىزدى ەكەنىن تۇسىندىرە الساق، جاستار دا وعان ءوز ۇلەستەرىن قوسسا، دەمەك ءتىل دامىتۋدىڭ وسىنداي قۇرالى ءتيىمدى بولماق. اتالمىش بايقاۋعا 8 جىل بويى ءار جىل سايىن مىڭداعان ورىس ۇلتىنىڭ بوزبالالارى مەن بويجەتكەندەرى قاتىسۋدا. مەن ولاردى ماقتان تۇتامىن»، - دەدى ول. قاتىسۋشىلاردىڭ العاشقى تاپسىرماسى مەملەكەتتىك ءتىلدى اۋىزشا تانىستىرۋ بولدى - بالالار تاپسىرمالار بەرىلگەن كارتىشكەلەردى تاڭداپ، قىسقاشا ءتىل تۋرالى ايتۋلارى كەرەك. قاتىسۋشىلار تۋعان جەرى، وتانى، سۇيىكتى جازۋشىلارى تۋرالى ەركىن اڭگىمەلەدى.
