ەلباسىن كۇنگە تەڭەپ، وعان قالانىڭ اتىن بەرگىسى كەلگەن كىمدەر - فوتو
وسى ورايدا NUR. KZ پورتالى ەلباسىنىڭ الدىندا ۇپاي جيناعىسى كەلگەن تۇلعالاردى ەسكە ءتۇسىرىپ كورمەك.
دەپۋتات قۋانىش سۇلتانوۆ تاۋەلسىزدىكتىڭ 25 جىلدىعىنا ارنالعان دەكلاراتسيانى قابىلداۋ بارىسىندا ەلوردانىڭ اتاۋىن ەل پرەزيدەنتىنىڭ قۇرمەتىنە نۇرسۇلتان نەمەسە نازاربايەۆ دەپ اتالۋى مۇمكىن ەكەنىن جەتكىزدى.
«ءبىز كونستيتۋتسياعا استانا اتاۋىنا قاتىستى وزگەرتۋ ەنگىزۋدى ۇسىندىق. اتا زاڭدا وزگەرىستەر بولۋى مۇمكىن. وسى سۇراقتار جونىندە ءالى اقىلداساتىن بولامىز. باس قالانىڭ اتاۋىن «نۇرسۇلتان» نەمەسە «نازاربايەۆ» دەپ اتاۋعا بولادى. بۇل حالىقتىڭ ۇسىنىسى. ءبىز بۇگىن دەكلاراتسيادا وسىنداي باستاما كوتەردىك. دەپۋتاتتار ونى قولدادى»، - دەدى دەپۋتات.
ۆلاديمير نەحوروشيەۆ
ەكس-دەپۋتات ۆلاديمير نەحوروشيەۆ پرەزيدەنتتى كۇنگە تەڭەگەن ەدى.
«ادامدار ول كىسىنى جىل ادامى ەمەس، عاسىر ادامى دەپ ءدال تاۋىپ ايتقان. نۇرسۇلتان ءابىش ۇلى - قۇدايدان كەلگەن تالانت. (...) اسپاندا ودان بولەك كۇن بولۋ مۇمكىن ەمەس. ونىڭ «نۇرساۋلەسى» ەلىمىزدى ودان ءارى شۋاقتاندىرا ءتۇسسىن. ودان باسقا ادام پرەزيدەنت بولا المايدى. مۇنى قازاقستان حالقى تالاپ ەتىپ وتىر!» ، - دەگەن دەپۋتات ايدى اسپاننان ءبىر-اق شىعاردى.
ءسات توقپاقبايەۆ
2008-جىلى دەپۋتات ءسات توقپاقبايەۆ باس قالانى نۇرسۇلتان دەپ اتاۋدى العاش ۇسىنعان.
«پرەزيدەنتتىڭ قازاقستاننىڭ قالىپتاسۋىنا قوسقان زور ۇلەسىن ەسكەرە وتىرىپ، استانانى نۇرسۇلتان قالاسى دەپ اتاۋدى ۇسىنامىن. بۇل قالانىڭ اكەسى دە ءوزى، مەردىگەرى دە ءوزى. ول قالانىڭ ءار عيماراتى مەن كوشەسىنىڭ قۇرىلىسىن ءوز باقىلاۋىندا ۇستادى»، - دەگەن ەدى ول. نۇرسۇلتان نازاربايەۆ ول كەزدە بۇل ۇسىنىستى قابىل الۋدان باس تارتتى.
يرينا سەروۋس
قوستاناي وبلىسى، تاران اۋداندىق ءماسليحاتىنىڭ دەپۋتاتى، توبىل بالاباقشاسىنىڭ مەڭگەرۋشىسىنىڭ ەلباسىمەن كەزدەسۋدە ايتقان ءسوزى عالامتوردى جارعان ەدى.
«تاۋەلسىزدىگىمىزدىڭ 25 جىلىندا ءسىزدىڭ قوستانايعا ءار كەلگەنىڭىز ءبىز ءۇشىن - مەيرام: نۇرلى كۇن» - دەگەن يرينا سەروۋستى كوپشىلىك كۇلكىگە اينالدىردى.
نۇرلان سماعۇلوۆ
2014-جىلدىڭ شىلدە ايىندا Astana Group كورپوراتسياسىنىڭ قوجايىنى، كاسىپكەر نۇرلان سماعۇلوۆ EXPO-2017 اۋماعىندا ورنالاسقان ساۋدا ويىن-ساۋىق ورتالىعىنىڭ جوباسىن تانىستىرۋ كەزىندە وسى وبەكتتى «نۇر پلازا» دەپ اتاۋدى ۇسىنعان ەدى.
وعان نۇرسۇلتان نازاربايەۆ: «وسىلاي جاعىمپازدانعاندى قايدان بىلەسىڭ؟» دەپ قارسى ساۋال قويعاندا، كاسىپكەر ويلانباستان: «ءومىر ۇيرەتتى»، - دەپ جاۋاپ بەرگەن ەدى.
بەكبولات تىلەۋحان
بەكبولات تىلەۋحان دا قالاعا پرەزيدەنت اتاۋىن بەرۋگە قارسى ەمەس جانداردىڭ ءبىرى.
«تاۋەلسىز قازاقستان مەن نازاربايەۆتىڭ اتى سينونيمدەر سياقتى. مەنى جاعىندى نەمەسە باسقا دەپ تۇسىنسەڭىزدەر، وزدەرىڭىز بىلىڭىزدەر، ءبىراق تاريحي كوزقاراسپەن جانە ەگەمەندى ەلدىڭ ازاماتى رەتىندە، مۇنى وتە ءبىر ءادىل ۇسىنىس دەپ ويلايمىن»، - دەدى دەپۋتات.
