قازاقستان ماماندارى يزرايلدىڭ الدىڭعى قاتارلى مەديتسينا ورتالىقتارىندا بىلىكتىلىگىن ارتتىرادى
قازاقستان تاراپىنان قازاقتان رەسپۋبليكاسىنىڭ قارجى ءمينيسترى باقىت سۇلتانوۆ، يزرايل تاراپىنان يزرايل مەملەكەتىنىڭ قورشاعان ورتانى قورعاۋ جانە يەرۋساليم مەن دياسپورا ىستەرى جونىندەگى ءمينيسترى زەەۆ ەلكين باسقارۋمەن وتكەن وتىرىس اياسىندا ەكى ەل اراسىندا ساۋدا، كاسىپكەرلىك پەن ينۆەستيتسيا، اۋىل شارۋاشىلىعى، دەنساۋلىق ساقتاۋ، اقپاراتتىق-كوممۋنيكاتسيالىق تەحنولوگيالار سالاسىنداعى ەكىجاقتى ىنتىماقتاستىقتىڭ وزەكتى جانە پەرسپەكتيۆالى باعىتتارى تالقىلاندى.
سونداي-اق يزرايل مەملەكەتىنىڭ پرەمەر-ءمينيسترى ب. نەتانياحۋدىڭ قازاقستان رەسپۋبليكاسىنا ساپارى بارىسىندا ەكىجاقتى قۇجاتتاردى قول قويۋعا دايىنداۋ ماسەلەلەرى پىسىقتالدى. دەنساۋلىق ساقتاۋ سالاسىنداعى ىنتىماقتاستىقتى جانداندىرۋ، اتاپ ايتقاندا قازاقستاندىق مامانداردىڭ ءيزرايلدىڭ الدىڭعى قاتارداعى مەديتسينا ورتالىقتارىندا بىلىكتىلىگىن ارتتىرۋ، جانە يزرايل ماماندارىنىڭ قاتىسۋىمەن شەبەرلىك ساباقتارىن وتكىزۋ ۋاعدالاستىعىنا دا جەتكىزىلدى.
مۇنان بولەك، يزرايل تاراپى اۋىل شارۋاشىلىعى سالاسىنداعى ىنتىماقتاستىقتى دامىتۋعا قىزىعۋشىلىق تانىتتى. اتاپ ايتقاندا، «ءۇش قوڭىر» تامشىلاتىپ سۋارۋ بويىنشا قازاقستان-يزرايل ورتالىعىن حالىقارالىق ورتالىققا اينالدىرۋ، قازاقستاندا دەمونستراتسيالىق فەرما قۇرىلىسى بويىنشا بىرىككەن كونسورتسيۋمدى قۇرۋعا ەرەكشە نازار اۋداردى.
اۆتور: مارلان جيەمباي
