سپورتتان كۇدەرىن ۇزگەن يليا يلين ەندى سۇلۋلىق سالونىن اشپاق
«زاڭنىڭ اتى زاڭ، مەن بەيجىڭدەگى مەدالىمدى بەرمەي قويا المايمىن. سول جىلى ەكىنشى ورىن العان شيمون كالەتسكە بەرۋگە تۋرا كەلەدى.
«كەشىر، ساعان مەدالدى بەرە المايمىن» دەپ ايتا المايمىن، سەبەبى، ول مەنىڭ دوسىم، ال دوستىق ۇعىمى مەن ءۇشىن قاسيەتتى»، - دەدى ول جۋرناليستەرگە ارنالعان باسپا ءسوز ءماسليحاتىندا.
«ال، لوندونداعى مەدالدى كىمگە بەرەرىمدى بىلمەيمىن، سەبەبى، ول وليمپياداعا قاتىسقان جىگىتتەردىڭ كوبى، 9- ورىنعا دەيىن دوپينگ داۋىنا تاپ بولدى. ونىنشى ورىن العان جىگىت ءتىپتى دوپينگ- باقىلاۋدان وتكەن دە جوق. ولاردىڭ بارلىعى دوپينگ- باقىلاۋدان ءوتسىن، سەبەبى مەن مەدالدى ءادىل تۇردە تاپسىرعىم كەلەدى»، - دەيدى سپورتشى.
اۋىر اتلەت وليمپيادا ويىندارىنا سەگىز جىل بويى قاتىسا المايتىنىن مويىندادى. يليا يلين ۇلتتىق كوماندالار شتاتى ديرەكسياسىنان كەتۋ تۋرالى ارىز جازىپتى. «سۇيىكتى جۇمىسىمنان ايىردى.. .سپورتتاعى كارەرام وكىنىشكە قاراي وسىمەن ءبىتتى، سوندىقتان، بۇل كىتاپتى جاۋىپ، كەلەسى ەسىكتى اشۋ كەرەك»، - دەدى يليا يلين. سپورتشى دەگەنمەن اۋىر اتلەتيكانى مۇلدە تاستاپ كەتپەيتىنىن دە ايتتى.
بولاشاقتا سپورتشى كوممەرتسيالىق نەگىزدە اۋىر اتلەتيكاعا قايتا ورالۋى مۇمكىن. يليا ءتىپتى اناسىنىڭ ىسىنە قوسىلىپ، استانادا سۇلۋلىق سالونىن اشۋدى دا ويلاپ ءجۇر ەكەن. دەگەنمەن، حالىقارالىق وليمپيادا كوميتەتىنىڭ شەشىمىنە قاتىستى اپەللياتسيا بەرۋىم دە مۇمكىن، دەدى يليا. ءبىراق، قازاقستاننىڭ اۋىر اتلەتيكا فەدەراتسياسىنداعى ادۆوكاتتاردىڭ قولىنان تۇك كەلمەگەن سوڭ، يليا اپەللياتسيا بەرۋ ءۇشىن باسقا قورعاۋشىلار تابۋىم كەرەك، دەيدى ول.
ەستەرىڭىزگە سالا كەتەيىك، بۇگىن قازاقستان رەسپۋبليكاسى ۇلتتىق وليمپيادالىق كوميتەتى حالىقارالىق وليمپيادالىق كوميتەتى تاراپىنان اعزاسىنان تىيىم سالىنعان پرەپاراتتاردىڭ ءىزى تابىلعان 2008 جانە 2012 -جىلدارداعى وليمپيادا ويىندارىنا قاتىسقان قازاقستاندىق سپورتشى يليا يلينگە قاتىستى جازا قولدانىلعاندىعى تۋرالى رەسمي حابارلاما الدى.
حالىقارالىق وليمپيادالىق كوميتەتىنىڭ تارتىپتىك كوميسسياسى 2008 -جىلى بەيجىڭدە جانە 2012 -جىلى لوندوندا وتكەن وليمپيادا ويىندارىنىڭ جەڭىمپازى، 94 كگ سالماق دارەجەسىندە ونەر كورسەتكەن قازاقستاندىق اۋىر اتلەت يليا ءيليننىڭ «ا» جانە «ۆ» دوپينگ سىنامالارىنىڭ قوسىمشا تەكسەرۋ قورىتىندىسى بويىنشا قازاقستاندىق سپورتشىنى سول ويىنداردان شەتتەتىپ، كورسەتكەن ناتيجەلەرىنىڭ كۇشىن جويىپ، جۇلدەلەرىن قايتارىپ الۋ تۋرالى شەشىم شىعاردى. اۆتور: كەنجەكەي توقتامۇرات قىزى
