قازاقستان مەن قىتاي گەولوگيا سالاسىنداعى ىنتىماقتاستىعىن كەڭەيتەدى
primeminister.kz سايتىنىڭ حابارلاۋىنشا، قازاقستاندىق دەلەگاتسيانى ق ر ينۆەستيتسيالار جانە دامۋ مينيسترلىگىنىڭ اتىنان گەولوگيا جانە جەر قويناۋىن پايدالانۋ كوميتەتىنىڭ ءتوراعاسى بازارباي نۇراباي جانە ق. ساتپايەۆ اتىنداعى گەولوگيالىق عىلىمدار ينستيتۋتىنىڭ ديرەكتورى مۇرات ومىرسەرىكوۆ باستاپ باردى.
قىتاي حالىق رەسپۋبليكاسى اتىنان ق ح ر جەر جانە تابيعي رەسۋرستار مينيسترلىگىنىڭ باسشىلارى، ق ح ر سىرتقى ىستەر مينيسترلىگى ازيا جانە ەۋروپا دەپارتامەنتىنىڭ ءبىرىنشى حاتشىسى، ق ح ر گەولوگيالىق بارلاۋ پارتيا توبىنىڭ مۇشەلەرى وكىلدىك ەتتى. اشىلۋ سالتاناتىندا ق ح ر جەر جانە تابيعي رەسۋرستار مينيسترلىگىنىڭ ۆيسە- ءمينيسترى ساو ۆەيسين وتىرىسقا قاتىسۋشىلاردى قۇتتىقتاپ، ءسوز سويلەدى.
ول قازاقستاندىق دەلەگاتسيانىڭ ءىس- شاراعا بەلسەندى قاتىسقانى ءۇشىن ريزاشىلىعىن ءبىلدىردى. سونداي- اق، مۇمكىندىكتى پايدالانا وتىرىپ، قازاقستان رەسپۋبليكاسى تاۋەلسىزدىگىنىڭ 25 جىلدىعىمەن قۇتتىقتاپ، ودان ءارى گۇلدەنە ءتۇسۋىن تىلەدى. مينيستر ەكى ەلدىڭ گەولوگيالىق قىزمەتتەرى اراسىنداعى ەكى جاقتى ىنتىماقتاستىقتىڭ جانە ءبىرىڭعاي گەولوگيالىق كارتا قۇرۋ ماقساتىمەن زەرتتەلەتىن ءوڭىر شەگىندە گەولوگيالىق اقپاراتپەن الماسۋ بويىنشا جۇمىستاردى كۇشەيتۋدىڭ ماڭىزدىلىعىن اتاپ ءوتتى.
ق ر ينۆەستيتسيالار جانە دامۋ مينيسترلىگىنىڭ اتىنان گەولوگيا جانە جەر قويناۋىن پايدالانۋ كوميتەتىنىڭ ءتوراعاسى ب. نۇراباي ءوز سوزىندە وسى ءىس- شارانى ۇيىمداستىرعانى ءۇشىن قىتاي حالىق رەسپۋبليكاسىنداعى ارىپتەستەرىنە ريزاشىلىعىن ءبىلدىردى. 8- وتىرىستىڭ كۇن تارتىبىندە قازاقستان- قىتاي ىنتىماقتاستىق كوميتەتىنىڭ جۇمىس جاعدايى جونىندە اقپارات بەرۋ، پەرسپەكتيۆالىق ۋچاسكەلەردى تالداۋ جانە انىقتاۋ ءۇشىن قازاقستان مەن قىتاي اراسىنداعى شەكاراعا شەكتەس الاپتىڭ ءبىرىڭعاي كارتاسىن قۇراستىرۋ جونىندەگى جوبانى تالقىلاۋ، جوبانى ورىنداۋ بويىنشا تۇيىتكىلدى ماسەلەلەردى تالقىلاۋ سەكىلدى گەولوگيالىق سالاداعى ەكى جاقتى ىنتىماقتاستىقتىڭ ماڭىزدى ماسەلەلەرى قاراستىرىلدى.
سونىمەن قاتار، وتىرىستا بىرلەسكەن جوبالاردى دامىتۋ باعىتتارى، ەكى ەلدىڭ گەولوگيالىق قىزمەتتەرى اراسىنداعى ىنتىماقتاستىقتى كەڭەيتۋ جانە گەولوگيالىق اقپاراتپەن الماسۋ جۇمىسىن كۇشەيتۋ جونىندەگى جوسپارلار تالقىلاندى. الداعى حالىقارالىق كونگرەستەرگە، قازاقستان مەن قىتايداعى گەولوگيالىق بارلاۋ جانە تاۋ- كەن مەتاللۋرگيالىق بەيىن كورمەلەرىنە گەولوگيالىق بارلاۋ كاسىپورىندارىنىڭ قاتىسۋى ماسەلەسى قاراستىرىلدى. قىتاي تاراپى 2017 - جىلدىڭ ءبىرىنشى جارتى جىلدىعىندا گەولوگيا جانە جەر قويناۋىن پايدالانۋ كوميتەتىنىڭ قىزمەتكەرلەرى مەن قازاقستاندىق گەولوگ مامانداردى گەولوگيالىق باعىتتار بويىنشا وقىتۋعا ءازىر.
سونداي- اق، قىتاي تاراپى قىتاي حالىق رەسپۋبليكاسىنىڭ ۇكىمەتى اتىنان ستيپەنديا ءبولۋ ءۇشىن كوميتەت ءتوراعاسىنا پەكين ۋنيۆەرسيتەتتەرىندە وقىپ جاتقان ۇزدىك قازاقستاندىق ستۋدەنتتەردى انىقتاۋدى ءوتىندى. وتىرىس قورىتىندىسى بويىنشا ق ر ينۆەستيتسيالار جانە دامۋ مينيسترلىگى گەولوگيا جانە جەر قويناۋىن پايدالانۋ كوميتەتى مەن ق ح ر قىتاي گەولوگيالىق قىزمەتى اراسىنداعى ىنتىماقتاستىق جونىندەگى مەموراندۋمعا قول قويۋ جونىندەگى ماسەلە قاراستىرىلۋدا.
