اينۇر تۇرسىنبايەۆا: اش قاسقىرداي جالاڭداعان جاس ۇرپاق ءوسىپ كەلە جاتىر
ول ادامداردىڭ قاتىگەز ءارى اشۋشاڭ بولىپ بارا جاتقانىن اشىنا ايتتى. ايتىسكەر اقىن جەلىدەگى وقىرماندارىن مەيىرىمدىلىككە، ادامگەرشىلىككە، كەشىرىمشىل بولۋعا شاقىردى.
«وسى شىندارىڭىزدى ايتىڭىزدارشى... سىزدەردى وسى قوعامداعى قاتىگەزدىك قورقىتپاي ما؟ مىسالى، وسى ينستاگرامنىڭ ءوزىن الايىقشى. جاپ- جاس كەلىنشەكتەر، تيتتەي قىزدار، بارماقتاي بالالار زىركىلدەپ كوممەنت جازىپ وتىرادى. اناسىنان ۇلكەن انشىلەرگە «سەنى جەك كورەم»، «داۋىسىڭ قۇرسىن»، « ءتۇرىڭ جامان» دەپ ۋ شاشىپ وتىرۋ قورقىتادى مەنى. ادامدى قايتسەم جىلاتام، قايتسەم كەمسىتەم، قايتسەم رەنجىتەم دەپ اش قاسقىرداي جالاڭداعان جاس ۇرپاق ءوسىپ كەلە جاتىر. جانىم تۇرشىگەدى. جاماندىقتى جازۋ ارقىلى ءسىز ءوز جولىڭىزدى جاباسىز!» - دەپ باستادى تۇرسىنبايەۆا ءسوزىن جەلىدەگى پاراقشاسىندا.
ايتىسكەر اقىن ۇناماعان سۋرەتتى نە جازبانى كورگەن جاعدايدا ءمان بەرمەي ءوتىپ كەتۋگە كەڭەس بەردى. ونىڭ ايتۋىنشا، كەز كەلگەن جاماندىق وزىڭە قايتا ورالادى.
«ءسىزدىڭ ءبىر اۋىز سوزىڭىزگە مەنىڭ تۇگىم كەتپەۋى مۇمكىن، ءبىراق ول سىزگە مىندەتتى تۇردە ورالادى... %100! مەيىرىمدى بولىپ ۇيرەنىڭىز. ءتىپتى قاتتى جەك كورىپ تۇرساڭىز دا جىلى كوممەنت جازىپ ۇيرەنىڭىزشى... جولىڭىز اشىلادى. وقىعان ادام قۋانسا سىزگە دە سونداي قۋانىش كەلەدى. بۇل ءومىردىڭ زاڭى! قاتتى جانىڭىز اشىپ بارا جاتسا جەكەگە جازىپ كورىڭىز. ءبىراق ءسىز ايتتى ەكەن دەپ ەشتەڭە وزگەرمەيتىنىن ۇمىتپاڭىز. بەكەر جۇيكەڭىز قۇرىپ، كەۋدەڭىزگە جامان ەنەرگەتيكا جينايسىز. جامان ەنەرگيا راكقا ۇشىراتادى... كۇيەۋىڭىزگە، ەنەڭىزگە، دوسىڭىزعا دەگەن رەنىشتى باسقادان الماڭىز. ۇمىتىڭىز! كەشىرىپ ۇيرەنىڭىز! سوندا جولىڭىز اشىلا بەرەدى. جولىڭىز اشىلسا باعىڭىز اشىلادى. اشىق جارقىن بولىڭىز. ارينە قيىن. ءوزىڭىزدى تاربيەلەۋدى ينستادان باستاڭىزشى. كەز كەلگەن فوتونىڭ جامان جەرىنە ءمان بەرمەي، كورسەڭىز دە كورمەگەندەي ءوتىپ كەتۋگە تىرىسىڭىزشى. ءتىپتى ۇناماسا وقىماڭىز، قاراماڭىز. ايدالاداعى ادامعا جۇيكەڭىزدى جۇقارتپاڭىز. ءوزىڭىزدى قيناپ بولسا دا قۋانىپ، ءسۇيسىنىپ ۇيرەنىڭىزشى. بۇل ءومىر عاجاپ ەمەس پە؟ ! دۇرىستاپ، اسىقپاي، جان- جاعىڭىزعا قاراڭىزشى. 2-3 مينۋت كوزىڭىزدى جۇمىپ، بارلىق دەنەڭىزدى، ميىڭىزدى بوساتىپ تەرەڭ تىنىس الىپ، ويلانىپ كورىڭىزشى. ءبارى جاقسى! جۇرەگىڭىزدى جۇمسارتىڭىز! ەڭ جامان ادامنىڭ ەڭ جاقسى جەرىن ىزدەپ تاۋىپ كورىڭىزشى. مىندەتتى تۇردە تاباسىز، مىندەتتى تۇردە جاقسى كورىپ كەتەسىز» ، - دەپ تۇيىندەدى ءسوزىن تۇرسىنبايەۆا.
ريزابەك نۇسىپبەك ۇلى
