ءوز وتىنا ءوزى كۇيگەن... فۋتبولشى

جاراتۋشى سونشاما مول تالانت بەرگەنمەن، سول تالانتتى ورنىمەن پايدالانا الماعان جان بىرتە- بىرتە ءوزىن جەپ تىناتىن سياقتى. ونىڭ ءومىرى قىم- قۋىت وقيعالارعا تولى بولادى، ءبىراق سوڭىنا قاراي تارازى باسى پەندەۋي السىزدىك جاعىنا باسىلىپ كەتەدى. ليتۆينەنكونىڭ عۇمىرى ءدال سولاي بولدى. ءسوز جوق، قازاق فۋتبولىنىڭ ءولىارا كەزەڭى دەرلىك 15 جىلدا ول اڭىزعا بەرگىسىز قاھارمان بولا الدى

جارقىن قادامدار

ولەگتىڭ جارقىلداي باستاعان كەزى ءبىزدىڭ ستۋدەنتتىك شاعىمىزعا تاپ كەلدى. ول اۋەلى ل. وستروۋشكو جاتتىقتىرعان «دينامو» (الماتى) كومانداسىندا مەرگەندىگىمەن تانىلدى. سوسىن ءوزىن تاربيەلەگەن «تاراز» كومانداسىندا (ول كەزدە «فوسفور») اۋىسىپ، 1994 -جىلى قازاقستان چەمپيوناتىنىڭ باس مەرگەنى اتاندى، قارسىلاستار قاقپاسىنا 20 گول سوقتى. 21 جاستاعى جىگىت سول كەزدىڭ وزىندە ەركىندىگىمەن، دوپتىڭ قالاۋىنشا ۇيىرەتىن شەبەرلىگىمەن، ەكى اياعىنىڭ دا مىقتى سوققىسىمەن ەرەكشەلەنگەن-دى. ءالى ەسىمدە، ءدال سول جىلى ول «سپورت» گازەتىنىڭ ورىسشا نۇسقاسىنا سۇحبات بەرىپ: «يا - پروفەسسيونال!» - دەپ مالىمدەگەن- دى. 20 دان جاڭا اسقان جىگىتتىڭ بۇل سوزىنەن وزىنە دەگەن شەكسىز سەنىمى بايقالىپ تۇرعانى ايدان انىق ەدى.

ءبىز ليتۆينەنكونى 1995 -جىلى ناعىز مەرگەن دەپ تانىدىق. قازاقستان وليمپيالىق قۇراماسى اتلانتا وليمپياداسىنىڭ ىرىكتەۋ كەزەڭىندە قىرعىزستان، تاجىكستان، وزبەكستان قۇرامالارىمەن ءبىر توپقا تۇسكەن- ءدى. اۋەلى وتانداستارىمىز 20 -مامىر كۇنى سىرت الاڭدا تاجىكستاندى 3:0 ەسەبىمەن ويسىراتا ۇتتى.

1990 -جىلداردىڭ ورتاسى ءدال قازىرگىدەي اقپارات بازارى قايناپ جاتقان كەزەڭ ەمەس ەدى، سوندىقتان بۇل جاڭالىقتى ەرتەڭىنە ەستىگەن بىزدەر باقىتقا ماس بولىپ قالدىق. ەسەپتى 22-مينۋتتا ولەگ ليتۆينەنكو اشىپتى. ويىننان سوڭ، قازاقستاندىقتاردىڭ قيمىلىنا ءتانتى بولعان تاجىك جانكۇيەرلەرى تىك تۇرىپ قول سوقتى دەسەدى. ءتىپتى بىرەۋى ولەگتى ارنايى توقتاتىپ، گۇل دە ۇسىنعان. نە دەسەك تە، بۇل توپتا باستى قارسىلاس وزبەكستان وليمپياشىلارى ەدى. كورشىلەرمەن ويىندا اسىعا كۇتتىك. 24 -ماۋسىم كۇنى تاشكەنتتەن تاعى دا قۋانىشتى حابار جەتتى: قازاقستان وليمپيالىق قۇراماسى الاڭ يەلەرىن 2:1 ەسەبىمەن جەڭدى. ەكى گولدى دا ليتۆينەنكو ەنگىزگەن!

بۇدان كەيىن ولەگتى كورۋگە قاتتى قۇمارتتىق. قازاقستان وليمپيالىق قۇراماسىنىڭ بىشكەكتە قىرعىزستانمەن 2:2 ەسەبىمەن تەڭ ويناعانىن، تاجىكستاندى الماتىدا 3:1 ەسەبىمەن (ەكى گولدىڭ اۆتورى - ليتۆينەنكو) ۇتۋىن زاڭدىلىق رەتىندە قابىلدادىق. 2 -قىركۇيەكتە سەرگەي گوروحوۆوداتسكييدىڭ شاكىرتتەرى الماتىدا قىرعىز اعايىنداردى 6:0 ەسەبىمەن تۇقىرتتى، ولەگ حەت- تريك جاسادى! كەلەسى ويىن 7 -قازانعا جوسپارلانعان-دى. تاياعان سايىن بىزدەن دە تاعات كەتتى. ساباقتان شىعا سالىپ، ورتالىق ستاديونعا تارتامىز. ليتۆينەنكو باستاعان جىگىتتەردىڭ جاتتىعۋىن كورۋگە اسىقپىز. ك. گالچەنكو، ر. لۋچكين، ك. كوتوۆ، ر. گۋمار، ءا. نىسانبايەۆ، س. جەيلەتبايەۆتار دوپتى گۇرس- گۇرس سوعادى، قوس قاقپاشى ا. نەناشيەۆ پەن ا. ەكتوروۆ جانتالاسا قايتارادى.

ءبارىبىر ولاردىڭ اراسىندا ليتۆانىڭ قيمىلى الابوتەن. ءوزى ەشقاشان ەزۋىن جيمايدى. ءبىر جولى جاتتىعۋ بارىسىندا باپكەر س. گوروحوۆوداتسكييمەن باستەسىپ قالدى. ۇستاز بەن شاكىرت ايىپ الاڭىنىڭ سىرتىنان ايىپ دوپتارىن كەزەك تەبۋگە كىرىستى. بايقاۋىمىزشا، دوپتىڭ ءدال «توعىزدىققا» ەنۋى شارت! ۇستاز وزىپ كەتتى! ليتۆانىڭ ەڭسەسى تۇسە قويعان جوق، باپكەرىن شىن نيەتىمەن قۇتتىقتادى، ءتىپتى الاڭ شەتىنە دەيىن ارقاسىنا دا مىنگىزىپ الدى. ءبىز قولتاڭبا الۋعا اسىقتىق. «ليتۆينەنكو 10» دەپ شيىرە جازدى ول قاعاز بەتىنە. سول قولتاڭبا مەندە ءالى بار... ءيا، ول شىنىندا دا تالانتى ەڭ جوعارى - 10 باللمەن باعالاناتىن جىگىت ەدى، اتتەڭ، ءوزى 5 بالىن عانا پايدالانا العان سياقتى.

7 قازان كۇنى ستاديونعا ەرتە جينالدىق. اشىپ ايتپاساق تا، كوڭىلىمىزدە كۇدىك بار. تاشكەنتتە ەسە جىبەرگەن وزبەكتەر بۇگىن قاھارىنا مىنسە قايتەمىز؟ ولار جەڭسە، وليمپياداعا ىرىكتەۋدىڭ ەكىنشى كەزەڭىنە جولدامانى يەلەنىپ كەتەدى... جوق، ليتۆا ءبىزدى بىردەن- اق باقىتقا كەنەلتتى. ءيا، سول گول ءالى كوز الدىمدا. 8-مينۋتتا قورعانىستىڭ وڭ قاپتالىنان دوپ العان رۋسلان گۋمار ونى بىردەن العا، ءتۇۋ الىستاعى ليتۆينەنكوعا اسىردى. ولەگ ءوزىن ماتاي ۇستاعان قورعاۋشىدان تەز سىتىلدى دا، دوپ تۇسەتىن نۇكتەگە قۇيىن- پەرەن جۇگىردى. وزبەك قاقپاشىسى دا ايىپ الاڭىن تاستاي بەرە، دوپقا ولەرمەندەنە ۇمتىلعان.

مىنە، ەكەۋى دوپقا ءبىر مەزەتتە جەتتى! ەكەۋى دە دوپقا اياقپەن ۇمتىلدى! ءاي، ولەگ- اي، قانداي قۇيتىرقى ەدىڭ! دوپ جەرگە تۇسە قالعان ساتتە ول وڭ اياعىن ءسال كوتەرىپ، دوپ تەز توقتايتىنداي عانا قيمىل جاسادى دا، ءوزى سول جاققا بۇلت ەتە ءتۇستى. قاقپاشى اۋا قارماپ، ايدالادا قالدى. دوپ سيقىرلانعانداي ليتۆينەنكونىڭ الدىنا كەلدى. گول! گول!! 70-مينۋتتا ولەگ تاعى ءبىر گول ەنگىزدى، لۋچكين تاعى ءبىر دوپ ۇستەدى. وزبەكتەر جالعىز گولمەن جاۋاپ قايىرا الدى - 3:1.

سول جىلى ليتۆينەنكو «ەلىم- ايدىڭ» ساپىندا قازاقستان چەمپيونى اتاندى، قازان ايىندا ازيافۋتبول https://cdncache-a.akamaihd.net/items/it/img/arrow-10x10.png كونفەدەراتسياسىنىڭ (ا ف ك) شەشىمىمەن قۇرلىقتىڭ ەڭ ۇزدىك ويىنشىسى بولىپ تانىلدى!

تۇجىرىلا باستاعان جول

بۇدان ءارى ليتۆينەنكونىڭ قاراما- قايشىلىققا تولى جولى باستالدى. قازاقستان ۇلتتىق قۇراماسى ازيا چەمپيوناتىنىڭ ىرىكتەۋ كەزەڭىندە قاتار جانە سيريا كوماندالارىمەن ءبىر توپقا ءتۇستى دە، ولەگ ليتۆينەنكو ونىڭ ساپىنداعى تۇڭعىش كەزدەسۋىن 1996 -جىلدىڭ 14 -ماۋسىمىندا قاتارعا قارسى وتكىزدى. بۇدان سوڭ كۇزدە ول قۇراما ساپىنان ءبىراز ۋاقىتقا الاستاتىلدى. ءتىپتى 1997 -جىلدىڭ العاشقى جارتىسىنداعى الەم چەمپيوناتىنىڭ ىرىكتەۋ ويىندارىنا دا قاتىسقان جوق.

ونىڭ سەبەبى كەيىنىرەك بەلگىلى بولدى. ليتۆينەنكو رەجيم بۇزعان، ياعني، قۇراما جيىنى كەزىندە ىشىمدىك ءىشىپ، باپكەرلەر كوزىنە ءتۇسىپ قالعان. ول قۇراماعا 1997 -جىلدىڭ كۇزىندە ورالدى. ءبىراق 4 قازان كۇنى جاپونيامەن ويىندا وڭ اياعىن قاتتى جاراقاتتاپ، ماۋسىم سوڭىنا دەيىن الاڭعا شىعا العان جوق. كەلەسى جىلى ول «ەلىم-اي» ساپىندا ەكىنشى رەت ەل چەمپيونى اتاندى.

ولەگ بۇل كەزدە تاعدىردىڭ تاعى ءبىر توسىن سىناعى كۇتىپ تۇرعان- دى. 1998 -جىلدىڭ كۇزىندە «ەرتىس» كومانداسى ازيا چەمپيوندارى كۋبوگىنىڭ العاشقى ىرىكتەۋ كەزەڭىندە، ءبىرىنشى ماتچتا تۇركىمەنستاننىڭ «كوپەت- داگ» كومانداسىنان 1:4 ەسەبىمەن جەڭىلدى. قازاقستاندىقتار كەلەسى كەزەڭگە ءوتۋ ءۇشىن قارسىلاسىن 3:0 ەسەبىمەن ۇتۋى كەرەك ەدى. وزگە جۇرت اڭعارماي قالادى دەدى مە، پاۆلودارلىقتار سول كەزدەگى ق ر فۋتبول https://cdncache-a.akamaihd.net/items/it/img/arrow-10x10.png قاۋىمداستىعى بىلە تۇرسا دا، قارىمتا ماتچقا ليتۆينەنكونى «ەرتىستىڭ» ويىنشىسى رەتىندە تىركەپ، الاڭعا شىعارىپ جىبەردى. «ەرتىس» «كوپەت- داگتى» 3:0 مەن جەڭدى، ءبىراق قۋلىعى كوپ وتپەي- اق اشىلىپ قالدى. بۇل وقيعادا قاتتى زارداپ شەككەن ليتۆا عانا بولدى. افك ونى ءبىر جىلعا ايىپتاپ جىبەردى. 25 جاستاعى جىگىت ءۇشىن بۇدان وتكەن جازا بولار ما؟ مۇمكىن، وسى وقيعا دا جۇرت الاقانىندا جۇرگەن ولەگتى ىشتەي ءمۇجىپ، قاجىرىن كەمىتىپ كەتكەن شىعار... كىم بىلەدى... وڭاشادا ول كۇيىگىن الكوگولمەن باسىپ جۇرگەنىن ماماندار دا، جانكۇيەرلەر دە، فۋتبولشىلار دا جاقسى بىلەتىن.

ءبىر جىلدىق ايىبىن وتەپ ورالعان ولەگتى «قايرات» كومانداسى باۋىرىنا باستى. ليتۆا دا الماتىلىقتاردىڭ سەنىمىن جاقسى اقتادى. بۇل كوماندا ساپىندا ول قازاقستان كۋبوگىنىڭ جەڭىمپازى اتاندى. فينالدىق ويىن تۇڭعىش رەت استانا قالاسىندا ءوتتى. «قايراتتىڭ» قارسىلاسى «اكسەسس- گولدەن- گرەين» (پەتروپاۆل) كومانداسى ەدى. 5:0 ەسەبىمەن اياقتالعان ماتچتا ليتۆينەنكو 20 جانە 90-مينۋتتاردا قوس گول ەنگىزدى.

كومەگى بولماعان سۋپەرگول

2001 -جىلى قازاقستان قۇراماسى الەم چەمپيوناتىنىڭ ىرىكتەۋ كەزەڭىنە ەكىنشى رەت قاتىستى. ليتۆينەنكو باپكەر ۆاحيد ماسۋدوۆ جاتتىقتىرعان بۇل قۇرامانىڭ بەلدى شابۋىلشىلارىنىڭ ءبىرى ەدى. نەپال، ماكاو جانە يراك قۇرامالارىمەن ءبىر توپقا تۇسكەن وتانداستارىمىز باعدات قالاسىندا وتكەن العاشقى اينالىمدى وتە جاقسى كورسەتكىشپەن اياقتادى، ەڭ باستىسى، نەگىزگى قارسىلاس يراكتىقتارمەن 1:1 ەسەبىمەن تەڭ وينادى. ءساۋىر ايىنىڭ سوڭىنا قاراي 4 قۇراما الماتىدا توقايلاستى. ءالسىز ەكى قارسىلاستى ەركىن ەڭسەرگەن قازاقستان قۇراماسى يراكتى دا بىردەن شەڭگەلىنە ىلگەندەي بولىپ ەدى...

ويىننىڭ 30-مينۋتىندا ولەگ ليتۆينەنكو ورتالىق ستاديونعا جينالعان جانكۇيەرلەردى ەستەن تاندىردى. ايىپ الاڭىنا جاقىن تۇستا اسقات قادىرقۇلوۆ وزىنە سىرعىتا سالعان دوپتى العان ول ءبىر قادام جاسادى دا، اينالدىرا سوقتى. قارسى الدىندا تۇرعان قوس قورعاۋشى دا، قاقپاشى دا دوپتى تەك كوزبەن ۇزاتىپ سالدى. تەڭبىل دوپ ءدال «توعىزدىققا» سۇڭگىدى دە كەتتى! گول!!!

ءيا، مۇنداي ادەمى گولدى كورۋ دە باقىت ەدى!

ءبىراق يراكتىقتار 40-مينۋتتا ەسەپ تەڭەستىرىپ كەتتى. ءبىزدىڭ قۇراما دوپ ايىرماسىنىڭ كەمدىگىنەن كەلەسى كەزەڭ جولداماسىنان ايىرىلدى...

تاعدىرمەن بەتپە- بەت

بۇدان سوڭ ليتۆانى كيپر ءدامى كۇتىپ تۇردى. ول ورتاڭقول «ەرميس» كومانداسىنىڭ قۇرامىندا 9 ويىن وتكىزدى، ءبىراق گول سوعىپ كوزگە تۇسكەن جوق. قالاي دەگەنمەن، بۇل ساتسىزدىك تە ولەگتىڭ نازىك جانىنا قامشى بولىپ تيگەنى ءسوزسىز. ليتۆينەنكو جۇرگەن جەرىندە ەل ىقىلاسىنا بولەنۋگە ۇيرەنىپ قالعان- دى. كيپردە بولسا دا، ول ەۋروپا فۋتبولىندا ەش ەرلىك جاساي الماعانىنا قاتتى قاپالانعان سياقتى. كىم بىلەدى، ول كيپردە ءبىر جارقىراپ الىپ، ارى قاراي ءباسى ودان جوعارىراق ليگالاردا ونەر كورسەتۋدى ارمانداعان شىعار.

ولەگتىڭ اكەسى فەدور ۇلىنىڭ وسى ساپاردان ورالعان سوڭ قاتتى ءتۇسىپ كەتكەنىن، ىشىمدىككە ءجيى ۇيىرسەكتەي بەرگەنىن ايتادى. ەلگە ورالعان سوڭ، «جەڭىس» پەن «ەلىم-اي» ساپىندا گولدارىمەن قايتا تابىسسا دا، ءبىز بىلەتىن ليتۆا باياعى ومىرگە قۇشتارلىعىمەن، الاڭداعى اقىلعا سىيمايتىن قيمىلدارىمەن كورىنە المادى. ءدال وسى كەزدە ونى ايەلى مەن ۇلى دا تاستاپ كەتتى.

2004 -جىلى ولەگ «اقتوبە- لەنتو» كومانداسىمەن كەلىسىم- شارت جاساستى. اقتوبەلىك كلۋبتىڭ جاڭا ەڭسە تۇزەي باستاعان كەزىنە تاپ كەلگەن مەرگەن جاڭا كوماندا قۇرامىندا 5 ويىن وتكىزىپ، 1 گول سوقتى دا... جۇرت نازارىنان تاسا بولدى. «اقتوبە» ءبىر اي بويى ءىز- ءتۇزسىز كەتكەن شابۋىلشىنى سىرتىنان ترانسفەرگە قويىپ، شارتتى ءۇزدى.

جۇرت قۋانىشى بولعان ليتۆانىڭ فۋتبولداعى عۇمىرى وسىمەن ءتامام بولعانداي ەدى... ءوزىن تاۋىپ الىپ، تۇسىنىكتەمە الۋعا تىرىسقان جۋرناليستەردى ول: «مەنى مازالاماڭدار! ەشتەڭە ايتقىم كەلمەيدى!» - دەپ قايتارىپ تا تاستاعان.

2005 -جىلى كۇتپەگەن جەردەن ول فۋتبولعا ورالدى. وعان «الماتى» كلۋبى سەنىم ارتتى. كورگەندەردىڭ ايتۋىنشا، «الماتىنىڭ» بازاسىنا كەلگەن ولەگتىڭ ءتۇرى تىم ايانىشتى بولعان. ۇستىندەگى كۇرتەسى قاتتى توزعان، شاشى ۇيىسىپ كەتكەن، قولى قاپ- قارا كۇس... ادامشىلىقتىڭ ەسىگىنەن شىعىپ بارا جاتقانداي كورىنگەن «ەكس- قاھارماندى» ومىرگە ورالتقان سەرگەي تيموفەيەۆ ەدى.

ءبىراق تيموفەيەۆتىڭ ءوزى «الماتىدا» تۇراقتاپ قالا المادى، سويتسە دە، ليتۆينەنكونىڭ جاڭا كلۋبتان كەتپەۋىن تاپسىرعان دا وسى باپكەر بولدى.

ليتۆا «الماتى» ساپىندا وتكىزگەن 22 ماتچتا 7 گولدىڭ اۆتورى اتاندى. 1 جىلداي دوپقا اياق تيگىزبەگەن فۋتبولشى ءۇشىن بۇل وتە جاقسى كورسەتكىش ەدى. اسىرەسە، 2005 -جىلدىڭ 25 -ماۋسىمىندا ونىڭ «اقتوبە» قاقپاسىنا سوققان حەت- تريگى ەستەن كەتپەيدى. بۇرىنعى بەينەسىن مۇلدە وزگەرتىپ، شاشىن تىقىرلاپ الىپ تاستاعان مەرگەن ءار گول سايىن يىعىن ءتۇرتىپ شوقىنىپ، اسپانعا قاراپ كۇبىرلەپ، راحمەت ايتۋمەن بولدى...

سول جىلى تيموفەيەۆ ونى ۇلتتىق قۇراماعا قايتا شاقىردى. دانيا، گرەكيا، البانيا، تۇركيا قۇرامالارىنا قارسى ولەگ وتە جاقسى وينادى. گرەكتەرمەن الماتىداعى كەزدەسۋدە ول 2 مەتر جەردەن گول سوعا الماي قالدى. جانىن سالا جۇگىرىپ جۇرگەنمەن، ونىڭ شاماسى 90 مينۋتقا تولىق جەتپەيتىنىن جانكۇيەرلەر دە جاقسى شامالاپ وتىردى.

2006 -جىلى ولەگ تاعى دا ءوز تاعدىرىنا قىرىن كەتتى. جىل باسىندا «استانا» كومانداسىنا اۋىسىپ، قۇرامانىڭ جاڭا باپكەرى ارنو پايپەرستىڭ باسشىلىعىمەن يوردانيا، ك ح د ر جانە فينليانديا قۇراماسىنا قارسى جولداستىق كەزدەسۋگە قاتىسقان سوڭ، تاعى دا ءىز سۋىتتى. جىل ورتاسىنان اۋعاندا اتى دا، زاتى دا وزگەرگەن «سەمەي» كومانداسىنان تابىلدى. ءوزىنىڭ بۇرىنعى كوماندالاسى اندرەي ميروشنيچەنكونىڭ قاناتى استىنان پانا ىزدەدى. ءبىراق كوپ ۇزاماي، «بۇل كوماندا جوعارى ليگاعا شىعۋدى ماقسات ەتپەيدى» دەپ ودان دا كەتتى.

2007 -جىلى، ءومىرىنىڭ سوڭعى جىلى ول «تارازعا» ورالىپ، 4 ويىندا 1 گول سوقتى. سوسىن تاعى دا فۋتبولدان قول ءۇزدى.

«ارعى الەمدە كەزدەسەمىز، اكە»...

2007 -جىلدىڭ 18 -قاراشاسىندا تاراز قالاسىنداعى زيراتتاردىڭ بىرىنەن ولەگ ليتۆينەنكونىڭ مۇردەسى تابىلدى. ازامات ءوزىن-ءوزى ولىمگە قيىپتى... اكەسى فەدور: «مۇنىڭ سەبەبى ۇلىمنىڭ جەكە ومىرىندەگى ساتسىزدىكتەرىندە جاتىر. ول ءبىر قىزبەن تانىسىپ، ءومىرىن جاڭا ارناعا قايتا سالعانداي ەدى. «تاراز» كومانداسىمەن كەلىسىم- شارت جاساسقان سوڭ، ول ىقشاماۋدانداردىڭ بىرىنەن 1 بولمەلى پاتەر ساتىپ الدى. اسكەري بيلەتىنە بايلانىستى قيىندىقتار تۋىنداعان سوڭ، ءۇيىن قالىڭدىعىنىڭ اتىنا جازدىردى. بۇل كەزدە ونىڭ بۇرىنعى ايەلى مەن ۇلى شىمكەنت قالاسىندا تۇرىپ جاتقان ەدى. ۇلىمەن ءجيى سويلەسىپ، ارا- تۇرا جولىعىپ جۇرگەن ولەگتىڭ باياعى ەركە قالپى قايتا ورالعانداي كورىنگەن. ءبىراق كەلە- كەلە ونىڭ ءوز ۇيىنە قونباي جۇرگەنى بەلگىلى بولا باستادى. كۇندەردىڭ كۇنى قالىڭدىعى ءۇيىن ساتىپ، باسقا قالاعا كەتىپ قالىپتى. ۇلىم سودان كەيىن ەڭسە تۇزەگەن جوق. جۇرتقا بەرگەن قوماقتى قارىزدارىن دا قايتارا الماي قينالدى. سوڭعى جولىققانىمىزدا: «ەندى قاشان كەزدەسەمىز؟» - دەپ سۇراپ ەدىم، ول: «ارعى الەمدە، اكە...» - دەي سالدى. ءمان بەرمەپپىن سوزىنە...» - دەپ ەسكە الادى.

ولەگ ءوزىنىڭ وتىز ءتورتىنشى تۋعان كۇنىنە 5 كۇن قالعاندا كوز جۇمدى.

 ولەگ ليتۆينەنكو -  تاۋەلسىز قازاق فۋتبولىنىڭ باس مەرگەنى. ول ا. ميروشنيچەنكودان كەيىن ەكىنشى بولىپ قازاقستان چەمپيوناتتارىندا 100 گول سوققان ويىنشى بولدى (بارلىعى 148 گول). ونىڭ بۇل جەتىستىگى 2015 -جىلى عانا جاڭاردى. ۇلتتىق قۇراما ساپىنداعى، قازاقستان كۋبوكتارىنداعى جانە ءتۇرلى قۇرلىقتىق سىندارداعى ناتيجەلەرىن قوسا ەسەپتەگەندە، ولەگ قازاقستاننىڭ مەرگەندەر كوشىندە نۇربول جۇماسقالييەۆتەن كەتسىنگى ەكىنشى ورىندا تۇر(182 گول).

تاعدىرى قانشا اۋىر بولسا دا، ءدام- تۇزى ەرتە تاۋسىلسا دا، قازاق جانكۇيەرلەرى ولەگ ليتۆينەنكونى ماڭگى جادىندا ۇستايدى. ونىڭ قازاق فۋتبولىنا قوسقان ۇلەسى ولشەۋسىز. ونىڭ يراك قاقپاسىنا سوققان گولى قازاق فۋتبولىنىڭ ەڭ عاجايىپ 10 گولىنىڭ قاتارىنان ورىن الاتىنى ەش كۇمانسىز.

قازاقستان پرەمەر- ليگاسىنىڭ باس مەرگەنىنە جىل سايىن ولەگ ليتۆينەنكو اتىنداعى جۇلدە ۇسىنىلاتىن بولسا، ەشكىم دە ارتىق دەمەس ەدى.

جىلناما

ولەگ فەدور ۇلى ليتۆينەنكو، شابۋىلشى

(22.11.1973 - 18.11.2007)

«تاراز»، «دينامو» (الماتى)، «ەلىم- اي»، «قايرات»، «ەرميس» (كيپر)، «اقتوبە- لەنتو»، «الماتى» كوماندالارىنىڭ ساپىندا ونەر كورسەتتى.

قازاقستاننىڭ 2 دۇركىن چەمپيونى (1995, 1998)

قازاقستان كۋبوگىنىڭ 3 دۇركىن يەگەرى (1995, 2000, 2002)

قازاقستان چەمپيوناتىنىڭ باس مەرگەنى (1994, 1998)

قازاقستان قۇراماسى ساپىندا 28 ويىن وتكىزىپ، 6 گول سوقتى.

قازاقستان چەمپيوناتتارىنىڭ ەڭ ناتيجەلى فۋتبولشىلارىنىڭ ءبىرى (148 گول)

ەسەي جەڭىس ۇلى

statsport.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى