عارىشقا ەڭ العاش رەت ۇشقان كوك تۋدىڭ تاريحى
ق ر پرەزيدەنتى نۇرسۇلتان نازاربايەۆتىڭ جارلىعىمەن سول جىلدارى لەنينسك (1995 -جىلعا دەيىنگى بايقوڭىر قالاسى اتاۋى) قالاسىنىڭ اكىمشىلىگىن ۆيتالي برىنكين باسقارعان بولاتىن. عارىش ايلاعىنىڭ اكىمشىلىك ورتالىعى بولعان لەنينسك قالاسىنا رەسپۋبليكالىق ماڭىزى بار قالانىڭ مارتەبەسى بەرىلىپ، ونىڭ جانىنداعى تورەتام مەن اقاي قالاشىقتارى ونىڭ قۇرامىنا قوسىلعان ەدى. 
1992 -جىلدىڭ 17 -شىلدەسى كۇنى لەنينسك قالاسىنىڭ ورتالىق الاڭىندا تاۋەلسىز قازاقستان رەسپۋبليكاسىنىڭ مەملەكەتتىك تۋى سالتاناتتى تۇردە كوككە كوتەرىلگەن ەدى. سالتاناتتى تۇردە تۋ كوتەرۋ شاراسىنا 1992 -جىلدىڭ 27 -شىلدەسى كۇنى عارىشقا ۇشامىز دەپ وتىرعان رەسەيلىك عارىشكەر اناتولي سولوۆيەۆ، سەرگەي اۆدەيەۆ پەن فرانسۋزدىق عارىشكەر ميشەل تونيني قاتىسقان ەدى. لەنينسك قالاسىنىڭ اكىمشىلىگى ءوتىنىش ايتقان سوڭ، «سويۋز تم-15» عارىش كەمەسىمەن عارىشقا ۇشقان بۇل ەكيپاج قازاقستان رەسپۋبليكاسىنىڭ تۋىن دا الا كەتكەن ەدى.
ەكى اپتادان كەيىن ەگەمەن ەلدىڭ تۋى ۇشقىشتارمەن قاتار، جەرگە امان-ەسەن ورالعان بولاتىن. قازاقستاننىڭ ەڭ العاش عارىشقا ۇشقان مەملەكەتتىك تۋى قازىر بايقوڭىر قالاسىنداعى عارىش تاريحى مۋزەيىندە ساقتالىپ تۇر. مۋزەي ديرەكتورى، دوستىق وردەنىنىڭ يەگەرى انتونينا بوعدانوۆا وسى تاريحي ەكسپونات پەن وعان قاتىستى بۇكىل قۇجاتتى كوزىنىڭ قاراشىعىنداي ساقتايتىنىن ايتتى. سول جىلدارى بايقوڭىر عارىش ايلاعىندا تۇراتىن بۇكىل قازاقستاندىقتار ءۇشىن بۇل رۋح كوتەرەر دۇنيە بولعان ەدى، دەيدى مۋزەي ديرەكتورى.
ال، جالپى، عارىشقا قازاقستاننىڭ تۋىن الىپ بارعان تۇڭعىش قازاق، ول - تالعات مۇسابايەۆ. 1194، 1998 جانە 2001 -جىلدارى ءۇش رەتتە دە ول عارىشقا قازاقستاننىڭ كوك تۋىن، ءبىر ۋىس قازاق توپىراعىن جانە قاسيەتتى قۇران كىتابىن الىپ بارعان.
اۆتور: كەنجەكەي توقتامۇرات قىزى
