جىنىسىن اۋىستىرعان ەركەكتى قۇقىق قورعاۋ ورگاندارى قايدا قامارىن بىلمەي وتىر
سەبەبى تۇزەۋ كولونياسىنا ترانسسەكسۋال - بۇرىن ەر ادام بولىپ، كەيىن جىنىسىن اۋىستىرعان 26 جاستاعى ايەل ءتۇسۋى مۇمكىن، - دەپ جازادى "وتكرىتايا ازيا ونلاين" باسىلىمى.
باسىلىمنىڭ مالىمەتىنشە، 26 جاستاعى حاسان ەسىمدى ادام سىرت كەلبەتىنە قاراعاندا ادەمى، ۇزىن شاشتى. ول تەك قۇجات بويىنشا ەر ادام دەپ كورسەتىلگەن ەكەن. ايتا كەتەيىك، قازىرگى ۋاقىتتا ول اسا اۋىر قىلمىس جاسادى دەگەن كۇدىكپەن تەرگەۋ يزولياتورىنا قامالدى.
«بۇل جاعداي بارلىق قۇقىق قورعاۋ ورگاندارىن، سوت جانە قىلمىستىق-اتقارۋ جۇيەسىندەگىلەردىڭ اياعىنان تىك تۇرعىزادى. ەگەر دە 26 جاستاعى حاسان ايىپتى دەپ تانىلىپ، باس بوستاندىعىنان ايىرىلاتىن بولسا، زاڭگەرلەرگە ونى قاي تۇرمەگە جابۋ كەرەكتىگى جايلى ويلانۋ كەرەك بولادى، ياعني نە ايەلدەرگە ارنالعان، نە ەرلەرگە ارنالعان تۇرمەگە جابۋ تۋرالى شەشىم قابىلدانۋى ءتيىس. ءبىر جاعىنان الىپ قاراسا، رەسمي تۇردە ول ەر ادام بولىپ سانالادى، ال تۇرىنە قاراساڭ، كادىمگى ايەل. داۋسى دا، جىنىس مۇشەلەرى دە ايەلدىكى. وسىعان بايلانىستى قۇقىق قورعاۋ ورگاندارىنىڭ قىزمەتكەرلەرى كۇدىكتىنى قاي جىنىسقا جاتقىزاتىندارىن انىقتاي الماي وتىر. سەبەبى قازاقستاندا وسىعان دەيىن مۇنداي جاعداي بولعان ەمەس»، - دەپ جازادى باسىلىم.
سونداي-اق، جاريالانعان ماتەريالدا وزدەرىنىڭ جىنىستارىن اۋىستىرعان ەكى ەر ادامنىڭ قالاي تانىسقانى جايلى ايتىلادى.
«36 جاستاعى ميحايل ەسىمدى (ول كەزدە ونىڭ ەسىمى ازاليا بولدى) بىرنەشە جىل بۇرىن جىنىسىن اۋىستىرۋ ءۇشىن وتا جاساتقان. ال 26 جاستاعى حاسان ول كەزدە ەندى وتا جاساتايىن دەپ جوسپارلاعان. سودان بىرنەشە اي بۇرىن حاسان دا وتا جاساتىپ، ەر ادامنان ايەلگە اۋىسادى. ەسىمىن دە وزگەرتىپ الادى. وتا جاساتقان سوڭ حاساننىڭ ەسىمى كريستينا دەپ وزگەرتىلەدى»، - دەپ جازادى باسىلىمداعىلار.
قازىرگى ۋاقىتتا الماتى قالالىق ءى ءى د وسى ءىستى تەرگەپ جاتىر. جىنىسىن اۋىستىرعان ايەلگە قاتىستى "اسا ءىرى كولەمدە بوپسالاۋ" بابى بويىنشا سوتقا دەيىنگى تەرگەۋ جۇمىستارى باستالدى. ول 7 جىلدان 15 جىلعا دەيىن باس بوستاندىعىنان ايىرىلۋى مۇمكىن.
Kaz.tengrinews.kz
