ماڭعىستاۋ وبلىسىنان ورتاعاسىرلىق التىن تابىلدى
عالىم پاۆەل پەتروۆتىڭ ايتۋىنشا، بۇل قازىنا انۋشتەگينيد الا اد-دين تەكەش پەن مۇحاممەد يبن تەكەش حورەزمشاحتار اۋلەتىنە تيەسىلى بولۋى مۇمكىن.
ارحەولوگ اندرەي استافيەۆ بۇل اقشانىڭ سوعىلعان ورنى ماڭعىشلاق قالاسى بولۋى مۇمكىن ەكەنىن ايتتى.
ماڭعىستاۋدىڭ ەجەلگى قونىستارىن زەرتتەۋ ازيا ەلدەرى مەن شىعىس ەۋروپا اراسىن جالعاعان ۇلى جىبەك جولىنىڭ سولتۇستىك تارماعىن زەرتتەۋدىڭ باستى قۇراۋشى عىلىمي تاقىرىبى بولىپ تابىلادى.
الايدا، اندرەي استافيەۆتىڭ ايتۋىنشا، بۇل تاقىرىپقا تاريحشىلار مەن ارحەولوگتار اسا ءمان بەرە قويماعان. پاۆەل پەتروۆتىڭ ساراپتامالىق قورىتىندىسى بويىنشا، الەمنىڭ ەش مۋزەيىندە مۇنداي ءبىر ورىننان تابىلعان مونەتالار كەشەنى جوق.
اتالعان كەشەندى عالىم قازاقستاننىڭ ۇلتتىق بايلىعى دەپ اتادى. تەكەش حاننىڭ بيلىگى تۇسىندا حورەزم ورتالىق ازيانىڭ قۋاتتى مەملەكەتتەرىنىڭ ءبىرى بولدى. ونىڭ شەكاراسى ارال تەڭىزىنەن پارسى بۇعازىنا دەيىن، شىعىسىندا پاميردەن يران تاۋلى ولكەسىنە دەيىن سوزىلدى.
تەكەش بيلىك ەتكەن جىلدارى حورەزم اۋماعى ەكى ەسە ۇلعايعان. ودان بولەك، تەكەش نەگىزىن قالاعان كىتاپحانا تۋرالى دا مالىمەتتەر ساقتالعان. تەكەش حورەزمشاح قايتىس بولعان سوڭ، تاققا ونىڭ كىشى ۇلى الا اد-دين مۇحاممەد وتىرىپ، حورەزم اۋماعىن ودان ءارى كەڭەيتتى.
