ۇلتتىق ءبىرىڭعاي تەستىلەۋدە ءبىر سۇراقتان ەكى ۇپاي الۋعا بولادى - ءبىلىم جانە عىلىم ءمينيسترى

ال جوعارى وقۋ ورنىنا ءتۇسۋ ءۇشىن ءبىرىڭعاي ۇلتتىق تەستىلەۋدى تاپسىرۋ قاجەت، دەپ حابارلايدى قازاقپارات ءتىلشىسى.

 ءمينيستردىڭ ايتۋىنشا، مەكتەپتى بىتىرگەن كەزدەگى ەمتيحان بەس ءپان بويىنشا وتكىزىلەدى. سونىڭ ىشىندە تورتەۋى مىندەتتى، بىرەۋى وقۋشىنىڭ تاڭداۋىنا قاراي قابىلدانادى.

 «بۇگىندە بارلىق مەكتەپتەردە ونداي ەمتيحاندار بار. ونى ءبىرىڭعاي ۇلتتىق تەستىلەۋگە بارماعاندار تاپسىرىپ ءجۇر. سوندىقتان ەشقانداي وزگەرىستەر جوق. ءبىر جاڭالىق، بۇعان دەيىن ەمتيحان سۇراقتارىن وبلىستىق ءبىلىم بەرۋ باسقارمالارى دايىنداسا، ەندى ەكى ءپان بويىنشا تەست تاپسىرمالارىن ۇلتتىق تەست ورتالىعى ازىرلەيتىن بولادى. نەگىزى، تەست سۇراقتارى دايىن. سوندىقتان مەكتەپتەردە ول سۇراقتاردى سىناقتان وتكىزۋگە بولادى»، - دەيدى ە. ساعاديەۆ.

 سونداي- اق، ۇلتتىق ءبىرىڭعاي تەستىلەۋدىڭ جاڭا فورماتىنا سايكەس، «التىن بەلگى» اتاعىن مەكتەپتەردىڭ وزدەرى راستايدى. ونى ۇلتتىق ءبىرىڭعاي تەستىلەۋ كەزىندە دالەلدەۋدىڭ قاجەتى جوق. «ال ۇلتتىق ءبىرىڭعاي تەستىلەۋدىڭ ءوزى جوعارى وقۋ ورنىنا ءتۇسۋ جانە مەملەكەتتىك گرانتتاردى تاراتۋ ءۇشىن وتكىزىلەدى. تەستىلەۋدىڭ فورماتى دا وزگەرىپ وتىر. بۇعان دەيىن بەس ءپان بويىنشا 125 سۇراق بولعان. سونىڭ ىشىندە تەك ءتورت ءپاننىڭ 100 جاۋابى عانا ەسكەرىلسە، جاڭا فورمات بويىنشا 120 سۇراق بولادى. بارلىعى ەسكەرىلەدى. ەڭ جوعارى ۇپاي سانى - 140. سەبەبى كەيبىر سۇراقتار بويىنشا ەكى ۇپاي الۋعا مۇمكىندىك بار. ءسويتىپ، ۇلتتىق ءبىرىڭعاي تەستىلەۋ بىرتە- بىرتە SIT- گە (System Integration Test) اۋىسىپ وتىر. تەستىلەۋ كەزىندە ءۇش مىندەتتى جانە ەكى سالالىق پاندەر بولادى»، - دەپ اتاپ كورسەتتى مينيستر.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى