نۇرسۇلتان نازاربايەۆ جەرگىلىكتى سوتتار جۇمىسىن سىنعا الدى
«وكىنىشكە قاراي، تاجىريبە جۇزىندە ادىلدىكتى ىزدەگەن ءبىزدىڭ ازاماتتار جوعارى سوت ينستانسياسىنا نەمەسە پروكۋراتۋراعا جۇگىنۋگە ءماجبۇر. تەك اعىمداعى جىلى ازاماتتىق ىستەر بويىنشا پروكۋراتۋرانىڭ نارازىلىعى تۇرعىسىندا جوعارعى سوت تومەن ساتىداعى سوتتاردىڭ 63 شەشىمىن قايتا قارادى. دەمەك، ءبىز بارلىق قۇقىقتاردى بەرىپ، بارلىق قاجەتتىلىكپەن قامتاماسىز ەتىلگەن تومەن ساتىداعى سوتتار وزدەرىنىڭ قىزمەتىن ورىنداماي وتىر»، - دەدى پرەزيدەنت استانادا باستالعان قازاقستان رەسپۋبليكاسى سۋديالارىنىڭ VII سەزىندە.
وسى ورايدا مەملەكەت باسشىسى بۇل كەمشىلىكتەر باستالعان رەفورمالاردىڭ ءالى دە سوڭىنا دەيىن جەتكىزىلمەگەنىن بايقاتىپ وتىرعانىن ايتتى. ەلباسىنىڭ پايىمىنشا، سوت قىزمەتىن جاقسارتۋ مەن بەدەلىن ارتتىرۋ بويىنشا جۇيەلى تۇردە كۇندەلىكتى كوپ ەڭبەكتى تالاپ ەتەتىن جۇمىس قاجەت. «ازاماتتار تاراپىنان الاڭداۋشىلىق ءۇشىن سەبەپ بار. اسىرەسە، بۇل كەيبىر سۋديالار بۇزۋشىلىقتارعا جول بەرىپ جاتقانىدا وزەكتى. تەك اعىمداعى جىلى تارتىپتىك تۇرعىدا 32 سۋديا جازالانىپ، تاعى ەكەۋى جاعىمسىز ۋاجدەر بويىنشا قىزمەتىنەن بوساتىلدى. بۇل كورسەتكىش بۇرىنعا قاراعاندا تومەن بولۋى مۇمكىن، الايدا وسى جاعداي جۇرتشىلىقتى جۇباتپايدى»، - دەدى ن. نازاربايەۆ.
اۆتور: رۋسلان عابباسوۆ
