قازاقستان عارىش سالاسىندا قانداي مەملەكەتتەرمەن ارىپتەستىك ورناتقان
بۇل تۋرالى بۇگىن ق ر قورعانىس جانە اۋە عارىش ءمينيسترى بەيبىت اتامقۇلوۆ ءمالىم ەتتى، دەپ حابارلايدى قازاقپارات.
«قازاقستان بۇگىندە عارىش تەحنيكاسى مەن تەحنولوگيالارىن شىعارۋدا الەمدىك كوشباسشى بولىپ تابىلاتىن ەلدەرمەن حالىقارالىق ارىپتەستىكتى ءساتتى جۇزەگە اسىرۋدا. ولار: رەسەي فەدەراتسياسى، فرانسيا، گەرمانيا، قىتاي، ءۇندىستان، ۇلى بريتانيا، يتاليا، جاپونيا، وڭتۇستىك كورەيا، يزرايل، تايلاند، ساۋد ارابيا، ب ا ءا، شۆەتسيا، نيدەرلاندى جانە ت م د مەملەكەتتەرى. جەرسەرىكتەر مەن بايلانىس جۇيەلەرى رەسەيلىكتەرمەن بىرگە جاسالسا، جەردى ورتا جانە جوعارى دەڭگەيدە قاشىقتىقتان زوندتاۋ تەحنولوگيالارى ەۋروپانىڭ ەڭ ۇزدىك كومپانيالارىنىڭ ءبىرى - «Airbus Defence and Space» كومپانياسىمەن بىرگە قۇرىلدى»، - دەدى اتامقۇلوۆ. «قازاقستانداعى عارىش كۇندەرى-2016» اتتى حالىقارالىق سەميناردا. سونىمەن قاتار ول ەلىمىزدە عارىش اپپاراتتارىن سىناۋ جانە قۇراستىرۋ كەشەنىنىڭ قۇرىلىسى جۇرگىزىلىپ جاتقاندىعىن ەسكە سالدى. عارىش سالاسىنداعى عىلىمي زەرتتەۋ جۇمىستارى دا قارقىندى قولعا الىنىپ وتىر.
«قازاقستانعا مۇراعا قالعان بىرەگەي جوبالاردىڭ ءبىرى - «بايقوڭىر» ەكەنى داۋسىز. ول - ءجۇز مىڭداعان قۇرىلىسشى، ينجەنەر، اسكەري مامان مەن قۇراستىرۋشىنىڭ ەڭبەگى. مەملەكەت باسشىسىنىڭ تاپسىرماسى بويىنشا، كەلەر ۇرپاق ءۇشىن بەيبىت عارىش سالاسىنىڭ دامۋى جولىندا اتالمىش كەشەندى ساقتاپ جانە ارى قاراي دامىتۋ قاجەت. ستراتەگيالىق ارىپتەسىمىز - رەسەي فەدەراتسياسىمەن بىرگە قازاقستان ۇلتتىق «بايتەرەك» زىمىران كەشەنىن قۇرۋ جۇمىستارىن باستادى»، - دەپ اتاپ ءوتتى مينيستر.
«قازىرگى ۋاقىتتا ازيالىق مەملەكەتتەر عارىش تەحنولوگيالارىن بەلسەندى يگەرۋدە. ەۋرازيالىق قۇرلىقتىڭ قاق ورتاسىندا ورنالاسقان قازاقستان عارىش قۇرىلىمدارىمەن ەتەنە بايلانىس ورناتۋ ارقىلى ورتاق ءىس- قيمىلدىڭ كوممۋنيكاتسيالىق الاڭىنا اينالا الادى. قازاقستان عارىش ونىمدەرى مەن قىزمەتتەرىن سەنىمدى جەتكىزۋشى ەل رەتىندە تانىلۋعا ءبىزدىڭ مينيسترلىك بارلىق كۇشتى سالادى»، - دەدى اتامقۇلوۆ.
استاناداعى حالىقارالىق سەمينارعا 20 مەملەكەتتەن 50-گە تارتا عارىش كومپانياسى كەلىپ وتىر.
اۆتور: جاسۇلان جولدىبايەۆ 
