ەسكى كولىكتەردى قابىلداۋ باستالدى

ول ءۇشىن رەسپۋبليكانىڭ 17 قالاسىندا قابىلداۋ بەكەتتەرى اشىلدى، دەپ حابارلايدى قازاقپارات ءتىلشىسى. "و ك م (وندىرۋشىلەردىڭ كەڭەيتىلگەن مىندەتتەمەلەرى) وپەراتورى" ج ش س باسقارۋشى ديرەكتورى رۋستام تەمىربەكوۆتىڭ ايتۋىنشا، جىلدىڭ اياعىنا دەيىن 10 مىڭ كولىكتى قابىلداۋ جوسپارى بار. وعان بيۋدجەتتەن كۆوتا، ياعني ءتيىستى قاراجات ءبولىنىپ وتىر. باعدارلاما اياسىندا 3,5 توننادان اسپايتىن جەڭىل كولىكتەر قابىلدانادى.

ال ۋتيليزاتسيالىق تولەمنىڭ كولەمى اۆتوموبيلدىڭ تەحنيكالىق جاعدايىنا قاراي بەلگىلەنەدى. تولىق كومپلەكتاتسياسىنا 150000 تەڭگە بەرىلسە، ىستەن شىققان كولىكتەر ءۇشىن 48000 تەڭگە تولەنەدى. قازىرگى كەزدە رەسپۋبليكا بويىنشا 17 قالادا قابىلداۋ بەكەتتەرى جاساقتالدى.

«ەسكى كولىكتى تاپسىرۋ ءۇشىن الدىمەن سول ايماقتا كۆوتانىڭ بار جوعىن تەكسەرىپ الۋ قاجەت. سونداي- اق www.avto.recycle.kz سايتىنان كولىكتىڭ قاي ساناتقا جاتاتىنىن بىلۋگە مۇمكىندىك بار. ەندى، ءدال قازىر ءبىز ەسىكتى بولەك، شاناقتى بولەك ەسەپتەپ جاتقان جوقپىز. ازىرشە، ەكى-اق كاتەگوريا بار. ول - 150 جانە 48 مىڭ تەڭگەنىڭ وتەماقىسى»، - دەيدى ر. تەمىربەكوۆ.

ونىڭ سوزىنە قاراعاندا، باعدارلاما اياسىندا ەسكى كولىكتى قابىلداۋ بەكەتىنە دەيىن جەتكىزۋ قىزمەتى قاراستىرىلماعان. سوندىقتان كولىك يەسى ونى ءوز كۇشىمەن الىپ كەلۋى ءتيىس. الايدا كەيبىر جەرلەردە ەسكى كولىكتەردى جيناپ، بىردەن قابىلداۋ بەكەتىنە جەتكىزۋگە نيەتتى كاسىپكەرلەر بار.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى