قانشا قازاقستان ازاماتى قارۋ ۇستاۋ ەرەجەسىن بۇزعانى ءۇشىن جاۋاپكەرشىلىككە تارتىلدى
ال اعىمداعى جىلى بۇرىن ۇرلانعان نەمەسە جوعالعان اتىس قارۋىن پايدالانىپ، قىلمىس جاساۋدىڭ 2 فاكتىسى ورىن الدى. ونىڭ بىرىمەن قاراقىشىلىق شابۋىل جاسالسا، ەكىنشىسىمەن قاساقانا كىسى ولتىرىلگەن. بۇل جايىندا قازاقپاراتتىڭ رەسمي ساۋالىنا وراي ەلىمىزدىڭ ىشكى ىستەر مينيسترلىگىنەن حابارلادى. ۆەدومستۆو اقپاراتىنا قاراعاندا، قازىرگى ۋاقىتتا پارلامەنت ماجىلىسىندە قارالىپ جاتقان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكسترەميزمگە جانە تەرروريزمگە قارسى ءىس- قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا ازاماتتىق جانە قىزمەتتىك قارۋ اينالىمى سالاسىنداعى قۇقىق بۇزۋشىلىقتار ءۇشىن ق ر ا ق ب ك باپتارى بويىنشا جاۋاپكەرشىلىكتى بەلگىلەيتىن ايىپپۇل سانكسيالارىن ۇلعايتۋ بولىگىندە «اكىمشىلىك قۇقىق بۇزۋشىلىق» تۋرالى ق ر كودەكسىنە جانە «جەكەلەگەن قارۋ تۇرلەرىنىڭ اينالىمىنا باقىلاۋ جاساۋ تۋرالى» ق ر زاڭىنا وزگەرتۋلەر مەن تولىقتىرۋلار ەنگىزۋ كوزدەلگەن.
سونىمەن قاتار قارۋ-جاراق دۇكەندەرىنە قويىلاتىن تالاپتاردى كۇشەيتۋ، قارۋ اينالىمى سالاسىندا جۇمىس ىستەيتىن بارلىق زاڭدى تۇلعالاردى ءار توقسان سايىن تەكسەرۋ تۇرىندە ازاماتتىق جانە قىزمەتتىك قارۋ اينالىمىنا مەملەكەتتىك باقىلاۋدىڭ ەرەكشە ءتارتىبىن بەلگىلەۋ بويىنشا ءبىرقاتار نورمالار قاراستىرىلعان.
«ىشكى ىستەر ورگاندارىنىڭ ازاماتتىق جانە قىزمەتتىك قارۋ اينالىمى سالاسىنداعى باقىلاۋ جونىندەگى بولىمشەلەرىنىڭ قىزمەتىن ۇيىمداستىرۋ تۋرالى نۇسقاۋلىققا سايكەس ازاماتتىق قارۋ يەلەرىن تۇرعىلىقتى مەكەن جايى بويىنشا تەكسەرۋ جىلىنا كەمىندە ءبىر رەت جۇرگىزىلەدى. سونىمەن قاتار ءى ءى د-نىڭ جەدەل الدىن الۋ ءىس- شارالارىن وتكىزۋ كەزەڭىندە دە تەكسەرۋ ۇيىمداستىرۋ تۇراقتى تۇردە قولعا الىنادى. اعىمداعى جىلدىڭ 10 ايىندا جۇرگىزىلگەن ءىس- شارالار بارىسىندا قارۋدىڭ ساقتالۋ جاي- كۇيىن بۇزان 7575 فاكتى جانە قارۋدى تىركەۋ جانە قايتا تىركەۋدى بۇزعان 6124 فاكتى انىقتالىپ، اكىمشىلىك جاۋاپكەرشىلىككە 13699 ازاماتتىق قارۋ يەلەرى تارتىلدى»، - دەيدى مينيسترلىكتەن.
اۆتور: مارلان جيەمباي
