انكارادا قازاق ادەبيەتى ورتالىعى اشىلدى
بۇل ورتالىق - قازاقستان مەن تۇركيا اراسىنداعى مادەني- رۋحاني بايلانىستاردىڭ جارقىن ۇلگىسى بولدى، دەپ حابارلايدى قازاقپارات رەسپۋبليكالىق «ەگەمەن قازاقستان» باسىلىمىنا سىلتەمە جاساپ.
ورتالىقتىڭ اشىلۋ سالتاناتىنا تۇركيا ۇلتتىق كىتاپحاناسىنىڭ باسشىسى ءزۇلفي تومان، قازاقستان رەسپۋبليكاسى ۇلتتىق كىتاپحاناسىنىڭ ديرەكتورى جانات سەيدۋمانوۆ، قازاقستان رەسپۋبليكاسى ۇلتتىق اكادەميالىق كىتاپحاناسى سيرەك كىتاپتار جانە قولجازبالار قىزمەتىنىڭ جەتەكشىسى ءاليا قوجابەكوۆا جانە وسى كىتاپحانانىڭ ونەر ادەبيەتتەرى سەكتورىنىڭ جەتەكشىسى ءالفيا ءىلياسوۆا، سونداي-اق قازاقستان مەن تۇركيانىڭ زيالى قاۋىم وكىلدەرى، سول ەلدە ءبىلىم الىپ جاتقان قازاقستاندىق ستۋدەنتتەر قاتىستى.
ورتالىقتا قازاقستان پرەزيدەنتى نۇرسۇلتان نازاربايەۆتىڭ كىتاپتارى، كورنەكتى جازۋشىلار ءىلياس ەسەنبەرليننىڭ، ءابىش كەكىلبايەۆتىڭ، بەلگىلى تۇركىتانۋشى- عالىم الەكساندر گاركاۆەتستىڭ جانە باسقالاردىڭ ەڭبەكتەرى قويىلعان. ورتالىقتىڭ اشىلۋ سالتاناتىنا قاتىسۋشىلاردىڭ ايتۋىنشا، وسى كىتاپتاردىڭ ارقاسىندا تۇرىك باۋىرلار قازاقستاننىڭ ەكونوميكاسى، ساياساتى، سونداي-اق قازاق حالقىنىڭ باي مادەنيەتى مەن ۇلتتىق قۇندىلىقتارى تۋرالى تەرەڭ تانىپ بىلەتىن بولادى. جيىن بارىسىندا تۇركيا ۇلتتىق كىتاپحاناسىنىڭ باسشىسى ءزۇلفي تومان تۇركيالىق وقىرماندارعا، سونىمەن قاتار زەرتتەۋشىلەرگە قازاقستاننان ارنايى جەتكىزىلگەن كىتاپتار نەگىزىندە اشىلىپ وتىرعان جاڭا ورتالىقتىڭ پايداسى زور ەكەنىن ايتتى.
قازاقستان رەسپۋبليكاسى ۇلتتىق اكادەميالىق كىتاپحاناسى سيرەك كىتاپتار جانە قولجازبالار قىزمەتىنىڭ جەتەكشىسى ءاليا قوجابەكوۆا ءزۇلفي تومان مىرزاعا قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلىنىڭ تۇركيا ۇلتتىق كىتاپحاناسىن 70 جىلدىق مەرەيتويىمەن قۇتتىقتاۋ حاتىن جەتكىزدى.
«بۇل تۇركيا ۇلتتىق كىتاپحاناسىنىڭ تاريحىندا عانا ەمەس، كۇللى الەم كىتاپحانالارىنىڭ قاۋىمداستىعى ءۇشىن دە ەرەكشە ورىن الاتىن وقيعا بولىپ تابىلادى. ۇلتتىق كىتاپحانا - تۇرىك رەسپۋبليكاسىنىڭ مادەني جانە عىلىمي ءومىرىنىڭ ورتالىعى رەتىندە تانىمال. ءسىز ۇلتتىق جانە الەمدىك مادەني مۇرانىڭ لايىقتى دەڭگەيدە ساقتالۋىنا، ءبىلىم مەن عىلىمنىڭ دامۋىنا، جالپى ادامزاتتىق قۇندىلىقتاردى دارىپتەۋگە ۇلكەن ۇلەس قوسىپ كەلەسىز. قازاقستان مەن تۇركيانى ورتاق تاريح، مادەنيەت جانە تىلدىك نەگىزدەر بىرىكتىرەدى. بۇل جاڭا يدەيالار مەن جوبالاردى دۇنيەگە اكەلىپ، ولاردى بىرلەسىپ ىسكە اسىرۋعا شابىتتاندىرادى!» دەلىنگەن ۆەدومستۆو باسشىسىنىڭ قۇتتىقتاۋ حاتىندا.
ايتا كەتەيىك، اتالعان قازاق ادەبيەتى مەن مادەنيەتىنىڭ ورتالىعىن قازاقستان رەسپۋبليكاسى مادەنيەت جانە سپورت مينيسترلىگىنىڭ، سونداي-اق تۇركيانىڭ قازاقستانداعى ەلشىلىگىنىڭ قولداۋىمەن قازاقستان ۇلتتىق اكادەميالىق كىتاپحاناسى اشىپ وتىر. بۇل شارا ەل تاۋەلسىزدىگىنىڭ 25 جىلدىعىنا بايلانىستى وتكىزىلدى.
