شىمكەنتتى كوركەيتۋدە انكارانىڭ تاجىريبەسى ۇسىنىلدى
جيىنعا تۇركيا استاناسى - انكارا قالاسى ءمەرىنىڭ ورىنباسارى رامازان كاباساكال مەن و ق و باسقارما باسشىلارى مەن ولاردىڭ ورىنباسارلارى، شىمكەنت قالاسى اكىمى ع. ءابدىراحىموۆ پەن اكىم ورىنباسارلارى جانە ءبولىم باسشىلارى قاتىستى، دەپ حابارلايدى قازاقپارات وبلىس اكىمدىگىنىڭ باسپا ءسوز قىزمەتىنە سىلتەمە جاساپ.
وتىرىستا شىمكەنت شاھارىنىڭ زامان تالابىنا ساي كورىكتى بولۋى ءۇشىن الەمنىڭ الدىڭعى قاتارلى قالالارىمەن تاجىريبە الماسۋ ماڭىزدى ەكەندىگىنە توقتالعان ءوڭىر باسشىسى شىمكەنتكە ارنايى ساپارمەن كەلگەن كاباساكالدى وسى سەمينارعا ءوز تاجىريبەسىمەن ءبولىسۋ ءۇشىن ارنايى شاقىرىپتى.
ۇزاق جىلدار انكارانىڭ مەرياسىندا قىزمەت اتقارعان تاجىريبەسى مول قوناق تۇركيا استاناسىنىڭ كەمەلدەنگەن كەزەڭى جونىندە سەمينارعا قاتىسۋشىلار الدىندا بايانداما جاسادى. ءتورت مىڭ جىلدىق تاريحى بار انادولى ەلىنىڭ استاناسى سوڭعى شيرەك عاسىردا الەمدەگى دامۋى ەرەكشە قارقىن العان قالالار قاتارىندا.
انكارانىڭ 1923 -جىلى 5 مىڭنان استام عانا تۇرعىنى بولسا قازىرگى تاڭدا، ونداعى حالىق سانى 5,5 ميلليونعا جەتكەنى تەكتەن-تەك ەمەس. سەميناردا انكارا مۋنيتسيپاليتەت مەرىنىڭ ورىنباسارى اتالعان قالانى الەمنىڭ وزىق شاھارلارىنىڭ قاتارىنا قوسۋداعى تاريحىن باياندادى. ەرتەرەكتە بەيبەرەكەت، جوسپارسىز سالىنعان ۇيلەردى تۇرعىندارمەن كەلىسىم جۇرگىزە وتىرىپ، ورنىنا كوپقاباتتى تۇرعىن ۇيلەر تۇرعىزۋ جوباسىنىڭ قالاي جۇزەگە اسقانىن ارنايى سىزبا كەستەلەرى ارقىلى تۇسىندىرگەن كاباساكال جوبانىڭ شىعىنسىز ءارى بارلىق جاعىنان ءتيىمدى بولعانىن جەتكىزدى. ماسەلەن يەلىگىندە 330 شارشى مەتر جەرى بار جانۇياعا سول اۋماقتا سالىنعان كوپقاباتتى ءزاۋلىم ۇيدەن جەر تەلىمى ەسەبىنەن 80 شارشى مەتر پاتەر بەرىلگەن.
وسى ءتارتىپ بويىنشا 416 شارشى مەتر جەرى بارلارعا 100 شارشى مەتر، ال، 500 شارشى مەتر جەرى بارلارعا 120 شارشى مەتر پاتەرلەر ۇلەستىرىلگەن. پاتەرىنىڭ كولەمىن كەڭەيتكىسى كەلەتىندەردەن قوسىمشا قارجى تالاپ ەتىلگەن.
كوپقاباتتى تۇرعىن ءۇي اينالاسىن اباتتاندىرۋ، جول سالۋ، ياعني بۇكىل ينفراقۇرىلىمدىق جۇمىستاردىڭ بارلىعىن مۋنيتسيپاليتەت ءوز موينىنا العان. ال، سايلى ايماقتاردا ورنالاسقان اۋدانداردا جاساندى كولشىكتەر سالىنىپ، كوگالداندىرۋ ارقىلى زاماناۋي ساياباقتارعا اينالدىرۋ جۇيەسى دە ءوزىنىڭ وڭ جەمىسىن بەرگەن. تۋريستەردىڭ مولىنان كەلىپ، كورىكتى قالانى ەركىن ارالاۋى ءۇشىن اينالما جولدار جاسالىپ، كولىك كەپتەلىسى كوپ ورىن الاتىن اۋدانداردا جولدار كەڭەيتىلىپ، كوپىرلەر سالۋ جۇيەسى دە وڭتايلى جۇزەگە اسىرىلعان. ماسەلەن، قالاداعى سالىنۋى ءتيىس ءۇش دەڭگەيلى ۇلكەن كوپىر 35 كۇن ىشىندە پايدالانۋعا بەرىلىپتى. جۇمىستىڭ جۇيەلى ءارى تەز جۇرگىزىلۋى قالا حالقىنىڭ قىزىعۋشىلىعىن تۋدىرىپ، ەسكى ۇيلەرىنىڭ جىلدام سۇرىلۋىنە تۇرعىنداردىڭ ءوزى بەلسەنە اتسالىسقان.
وسى جۇيەمەن قالاداعى 55 اۋدان جاڭارتىلعان. اۆتوبۋستار جۇيەلەندىرىلىپ، التى باعىتتى قامتيتىن مەترو سالىنعان. الەۋمەتتىك سالانى دامىتۋعا باعىتتالعان 184 جوبا جۇزەگە اسقان. قازىرگى تاڭدا انكارادا اۋماعى 210 گا بولاتىن 1027 عيماراتتان تۇراتىن الەمدەگى ەڭ ۇلكەن سوڭعى ۇلگىدەگى ديسنەيلەند سالىنىپ جاتىر.
بۇل دا ءوز كەزەگىندە تۋريستەردىڭ ارتۋىنا ءوز سەپتىگىن تيگىزەرى ءسوزسىز دەگەن قالا ءمەرىنىڭ ورىنباسارى، انكارا جىلىنا 10-12 ميلليون تۋريست قابىلداۋعا مۇمكىندىگى بار شاھار ەكەنىن العا تارتتى. وسىلايشا، انكارا مەن شىمكەنت باۋىرلاس قالالار بولعاندىقتان ءبىر- بىرىمەن تاجىريبە الماسۋى كەرەك دەگەن كاباساكال شىمكەنت قالاسىنىڭ ەكونوميكالىق جانە الەۋمەتتىك سالاسىنىڭ دامۋىنا بارىنشا كومەك قولىن سوزۋعا دايىندىعىن مالىمدەدى.
جيىن بارىسىندا قوس قالانىڭ قارىم- قاتىناسىن كۇشەيتە وتىرىپ، انكارانىڭ دامۋ جوسپارىن وڭتۇستىككە دە پايدالانۋ كەرەكتىگىنە توقتالعان وبلىس اكىمى ارنايى دەلەگاتسيا قۇرامىن جاساقتاپ، تاجىريبە الماسۋ ساپارىن ۇيىمداستىرۋ قاجەتتىگىن ايتتى. شىمكەنت قالاسىن دامىتۋداعى وسىناۋ ۇسىنىستاردى وڭدى قابىلداعان قالا اكىمى عابيدوللا ءابدىراحىموۆ ءتيىستى ۇسىنىستار نەگىزىندە بىرلەسە جۇمىس ىستەۋگە دايىن ەكەنىن جەتكىزدى.
