دەپۋتات جاقىپوۆ جەمقورلىقپەن ءىستى بولعان بالاسى ءۇشىن جاۋاپ بەرمەيتىن بولدى

مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ باسشىسى قايرات قوجامجاروۆ وسىلاي دەدى.

بۇل تۋرالى «استانا» ارناسى حابارلايدى.

ءماجىلىس دەپۋتاتى ماۋلەن اشىمبايەۆتىڭ پىكىرىنشە دە، جاقىپوۆتىڭ دەپۋتاتتىق مانداتى مەن ۇلىنا قاتىستى تەرگەۋدى بىرگە قاراۋعا بولمايدى.

«اكەسى بالاسى ءۇشىن جاۋاپتى ەمەس. جالپى مەن ەندى ونداي ناقتى جاعدايلار بولعان كەزدە، ءبىز ءاربىر وسىنداي جاعدايدى جەكە قاراۋىمىز كەرەك دەپ ايتىپ وتىرمىن. تەرگەۋدىڭ ءجۇرۋ بارىسىن قارايىق، ارى قاراي سوت بولادى، سوتتىڭ شەشىمىن كورۋىمىز كەرەك. وسى قىلمىستى جۇزەگە اسىرعان ادام جاس بالا ەمەس، ۇلكەن. بۇل كۇردەلى ماسەلە»، - دەيدى ق ر پارلامەنتى ءماجىلىسىنىڭ دەپۋتاتى، «نۇر وتان» فراكسياسىنىڭ مۇشەسى ماۋلەن اشىمبايەۆ.

ەستەرىڭىزگە سالساق، كۇنى كەشە عانا 28 ميلليون تەڭگە پارا الدى دەگەن كۇدىكپەن «بايتەرەك» ا ق باسقارما ءتوراعاسىنىڭ ورىنباسارى اسلان جاقىپوۆ، مەملەكەتتىك-جەكە مەنشىك ديرەكتسيا دەپارتامەنتىنىڭ باسشىسى باۋىرجان ايتىمبەتوۆ جانە باسقارۋشى ديرەكتورى عازيز ساريەۆ ۇستالدى. ولارعا قىلمىستىق جۇيە قۇرىپ، «نۇرلى جول» باعدارلاماسى اياسىندا جالدامالى باسپانا تۇرعىزۋدا قۇرىلىس كومپانيالارىنا لوببي جاساپ، پارا الدى دەگەن ايىپتار تاعىلىپ وتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى