قازاقستاندا تۇرمىستىق زورلىق- زومبىلىق قۇرباندارىنىڭ قورعالۋى السىرەدى
بۇل تۋرال بۇگىن ق ر پارلامەنتى ماجىلىسىندە قىلمىستىق- پروتسەستىك زاڭنامانى ودان ءارى جاڭعىرتۋ تاقىرىبىنداعى پارلامەنتتىك تىڭداۋدا ق ر باس پروكۋرورى جاقىپ اسانوۆ ءمالىم ەتتى، دەپ حابارلايدى قازاقپارات.
وسى رەتتە ول جاڭا زاڭنامانىڭ كەمشىلىكتەرىنىڭ ءبىرى رەتىندە وتباسىلىق-تۇرمىستىق زورلىق-زومبىلىق سالاسىنداعى ماسەلەگە توقتالدى. «ءبىز بۇل باعىتتا ەڭ ءتيىمدى قادامداردى جاساعىمىز كەلدى. سوققىعا جىعۋ اكىمشىلىك قۇقىق بۇزۋشىلىقتان قىلمىستىق كودەكسكە اۋىستىرىلدى. وسى رەتتە جازانى قاتاڭداتامىز دەپ ويلادىق، الايدا زورلىق- زومبىلىق قۇرباندارىنىڭ قورعالۋى السىرەپ قالدى»، - دەدى باس پروكۋرور.
ءوز كەزەگىندە تىلشىلەرگە بەرگەن سۇحباتىندا ق ر ىشكى ىستەر ءمينيسترى قالمۇحامبەت قاسىموۆ بۇگىندە تۇرمىستىق قىلمىستار بويىنشا تاجىريبە جۇزىندە جاقسى اتقارىلعان كوپتەگەن داعدىلار ماڭىزىن جويىپ العانىن جەتكىزدى. «سەبەبى، وتباسىنداعى سوققىعا جىعۋ، ۇرىس- كەرىس قىلمىستىق تەرىس قىلىققا اۋىستىرىلدى. ياعني، كەز كەلگەن جانجال مەن وقيعا سوت ينستانسيالارىنا كوشىرىلدى. ەندى جابىرلەنۋشى ءوز كۇشىمەن كىنالىنىڭ ايىبىن دالەلدەۋى ءتيىس. پوليتسيا بۇل ماسەلەدە تىسقارى قالىپ قويدى. بۇل رەتتە تۇرمىستىق قىلمىستار، سونىمەن قاتار تۇرمىستىق تۇرعىدا ادام ءولتىرۋ دەڭگەيىنىڭ ءوسىمى ورىن الدى»، - دەدى مينيستر.
وسى ورايدا قاسىموۆ جاڭا زاڭناماعا سايكەس، وتباسىندا جانجالقوي ادامداردى ءۇش ساعاتتان ارتىق ۇستاۋعا بولمايتىنىن اتاپ ءوتتى. «ءۇش ساعاتتىڭ ىشىندە ول ىشىمدىكتەن ايىعىپ تا ۇلگەرمەيدى. بوساتقاننان كەيىن دە ول ۇيىنە بارىپ، جانجالدى جالعاستىرادى. بۇل تۇرعىدا تاجىريبە جۇزىندە كەمشىلىك بار»، - دەدى ق ر ءى ءى م باسشىسى.
اۆتور: رۋسلان عابباسوۆ
