قازاقستاننىڭ قۇندى ارحەولوگيالىق جادىگەرلەرى رەسەيگە زاڭسىز تاسىلۋدا - مۋزەي قىزمەتكەرلەرى
مادەني قۇندىلىقتاردىڭ رۇقسات قۇجاتىنسىز شەكارا اسقانىن ق ر قارجى مينيسترلىگى مەملەكتتىك كىرىستەر كوميتەتى دە جوققا شىعارمايدى. مۇنداي پىكىردى مادەنيەت جانە سپورت مينيسترلىگىندە «مادەنيەت تۋرالى» ق ر زاڭىنا وزگەرىستەر ەنگىزۋ قاجەتتىگىن تالقىلاۋ بارىسىندا شىعىس قازاقستان وبلىستىق ەتنوگرافيالىق-ساۋلەت جانە تابيعي-لاندشافتىق مۇراجاي-قورىعىنىڭ ديرەكتورى نيكولاي زايتسيەۆ ءبىلدىردى.
«سيرەك كەزدەسەتىن بۇيىمدار دۇكەنى جان-جاقتان اشىلىپ جاتىر. ولارعا جادىگەرلەردى ساۋدالاۋعا كىم رۇقسات بەردى؟ وندا اسىل تاستاردان باستاپ، ءۇي شارۋاسىنا قاجەتتى كەرەك-جاراقتارعا دەيىن ءبارىن كەزدەستىرۋگە بولادى. ءبىز تاۋاردىڭ سورەگە قالاي تاپ بولعانىن انىقتاۋعا تىرىسامىز. كوپ جاعدايدا تاۋار ارحەولوگيالىق بۇيىمدار بولىپ شىعادى، ياعني بۇل «زاڭسىز» ارحەولوگيا.
قازىر كەز كەلگەن جەردەن مەتالل ىزدەگىش ساتىپ الۋعا بولادى، ال قورعانداردىڭ باسىندا ەشقانداي كۇزەتشى جوق. تاپقان ولجاسىنىڭ ءبارىن نوۆوسىبىر، بارناۋىلعا تاسيدى. بۇل تاقىرىپتى بىرنەشە رەت كوتەردىك، دۇڭگىرشەكتەردى جابىڭدار دەدىك. شەكارا اشىق، بارلىق قىزمەت ءبىر توبە مادەني قۇندى زاتتاردى ەش قيىندىقسىز الىپ وتۋگە جول بەرىپ وتىر»، - دەدى ول.
وسىعان بايلانىستى اتالعان تاۋارلاردى قازاقستان-رەسەي شەكاراسىنان وتكىزۋ رەتىن ءبىلۋ ءۇشىن قازاقپارات ءتىلشىسى كەدەن قىزمەتىنە حابارلاستى. ق ر زاڭدارى مادەني باعالى زاتتاردى رەسپۋبليكا اۋماعىنان شىعارۋعا تىيىم سالادى.
تەك كورمە نەمەسە قالپىنا كەلتىرۋ ءۇشىن، ليتسەنزيا مەن رۇقسات قۇجاتىن كورسەتكەندە عانا ۋاقىتشا شىعارۋعا رۇقسات بەرەدى. ال وتكەن جىلدىڭ قاڭتار ايىنان بەرى قازاقستاندىق مەنشىك يەلەرىنە جەرگىلىكتى ورگانداردىڭ كەلىسىمىمەن بۇيىمداردى ۋاقىتشا شىعاراتىن مۇمكىندىك بەرىلدى. سونىمەن بىرگە، مادەني باعالى بۇيىمدار قوزعالىسى ە ا ە و كەدەندىك اۋماعى اياسىندا رەتتەلەدى.
ەۋرازەق مەملەكەتارالىق كەڭەسىنىڭ شەشىمىمەن قازاقستان مەن رەسەي جانە كەدەندىك وداقتىڭ ىشكى شەكارالارى مەن كەدەندىك بەكەتتەردەگى كەدەندىك باقىلاۋ جويىلدى. جانە ق ر مەن وداق اۋماعىنان شىعارۋ ليتسەنزياسىن بەرۋ نورماسى دا بىرىزدىلەنبەگەن. «ق ر «مادەنيەت تۋرالى» زاڭى مەن مادەنيەت جانە سپورت ءمينيسترىنىڭ «مادەني قۇندىلىقتاردى ۋاقىتشا اكەتۋ قۇقىعىنا كۋالىك بەرۋ قاعيدالارىن بەكىتۋ تۋرالى» بۇيرىعى جانە 2015-جىلى 21- ساۋىردە ەۋرازيا ەكونوميكالىق كوميسسياسىنىڭ القاسى قابىلداعان «تاريفتىك ەمەس رەتتەۋ شارالارى تۋرالى» قاراردىڭ نورمالارى اراسىنداعى قايشىلىقتار بولعاندىقتان، مادەني قۇندىلىقتاردى رۇقسات قۇجاتىنسىز شىعارۋ مۇمكىندىگى بار»، - دەلىنگەن ق ر قارجى مينيسترلىگى مەملەكەتتىك كىرىستەر كوميتەتىنىڭ اگەنتتىكتىڭ رەسمي ساۋالىنا بەرگەن جاۋابىندا. جانە 2015-جىلدان بۇگىنگە دەيىن ەكونوميكالىق كونتراباندا فاكتىسى بويىنشا ەشقانداي قىلمىستىق ءىس تىركەلمەگەن.
