الاتاۋداعى مۇز ۇڭگىردى بىلەسىڭ بە - فوتو
باعىت جيى اتالا بەرمەيتىن قارا سارقىراماعا قاراي جول تارتتى.
قىزىققا تولى مەكەنگە «شىمبۇلاق» تاۋ-شاڭعى كۋرورتىنان قوزعالىپ، تۇيىقسۋ لاگەرىنەن جوعارعى كوتەرىلۋ ارقىلى، بار بولعانى 30 مينۋتتا جەتۋگە بولادى.
شاتقال سىلدىرلاپ اققان - قارا سارقىراماسىمەن ەرەكشەلەنەدى. ونى تەك كوكتەمنىڭ سوڭى مەن جازدىڭ باس كەزىندە كورۋگە بولادى. توڭىرەگىندەگى قارا جارتاستارعا قاراي وسى سارقىرامانى «قارا» («چەرنىي» سارقىراماسى) دەپ اتاپ كەتكەن.
قىستاعى قار كوشكىنىنىڭ قالدىقتارى تەرەڭ جىرادا جازدىڭ ورتاسىنا دەيىن جاتادى. ال ونىڭ كۇشتىلىگى قاردىڭ قانشالىقتى تەز ەرۋى مەن اۋا تەمپەراتۋراسىنا بايلانىستى. ونىڭ كۇركىرەپ اققان كورىكتى كورىنىسىن تەك مامىردىڭ سوڭى مەن ماۋسىمنىڭ باس كەزىندەگى ىستىقتاردا عانا كورۋگە بولادى.
تەرەڭ جارتاستىڭ تۇبىندە جاتقان بۇل سارقىراما سىرت قاراعاندا تەرەڭ قۇدىق سياقتانىپ كورىنەدى. سارقىرامادان كوتەرىلگەن ىلعال تامشىلار توڭىرەكتە وزگەشە ميكروكليمات ورناتادى. ءبىراق بىرتىندەپ سۋ ازايىپ، سارقىراما كەلەسى جىلعا دەيىن جوق بوپ كەتەدى. ال قاراشا تۇسە تاۋداعى سۋىق كليمات سارقىرامانى توڭدىرىپ، اينالاسى مۇز قۇرسانادى.
جارتاستى شاتقالعا جەتكەندە سارقىراما ماڭىنداعى شاعىن مۇز ۇڭگىرىنە كەزىكتىك. تابيعاتتىڭ جاساعان ەرەكشە ءمۇسىنى مە دەرسىز؟ مۇز ۇڭگىرىنىڭ استىنان جوعارىعا قارايتىن بولساڭىز، كەرتىلگەن مۇز جاقتاۋلارىن كورەسىز. بەينە ءبىر ەرتەگى الەمىنە تاپ بولعانداي سەزىنەسىز. تاۋ عالاماتى.
ۇڭگىردىڭ ءبىر بۇرىشىنان توڭىرەكتى قورشاعان جارتاستارعان ويماقتاي عانا كورىنگەن كوك اسپاندى كورەسىز، ال كۇزگى سۋىققا ەرتە قاتقان سارقىراما مۇز داۋىرىندەي اسەرگە بولەيدى. شاماسى بۇل جەردە ۇزاق ۋاقىتتار بۇرىن جويقىن قار كوشكىنى ورىن الىپ، جاز مەزىگىلى جەتكەندە كۇركىرەپ اققان سارقىراما سۋىنان وسىنداي عاجايىپ ورىن العان سەكىلدى. ال ءبىز تىلسىمعا تولى ۇڭگىردەن وسىنداي اسەرلەرمەن قيماي تاراستىق.
دوسجان بالابەك ۇلى،
سۋرەتتەردى تۇسىرگەن اۆتور
«ايقىن»
