قىرعىز باسشىسىنىڭ اتىن جامىلىپ ۋكراينا پرەزيدەنتىن الداپ كەتتى

قوس ەلدىڭ سىرتقى ىستەر مينيسترلەرى بۇل ماسەلەنى زەرتتەپ جاتقانىنا ون شاقتى كۇننىڭ ءجۇزى وتسە دە، ايىپتىنى اتاي المادى. دەگەنمەن تۇتقانىڭ ار جاعىنداعى «اتامبايەۆتى» الاتاۋدىڭ توڭىرەگىنەن ىزدەپ جۇرگەندەردىڭ تىرلىگى بوس سەندەلىسكە ۇقسايتىنداي.

جاقىندا عانا ۋكراينالىق ب ا ق پەتر پوروشەنكونىڭ الماسبەك اتامبايەۆپەن تەلەفون ارقىلى تىلدەسكەنى جونىندە مالىمەت تاراتقان. ەڭ قىزىعى، ولار بۇل اقپاراتتى پرەزيدەنتتىڭ باسپا ءسوز قىزمەتىنە سىلتەمە جاساي وتىرىپ، جاريالاعان ەدى. الايدا ا. اتامبايەۆتىڭ تەلەفونداعى اڭگىمەگە قاتىسى جوق ەكەنى كەيىن بەلگىلى بولدى. بۇل جونىندە قىرعىزستان پرەزيدەنتى اپپاراتى جەتەكشىسىنىڭ ورىنباسارى ساپار ىسقاقوۆ ارنايى مالىمدەمە جاساپ، قوڭىراۋدىڭ قىرعىزستان اۋماعىنان شالىنعانىن، وسىعان وراي قىرعىزستان مەن ۋكراينانىڭ ارنايى قىزمەتى تەكسەرۋ جۇرگىزىپ جاتقانىن حابارلاعان بولاتىن.

ال پوروشەنكو مەن «اتامبايەۆ» نە جونىندە سويلەسكەن؟ مۇنى الدانعان تاراپتىڭ العاشقى اقپاراتتارىنان تابامىز. وندا «ۋكراينا تاۋارلارىنىڭ اعىنىنا رەسەيدىڭ شەكتەۋ ەنگىزۋىنە بايلانىستى ۋكراينا ءونىمىن قىرعىزستانعا جەتكىزۋدە تۋىنداعان قيىندىقتاردى جويۋ، سونداي- اق، تاۋار تاسىمالىنىڭ بالاما جولدارىن ىزدەستىرۋ» ماسەلەلەرى تالقىلانعان. دەگەنمەن قىرعىز تاراپى قوس پرەزيدەنتتىڭ تەلەفون ارقىلى تىلدەسۋىن جوققا شىعارعاننان كەيىن ۋكراينا پرەزيدەنتىنىڭ رەسمي سايتىنداعى اقپارات الىنىپ تاستالدى.

سونىمەن پ. پوروشەنكونى الداعان كىم؟ مۇنى ەكەۋارا اڭگىمەنىڭ تاقىرىبىنا قاراپ بولجاۋعا بولادى. «رەسەيدىڭ كەدەرگىسىنەن كەيىن قىرعىزستانعا كەلەتىن ۋكراينا تاۋارلارىنىڭ ازايۋىن تالقىلاۋ» - پوروشەنكونىڭ «تامىرىن باسىپ» كورۋ ويىنىنا ۇقسايدى. بۇل - پ. پوروشەنكومەن ازىلدەسكەن ادام رەسەيلىك ەمەس پە ەكەن دەگەن ويعا جەتەلەيتىنى انىق.

ەكىنشىدەن، ءبىرقاتار ۋكراينا باسپا ءسوزى «مەملەكەت باسشىسى «لەكسۋس» دەگەن اتپەن تانىمال پرانكەرگە (الەكسەي ستولياروۆ) الدانۋى مۇمكىن» دەپ جاتىر. نەگە؟ سەبەبى ول پوروشەنكو مەن «اتامبايەۆتىڭ» تەلەفونمەن سويلەسۋى جونىندەگى اڭگىمە قىزۋ تالقىعا ءتۇسىپ جاتقاندا الەۋمەتتىك جەلىدەگى پاراقشاسىنا بىلاي دەپ جازعان: «مۇنداي مامان قىرعىزستاندا دا بار ما ەكەن؟».

ارينە، رەسەيلىك پرانكەردىڭ كۇدىككە ىلىنگەنىنە وسى ءبىراۋىز ءسوزى عانا ىلىك ەمەس. «لەكسۋس» ارىپتەسى «ۆوۆان» (ۆلاديمير كۋزنەتسوۆ) ەكەۋى جىل باسىندا تۇركيا پرەزيدەنتى ر. ەردوعاندى دا الداپ سوققان. قىزىعى، ولار پ. پوروشەنكو مەن ا. ياتسەنيۋكتىڭ اتىنان سويلەسكەن. اڭگىمەدە ر. ەردوعانعا تۇركيا قارۋلى كۇشتەرىنىڭ رەسەيلىك اسكەري ۇشاقتى اتىپ تۇسىرۋىنە قاتىستى سۇراقتار قويىلعانىن دا ەسكەرىڭىز. كەيىن قىلجاقپاستار تۇركيا باسشىسىمەن سويلەسۋدىڭ وڭايعا تۇسپەگەنىن ايتىپ، سۇحبات بەرگەنى ەسىمىزدە. ال اراداعى اڭگىمەنىڭ قالاي وربىگەنىن ەرىنبەگەن ادام youtube - تان وڭاي تاۋىپ الادى.

ەگەر ۋكراينا باسشىسى دا تۇركيا كوسەمىنىڭ اياعىن قۇشسا، «اتامبايەۆ» پەن پوروشەنكونىڭ اڭگىمەسى كوپ ۇزاماي عالامتوردا جاريالانۋى ابدەن مۇمكىن. جالپى، جوعارىدا اتتارى اتالعان پرانكەرلەر ارەكەتىنىڭ كرەمل ساياساتىمەن ۇشتاسىپ جاتاتىنىن ايتا كەتكەن ابزال. ۋكراينالىق ب ا ق- تىڭ كۇدىگى دە وسى ويمەن ورايلاس. ويتكەنى سوڭعى وقيعادان كىم زارداپ شەكتى؟ ارينە، اتامبايەۆتىڭ ابىرويىنا نۇقسان كەلگەن جوق. كۇلكى بولعان ادام - پ. پوروشەنكو. ال ونىڭ كرەملمەن ارا- قاتىناسىنىڭ قانداي ەكەنىن بۇكىل الەم بىلەدى.

ق. بايان

«جاس الاش» گازەتى. 2016

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى