گاگا سۋدياسى مينيستر مۇحامەدي ۇلى مەن سىدىقوۆا اراسىنداعى داۋعا ءوز پىكىرىن ءبىلدىردى
وسى جيىنعا قاتىسقان حالىقارالىق دارەجەدەگى سۋديا ەكاتەرينا ترەندافيلوۆا قازاقپارات تىلشىسىمەن سۇحباتىندا مادەنيەت جانە سپورت ءمينيسترى ارىستانبەك مۇحامەدي ۇلى مەن ەڭلىك سىدىقوۆانىڭ اراسىنداعى سوت داۋىنا قاتىستى ءوز ويىن ءبىلدىردى.
حالىقارالىق سوتتا ون جىلعا جۋىق ۋاقىت قىزمەت ەتكەن سۋديا ەكاتەرينا ترەندافيلوۆانىڭ ايتۋىنشا، الەمدىك تاجىريبە بويىنشا مينيستر ءوز ابىرويىن قورعاۋ ءۇشىن سوتتىڭ كومەگىنە جۇگىنە الادى. دەگەنمەن، ول ءوزىنىڭ قىزمەت بابىن پايدالانىپ، قارسى جاققا قىسىم جاساسا، قىلمىستىق ءىستىڭ تاعى ءبىر ءوندىرىسىن اشۋ قاجەت. «ەندى، الەمدىك تاجىريبەدە سان الۋان مىسالدار بار. مەن گاگادا پوليتسيا باسشىلارى، ۆيتسە-پرەزيدەنت، ءتىپتى پرەزيدەنتتەردىڭ (سۋدان، كەنيا باسشىلارىنىڭ) ىستەرىن قاراعانمىن. نەگىزى، قانداي دا ءبىر شەنەۋنىك ءوز جۇمىسىنا ادال، ىسكەر ازامات بولسا، بازبىرەۋلەر ونى تاقتان تايدىرۋعا تىرىسۋى ابدەن مۇمكىن. سوندىقتان ول مينيستر قىزمەتىندە جۇرسە دە، اتاق-ابىرويىن ساقتاپ قالۋ ماقساتىندا سوتقا ارىز بەرە الادى. بۇل جەردە سوتتىڭ تورەلىگى ماڭىزدى. سۋديا ەكى ادامعا دا تەڭ قاراسا، ءادىل شەشىم شىعارىلادى. ول مينيستردەن قورىقپاۋى قاجەت. ال سوتقا دەيىن مينيستر اكىمشىلىك رەسۋرستارىن پايدالانىپ، قىسىم كورسەتەتىن بولسا، وندا پروكۋرورلار سول ءۇشىن جاڭادان، باسقا ءبىر قىلمىستىق ءىستى اشۋى ءتيىس»، - دەدى ە. ترەندافيلوۆا قازاقپارات تىلشىسىنە بەرگەن سۇحباتىندا.
ايتا كەتەيىك، ق ر مادەنيەت جانە سپورت ءمينيسترى ارىستانبەك مۇحامەدي ۇلى ءوزىنىڭ ابىرويىنا نۇقسان كەلتىرگەنى ءۇشىن ءارتىس ەڭلىك سىدىقوۆانى سوتقا بەردى. ءمينيستردىڭ قورعاۋشىسى يسكاندەر الىمبايەۆتىڭ ايتۋىنشا، ا. مۇحامەدي ۇلىنىڭ سوتقا ارىز بەرۋى - ونىڭ زاڭدى قۇقىعى. «زاڭدا وزىنە قاتىستى ايىپتاۋلاردى تەرىسكە شىعارۋ شارالارى مەملەكەتتىك قىزمەتشىنىڭ قۇقىعى عانا ەمەس، مىندەتى رەتىندە كورسەتىلگەن. قۇقىقتىق فاكتىلەردىڭ سوتپەن ايقىندالاتىنى بارشاعا ايان. سىدىقوۆا تاراتقان اقپاراتتى ءوز ەركىمەن تەرىسكە شىعارعان جوق، سول سەبەپتى مۇحامەدي ۇلىنا سوتقا جۇگىنۋگە تۋرا كەلدى»، - دەيدى ول.
الايدا ە. سىدىقوۆانىڭ قورعاۋشىسى گۇلنار جۋاسپايەۆانىڭ سوزىنە قاراعاندا، قازىرگى كەزدە مينيستر ءوز قىزمەتىن پايدالانىپ، اكىمشىلىك رەسۋرستارى ارقىلى سوت شەشىمىنە اسەر ەتۋگە تىرىسىپ جاتىر.
«وسى داۋ-داماي باستالعاندا مەن ەرتەسىندە بىردەن ايتتىم، ەگەر ول مينيستر قىزمەتىندە ەڭلىكپەن سوتتاساتىن بولسا، وندا سوت ادىلەتسىز بولادى. قازىردىڭ وزىندە ول قولىندا بار اكىمشىلىك رەسۋرستارىن پايدالانىپ، سوت شەشىمىن ءوز پايداسىنا شەشۋ ماقساتىندا ەڭلىكتىڭ جىگەرىن جاسىتۋعا تىرىسىپ جاتىر. بۇگىندە بەلگىسىز بىرەۋلەر وعان قىسىم جاساپ، ءمينيستردىڭ اتىنا ايتقان سوزدەردەن باس تارتسىن دەيدى»، - دەپ اتاپ كورسەتتى ادۆوكات.
اۆتور: ارمان اسقاروۆ
