بالالار تاۋارلارى قاۋىمداستىعى دەپۋتات باليەۆانىڭ سىنىنا جاۋاپ بەردى

الايدا ول كەزدە حالىق قالاۋلىسى اسىعىپ، باسقا شاراعا كەتىپ قالعان، دەپ حابارلايدى قازاقپارات ءتىلشىسى. «ارينە، زاعيپا ياحيا قىزىنىڭ كەتىپ قالعانى وكىنىشتى-اق. سەبەبى جاڭا عانا ول قازاقستانداعى ويىنشىقتاردىڭ ساپاسى تومەن، ەلىمىزدىڭ كۇل- قوقىس جاشىگىنە اينالعانى تۋرالى قاتتى ايتتى. مەن ونداي پىكىرمەن كەلسىپەيمىن. ءيا، ويىنشىقتاردى زاڭسىز اكەلىپ ساتۋ فاكتىلەرى بار. ونى ەشكىم جوققا شىعارىپ وتىرعان جوق. بۇدان بولەك، بىزدە 50 شارشى مەتردەن از ساۋدا ورىندارىن تەكسەرۋگە رۇقسات جوق. الايدا ءدال سول جەردە زاڭسىز تاۋارلاردى ساتۋ جۇمىسى جۇرگىزىلەدى. بالكىم، دەپۋتات وسىنداي ويىنشىقتار جايىندا ايتقان شىعار. دەگەنمەن، رەسمي دۇكەندەردە بالالار ويىنشىقتارىنىڭ قاۋىپسىزدىگىنە ەرەكشە كوڭىل بولىنەدى. ونداي ساۋدا ورىندارى بار بىزدە. ولارعا كىر كەلتىرۋگە بولمايدى»، - دەپ اتاپ كورسەتتى د. گايدەنرايح.

ايتا كەتەيىك، وتىرىستىڭ باسىندا بالالار قۇقىقتارىن قورعاۋ جونىندەگى ۋاكىل زاعيپا باليەۆا: «قازاقستان ويىنشىقتاردىڭ كۇل- قوقىس جاشىگىنە اينالدى»، - دەپ مالىمدەدى. باليەۆا ءوز قىزمەتىنە شىنداپ كىرىسكەن ءتارىزدى. دەپۋتات بالالاردى ءوز قۇقىقتارىن بىلۋگە، پايدالى جانە زياندى تاماقتى اجىراتۋعا، ءتىپتى Coca-Cola-نى ىشپەۋگە ۇيرەتپەكشى. «سونىمەن، بارلىعىمىز بىرلەسىپ جۇمىس ىستەيتىن بولامىز. ەندى، مەن ەلىمىزدەگى بالالاردىڭ ەكىنشى اناسى بولامىن. بىردەن ايتايىن، مەنىڭ مىنەزىم بار. ەشكىمگە تىنىشتىق بەرمەيمىن»، - دەپ اتاپ كورسەتتى ز. باليەۆا.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى