قازاقستان ويىنشىقتاردىڭ قوقىس جاشىگىنە اينالدى - زاعيپا باليەۆا
بالالار قۇقىقتارىن قورعاۋ جونىندەگى ۋاكىلدىڭ ايتۋىنشا، بۇگىندە وتاندىق كاسىپكەرلەر ەكولوگيالىق تازا ويىنشىقتاردى شىعارۋدى قولعا الۋى قاجەت. ول ءۇشىن مەملەكەتتىك قولداۋ شارالارىن دا جاساعان ءجون.
«ماسەلەن، گەرمانيادا اعاش ويىنشىقتار جاسايدى. سوسىن وتە تازا پلاستماستى قولدانادى. باسقا ويىنشىقتار مۇلدەم جوق. ال ولارعا باربيدى الىپ كەلسە، ونى ءجۇز رەت تەكسەرەدى. وسىدان كەيىن كاسىپكەرلەر مۇلدەم اكەلگىسى كەلمەي قالادى. سول سەبەپتى نەمىستىڭ ويىنشىقتارى ەڭ تازا ءونىم بولىپ سانالادى. نەگە گەرمانيا وسىنى قولعا الا الادى؟ قازاقستان بولسا، ويىنشىقتاردىڭ كۇل- قوقىس الاڭىنا اينالىپ وتىر. نەگە سولاي؟ سەبەبى ءبىز ونداي جاعدايدى ءوزىمىز جاساپ قويدىق. ەندى، وسى جۇمىستى قولعا الۋ قاجەت. كەدەننەن باستاپ، ويىنشىقتاردى شىعارۋشى كومپانيالارعا دەيىنگى تىزبەكتى تەكسەرۋ كەرەك»، - دەدى ز. باليەۆا. وسى ورايدا ول باراحولكالاردا ارنايى رەيدتەردى ءجيى وتكىزىپ، ۋلى ويىنشىقتاردى انىقتاۋدى قولعا الۋدى ۇسىندى. وتىرىس بارىسىندا بەينەبايلانىس ارقىلى شىققان ءبىر كاسىپكەر نارەستەگە ارنالعان كيىم- كەشەكتى شىعارىپ جاتقانىن، ءبىراق اۋىلدا بالا كيىمدەرىن كوپ جاعدايدا ىرىمداپ قولدان- قولعا بەرىپ جۇرەتىنىن جەتكىزدى. سول سەبەپتى تاۋارلار وتپەيدى. ونىڭ ءسوزىن بولگەن ز. باليەۆا: «اۋىلدا قالسا، قالعان شىعار. ءبىراق قالادا ونداي جوق»، - دەپ ءوز ويىن ءبىلدىردى.
وسىدان كەيىن دەپۋتات ول كيىمنىڭ كەيبىر ۇلگىلەرىن تىكەلەي پارلامەنتكە جىبەرۋدى تاپسىردى. حالىق قالاۋلىسى تاۋاردىڭ ساپاسىن تەكسەرىپ العان سوڭ، شالعاي جەردە جۇرگەن كاسىپكەر ايەلگە كومەكتەسۋگە نيەتتى.
ايتا كەتەيىك، بالالار قۇقىقتارىن قورعاۋ جونىندەگى ۋاكىل ز. باليەۆا ءوز قىزمەتىنە شىنداپ كىرىسكەن ءتارىزدى. دەپۋتات بالالاردى ءوز قۇقىقتارىن بىلۋگە، پايدالى جانە زياندى تاماقتى اجىراتۋعا، ءتىپتى Coca-Cola-نى ىشپەۋگە ۇيرەتپەكشى. «سونىمەن، بارلىعىمىز بىرلەسىپ جۇمىس ىستەيتىن بولامىز. ەندى، مەن ەلىمىزدەگى بالالاردىڭ ەكىنشى اناسى بولامىن. بىردەن ايتايىن، مەنىڭ مىنەزىم بار. ەشكىمگە تىنىشتىق بەرمەيمىن»، - دەپ اتاپ كورسەتتى باليەۆا.
