ون جەتى جاسىندا ميلليونەر بولعان قازاق بالاسى كىم؟
جاس كاسىپكەر، بۇگىندە بىرنەشە سالانى يگەرىپ وتىرعان ارمان توسقانبايەۆتى اتا-اناسى ەشتەڭەدەن شەكتەمەي وسىرگەن. قايدا بارامىن، نە ىستەيمىن دەسە دە ەرىكتى بالانىڭ وزىنە بەرگەن اتا-اناسىنىڭ ارەكەتىن جاس كاسىپكەر بۇگىندە دۇرىس دەپ باعالاپ وتىر.
ءدال وسى سەبەپتەن، ول اتا-اناسى بالاسىنىڭ تابىسىنا، جەتىستىگىنە، ەشتەڭە جارماي قالعانىنا دا سەبەپشى بولاتىن ادامدار ەكەنىن ايتادى.
قاراپايىم وتباسىنان شىققان ارمان تالاي رەت جوقشىلىقتى دا كورگەنىن ايتتى. اتا-اناسىنىڭ تاپقان تابىسى كۇن كورىسكە جەتپەي قالعان كەزدەرى 4-سىنىپتا وقىپ جۇرگەن بالا تەمىر-تەرسەك وتكىزىپ، اتا-اناسىنا قولعابىس بولىپتى.
«6- سىنىپتا وقىپ جۇرگەندە مەنى «مەن نەگە تالانتسىزبىن؟»، «نەگە مەن ءبىر سالاعا دەن قويىپ، سونى مەڭگەرمەيمىن» دەگەن وي مازالاي باستادى. سودان نە كەرەك، مەكتەپتەگى جادىرا مۇراتحان قىزى دەگەن ينفورماتيكا ءپانىنىڭ مۇعالىمى ماعان كومەك قولىن سوزىپ، كومپيۋتەردىڭ ءتىلىن مەڭگەرۋگە مۇمكىندىك بەردى. كومپيۋتەرلەردىڭ انا جەرىن ءبىر، مىنا جەرىن ءبىر شۇقىلاپ ءجۇرىپ، ونىڭ ءتىلىن تەز تاۋىپ الدىم. سونىڭ ارقاسىندا مۇعالىمدەردىڭ، سىنىپتاستارىمنىڭ كومپيۋتەرلەرىن جوندەپ بەرەتىن دارەجەگە جەتتىم. ولار اقىسىنا 200، 500 تەڭگە بەرەدى»، - دەيدى مەكتەپ قابىرعاسىنان باستاپ اقشا تاۋىپ ۇيرەنگەن جىگىت.
«11-سىنىپتى بىتىرگەن جىلى تەستتەن ناشار بالل جيناپ قالىپ، ۋنيۆەرسيتەتكە تۇسە المادىم. سوندىقتان تاعى ءبىر جىلىمدى كومپيۋتەر ساتۋعا ارنادىم. كەلەسى جىلى رەسەيدىڭ تومسك قالاسىنداعى ۋنيۆەرسيتەتكە «ۇشۋ ديناميكاسى مەن راكەتا قۇراستىرۋ» فاكۋلتەتىنە گرانتقا ءتۇستىم. ول جاقتا دا بوسقا جۇرمەي، دوستارىممەن بىرگە بيزنەسپەن اينالىستىق. ياعني ورمان شارۋاشىلىعىمەن اينالىساتىن ءبىر قىتاي جىگىتپەن سەرىكتەس بولدىق»، - دەيدى ول.
«ءبىراق مەن الگى جوعارى وقۋ ورنىن اياقتامادىم. سەبەبى وقىپ جاتقان ماماندىعىم ماعان تۇك تە قىزىق بولمادى. سودان قازاقستانعا كەلىپ، كونسالتينگتىك جۇمىستارمەن اينالىستىم. كەيىننەن «ينتەرتەل» دەگەن كومپانياعا تەحنيك بولىپ جۇمىسقا تۇردىم. ءبىر جىلدان كەيىن تەحنيكالىق ديرەكتور، ديرەكتوردىڭ مىندەتىن اتقارۋشى قىزمەتىنە دەيىن كوتەرىلدىم»، - دەگەن ول وقۋ وقىماي-اق جەتىستىككە جەتۋگە بولاتىنىن ايتادى.
سونداي-اق، ول اتا-انالارعا كەڭەسىن دە ايامادى. ونىڭ ايتۋىنشا، بالانى «5» پەن وقى دەپ ماجبۇرلەمەۋ كەرەك. سەبەبى، بالا اتا-اناسىنىڭ بۇل تالابىن ورىنداۋعا كوڭىل ءبولىپ، ءوزىنىڭ بويىنداعى قابىلەتتەرىن دامىتۋعا ۋاقىت بولە الماي قالۋى مۇمكىن دەيدى ول.
10-سىنىپتا وقىپ ءجۇرىپ، كومپيۋتەر ساتاتىن ورتالىق اشقان كاسىپكەردىڭ بۇگىندە بىرنەشە جاسىل تەحنولوگيا وندىرەتىن، وتاندىق ساعاتتار شىعاراتىن كومپانيالارى بار. ءوزىنىڭ جەكە شارۋا قوجالىعىن جانە جاس كاسىپكەرلەر اسسوتسياتسياسىن باسقارىپ وتىر.
2016
