باقىتبەك ەسەنتايەۆتىڭ قورعاۋشىسى اپپەلياتسيالىق شاعىم ءتۇسىردى

ولار ادام ولتىرۋگە وقتالۋ بابى بويىنشا كىنالى دەپ تانىلعان باقىتبەك ەسەنتايەۆقا كەسىلگەن سوت ۇكىمىمەن تۇبەگەيلى كەلىسپەي وتىر، - دەپ حابارلايدى قازاقپارات ءتىلشىسى. «باقىتبەكتىڭ دە، باياننىڭ دا قورعاۋشىلارى سوت ۇكىمىمەن كەلىسپەيدى. سول سەبەپتى قوس تاراپ تا اپپەلياتسيالىق شاعىم ءتۇسىردى. بىزدە دالەل بار. تاعىلعان ايىپ دۇرىس ەمەس»، - دەيدى قازاقپارات تىلشىسىنە بەرگەن سۇحباتىندا بايان ماقسات قىزىنىڭ قورعاۋشىسى مارات اسقاربەكوۆ.

سوت ۇكىمى شىققان كۇنى باقىتبەك ەسەنتايەۆتىڭ قورعاۋشىسى بەكبولات جەكسەيىتوۆ تە جازا تىم قاتال دەگەن بولاتىن. ەستەرىڭىزگە سالا كەتەيىك، باقىتبەك ەسەنتايەۆتىڭ ىسىنە بايلانىستى سوت تالدىقورعان قالاسىندا ءوتتى. 9 جىلعا باس بوستاندىعىنان ايىرىلعان باقىتبەك ەسەنتايەۆ سوڭعى سوزىندە ءوزىنىڭ كىنالى ەمەستىگى جونىندە ايتقان بولاتىن.

ال بايان ماقسات قىزى بۇرىنعى كۇيەۋىن تولىقتاي كەشىرىپ، سوتتان باقىتبەكتى باس بوستاندىعىنان ايىرماۋدى وتىنگەن ەدى. ايتا كەتەلىك، ەسەنتايەۆتاردىڭ وتباسىنداعى جانجال بايان ماقسات قىزىنىڭ شەت ەلدەن ەلگە ورالعان كۇنى بولدى. 10- ماۋسىمدا باقىتبەك ەسەنتايەۆ اۋەجايدان كەلە جاتقان ايەلىن كۇتىپ الىپ، قۇلجا تاس جولىنىڭ بويىندا ۇرىپ-سوعىپ، بىرنەشە جەرىنە پىشاق سالدى.

اۆتور: سامال قابىشەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى