ارىس قالاسىندا ءبىرىنشى سىنىپ وقۋشىلارى اعاش كوشەتتەرىن وتىرعىزدى
تۇڭعىش پرەزيدەنتىمىز ن. ءا. نازاربايەۆ: «ەگەر ءبىزدىڭ ازاماتتارىمىز وزدەرىنىڭ اۋىل ماڭدارىندا، ءوز ۇيلەرىنىڭ اينالاسىنا، بارلىق وبلىستىق، قالا ورتالىقتارىندا جىل سايىن اعاش وتىرعىزاتىن بولسا، ءبىز جاسىل ەل قۇرامىز. مەن مۇنى ۇلكەن ءىس دەپ سانايمىن. بارشا قازاقستاندىقتاردى جىل سايىن اعاش وتىرعىزۋعا شاقىرامىن»، - دەگەن بولاتىن.
وسى ماقساتتا قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي قالا اكىمى مۇرات قادىربەكتىڭ بەكىتكەن ءىس- شاراسى اياسىندا س. ادامبەكوۆ جانە ي. جۋربا اتىنداعى جالپى ورتا مەكتەپتەرىندە 1-سىنىپ وقۋشىلارىنىڭ قاتىسۋىمەن «تۋعان جەردى تۇلەت» تاقىرىبىندا تال ەگۋ اكسياسى ءوتتى.
اكسيانىڭ ماقساتى جاستاردى مەكتەپ اۋماعىن كوگالداندىرۋعا، ەگىلگەن اعاشتاردى كۇتىپ- باپتاۋعا ماشىقتاندىرۋ بولىپ تابىلادى. ءبىرىنشى سىنىپ وقۋشىلارى مەكتەپ اۋلالارىنا 200 گە جۋىق اعاش كوشەتتەرىن وتىرعىزدى. مۇنداي يگى شارالار الداعى ۋاقىتتا ارىس قالاسىنداعى جانە اۋىلدىق وكرۋگتەردەگى وزگە مەكتەپتەردە جالعاسىن تاباتىن بولادى.
