ورالدا ءۇش بىردەي بەلگىلى تەرمەشىنى ەسكە الۋعا ارنالعان رەسپۋبليكالىق بايقاۋ وتۋدە - فوتو
ەكى كۇنگە سوزىلاتىن جىر دوداسىنا استانا، الماتى، اقتاۋ، اتىراۋ، قىزىلوردا قالالارى مەن باتىس قازاقستان وبلىسىنان بارلىعى 15 ۇمىتكەر قاتىسىپ، باق سىناۋدا. بايقاۋ شىمىلدىعىن اشقان وبلىستىق حالىق شىعارماشىلىعى ورتالىعىنىڭ ديرەكتورى مەدحات قامبەتوۆ حالىقتىق ونەردى ءوز ومىرلەرىندە تالماي ناسيحاتتاپ وتكەن ءۇش بىردەي ساڭلاققا ارنالعان سايىستىڭ ەل تاۋەلسىزدىگىنىڭ 25 جىلدىعى قارساڭىندا ۇيىمداستىرىلىپ وتىرعانىن ايتىپ، قاتىسۋشىلارعا ساتتىلىك تىلەدى. قوس اينالىمنان تۇراتىن تەرمەشىلەر بايقاۋى ەرتەڭ مارەگە جەتەدى.
ايتا كەتەيىك، قازاقستاننىڭ ەڭبەك سىڭىرگەن ءارتىسى قالامقاس وراشەۆا (1953-1988) اقجايىق اۋدانى العاباس اۋىلىندا دۇنيەگە كەلگەن.
الماتىداعى ەسترادا ستۋدياسىندا ق ر حالىق ءارتىسى عاريفوللا قۇرمانعاليەۆتىڭ كلاسىندا وقىعان ول «گۇلدەر» انسامبلىندە، «قازاق كونسەرت» بىرلەستىگىندە، قۇرمانعازى اتىنداعى قازاق اكادەميالىق حالىق اسپاپتار وركەسترىندە، الماتى وبلىسى ءسۇيىنباي اتىنداعى فيلارمونيادا قىزمەت ەتتى. ومىرلىك جارى جاقسىلىق سارسەنعاليەۆ ەكەۋى تۇركيا، يتاليا، فرانسيا، ۆەتنام، ءۇندىستان سىندى ەلدەردە ونەر كورسەتىپ، قازاق حالقىن الەمگە تانىتۋعا سۇبەلى ۇلەس قوستى.
حالقىنىڭ قوشەمەتىنە بولەنىپ، «نارقىز» اتانعان ءانشى- تەرمەشى قاراقالپاق جىراۋى ناۋرىزبەكتىڭ تەرمە- تولعاۋلارىن دا قازاق تىڭدارماندارىنا العاش ناسيحاتتادى. قاراتوبە اۋدانى قالدىعايتى اۋىلىندا ءومىر ەسىگىن اشقان جاقسىلىق سارسەنعاليەۆ (1944-2001) تە - عاريفوللا قۇرمانعاليەۆتىڭ شاكىرتتەرىنىڭ ءبىرى.
«قازاق كونسەرت» بىرلەستىگىندە، قۇرمانعازى وركەسترىندە، ءسۇيىنباي اتىنداعى فيلارمونيادا قىزمەت ەتكەن ول جيىرمادان استام الىس شەت ەلدە، ت م د مەملەكەتتەرىندە گاسترولدىك ساپارمەن بولدى. مۇحيت مەرالى ۇلى اتىنداعى رەسپۋبليكالىق ءان بايقاۋىنىڭ ەكى مارتە باس جۇلدەگەرى اتاندى. شىڭعىرلاۋ اۋدانى الماز اۋىلىندا كىندىك قانى تامعان قالامپىر راحيموۆا (1949-1988) ەلدە جۇرگەندە- اق انشىلىگىمەن كوزگە ءتۇسىپ، كوپ ۇزاماي ع. قۇرمانعاليەۆكە شاكىرت بولىپ قابىلداندى.
«گۇلدەر» ءانسامبلىنىڭ ءانشىسى رەتىندە حالىق كومپوزيتورلارىنىڭ تۋىندىلارىن ناقىشىنا كەلتىرە ورىنداپ، كوپشىلىككە تانىلدى. شەت ەلدەردە دە ونەر كورسەتكەن انشىگە 1988 -جىلى «قازاقستاننىڭ ەڭبەك سىڭىرگەن ءارتىسى» اتاعى بەرىلدى.
وكىنىشكە قاراي، سول جىلدىڭ قاراشا ايىندا تۋعان جەرى - اق جايىق وڭىرىنە گاسترولدىك ساپارمەن كەلگەن قالامپىر راحيموۆا جول اپاتىنا ۇشىراپ، كوز جۇمدى.
اۆتور: ەلجان ەرالى
