بيىل الماتى وبلىسىندا تۋۋ كورسەتكىشى جوعارى

وبلىستىق پەريناتالدىق ورتالىقتا جىل باسىنان بەرى 5200 دەن اسا ءسابي دۇنيەگە كەلدى. ولاردىڭ باسىم بولىگى - ۇل بالالار، دەپ حابارلايدى قازاقپارات ءتىلشىسى.

ۇلدى بولعانداردىڭ ءبىرى - ەلۆيرا نۇعمانوۆا. ءۇش قىزىنان كەيىن كوپتەن كۇتكەن ۇلدارى دۇنيەگە كەلدى. اتاسى ىرىمداپ نەمەرەسىن اقبەرەن دەپ اتاپتى.

«بالانىڭ سالماعى 4ك گ 200 گرام بويى 56 س م. كوپ بالالى انا اتانىپ جاتىرمىز. وتە قۋانىشتىمىز»، - دەيدى تالدىقورعاندىق ەلۆيرا. تالدىقورعان قالاسىنداعى وبلىستىق پەريناتالدىق ورتالىقتا كۇنىنە 20 عا جۋىق ايەل بوسانادى. اتالعان پەرزەنتحانا وبلىستىڭ 7 اۋدانى مەن 2 قالاسىنا قىزمەت كورسەتەدى. مۇنداعىلار ءۇشىن ءبىر ساتكە دە تىنىم جوق. ۋاقىتىنان بۇرىن بوسانۋ، جوسپارسىز جۇكتى بولۋ سىندى جايتتار جيىلەگەن.

سالدارىنان 700 گرامم سالماقتاعى سابيلەر دۇنيەگە كەلىپ جاتىر. سول سەبەپتى، ءار جۇكتىلىكتى جوسپارلاۋ كەرەك دەپ، دارىگەرلەر كەڭەس بەرەدى. جانە جىلدا-جىلدا جۇكتى بولۋ انانىڭ دا بالانىڭ دا دەنساۋلىعىنىڭ تومەندەۋىنە اكەلەدى، دەيدى الماتى وبلىستىق پەريناتالدىق ورتالىعىنىڭ ديرەكتورى قاليحان جۇماشەۆ.

سونىمەن قاتار، كوپ جاعدايدا جاس انالار بوسانۋعا دايىن بولماي كەلەدى ەكەن. ارنايى ساباقتارعا قاتىسپايدى، سالدارىنان تولعاق كەزىندە قينالادى. سونداي-اق سوڭعى جىلدارى كەسىر تىلىگى ارقىلى بوساناتىندار سانى دا كۇرت كوبەيدى. سەبەبى وزدىگىنەن بوسانۋعا انالاردىڭ اعزالارى ءالسىز. بۇل ءوز كەزەگىندە نازىك جاندىلاردىڭ ءوز دەنساۋلىقتارىنا نەمقۇرايلىق تانىتۋىنان بولىپ وتىر دەيدى ماماندار. دەگەنمەن، قازىر وزىق تەحنولوگيالاردىڭ ارقاسىندا بالا مەن انا ءومىرىن ساقتاپ قالۋعا بارلىق جاعداي قاراستىرىلعان.

اۆتور: سامال قابىشەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى