سيرەك كەزدەسەتىن ماماندىقتارعا قىزمەتكە تۇرۋ جەڭىلدەيدى
«زاڭ جوباسى مەملەكەتتىك قىزمەتكە ءتۇسۋ ءتارتىبىن جەتىلدىرىپ، قۇقىق قورعاۋ جانە مەملەكەتتىك قىزمەت ستاندارتتارىن جاقىنداتادى. ازىرلەۋ بارىسىندا ول قوعام وكىلدەرىمەن كەڭىنەن تالقىلاندى. بىرىنشىدەن، مەملەكەتتىك قىزمەت كادرلارىن تولىقتىرۋ ءتارتىبى قايتا قارالادى. قازىرگى ۋاقىتتا بوس ورىندار تولتىرۋ ءۇش كەزەڭنەن تۇراتىن كونكۋرس ارقىلى جۇزەگە اسادى. ەڭ الدىمەن، ۇمىتكەرلەر بوس لاۋازىمدارى بار مەملەكەتتىك ورگان قىزمەتكەرلەرى اراسىنان ىرىكتەلەدى. ەگەر ولاردىڭ ىشىنەن ۇمىتكەر بولماعان جاعدايدا، ىرىكتەۋ بارلىق ورگان قىزمەتكەرلەرى اراسىندا جالعاستىرىلادى. وسى كەزەڭدە دە جەڭىمپاز انىقتالماسا، وندا جالپى كونكۋرس جاريالانادى»، - دەدى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى قايرات قوجامجاروۆ زاڭ جوباسى بويىنشا بايانداما جاساۋ بارىسىندا.
ونىڭ سوزىنە قاراعاندا، جىل باسىنان قولدانىسقا ەنگەن زاڭدى تالداۋ كورسەتكەندەي، جالپى كونكۋرسقا قاتىسۋلار سانى ەكى ەسەدەي كوپ بولىپ وتىر. سوندىقتان بوس لاۋازىمداردىڭ 65 پايىزى وسى كەزەڭنىڭ قورىتىندىسى بويىنشا تولتىرىلۋدا. قازىرگى تاڭدا كونكۋرستار قاتاڭ تۇردە ءۇش كەزەكپەن وتكىزىلۋدە. سول سەبەپتەن بوس لاۋازىمدارعا ۇمىتكەرلەردى ىرىكتەۋ 16-دان 52 جۇمىس كۇنىنە دەيىن ۋاقىت الۋدا. بۇل جاعداي ءوز كەزەگىندە كادر تاپشىلىعىنا الىپ كەلۋدە، اسىرەسە، اۋىلدىق جانە اۋداندىق دەڭگەيلەردە كادر جەتىسپەۋشىلىگى انىق بايقالۋدا.
«ەكىنشى ىشكى جانە جالپى كونكۋرستاردى بىرىكتىرۋ ولاردى تەزىرەك جابۋعا مۇمكىندىك بەرەدى. بوس ورىندار تولتىرۋ ماسەلەسىن تەزدەتۋمەن قاتار، مەريتوكراتيا قاعيدالارىنىڭ ساقتالاۋىن باقىلايتىن بولامىز. سول سەبەپتى ەكىنشى ىشكى كونكۋرستار وتكىزىلمەيتىن جاعدايلار زاڭعا تاۋەلدى قۇقىقتىق اكتىلەرىندە انىقتالاتىن بولادى. ولار سيرەك كەزدەسەتىن ماماندىقتار جانە باسشىلىق ەمەس لاۋازىمدار. كەرىسىنشە، بارلىق باسشىلىق لاۋازىمدارعا ەكىنشى كونكۋرستى وتكىزۋ مىندەتتى تۇردە ساقتالادى. بۇنداي ءتاسىل تومەننەن جوعارىعى ءوسۋدى، ياعني مانساپتىق قاعيدانىڭ تالاپتارىن ورىنداۋدى تولىق قامتاماسىز ەتەدى»، - دەدى ول.
اۆتور: رۋسلان عابباسوۆ
