الەمدەگى ساناۋلى تەڭگە سارايىنىڭ ءبىرى وسكەمەندە ورنالاسقان - كەسكىن

بۇگىن ءتول تەڭگەمىزگە -  23 جىل. تەڭگە سارايى -  بۇل عاجايىپ نىسان. كۇللى الەمدە مۇنداي نەبارى 69 مەكەمە بار. ونىڭ ۇشەۋى قازاقستان، رەسەي جانە ۋكرايناعا تيەسىلى. رۇستەم اراقپايەۆ -  وسىنداي ەرەكشە جەردە جۇمىس ىستەۋ باقىتى بۇيىرعان جانداردىڭ ءبىرى. ول -  شتامتتاۋ قۇرىلعىسىنىڭ وپەراتورى. رۇستەمنىڭ سەحىندا كادىمگى مەتالدان اقشا جاساۋ پروتسەسى جۇرەدى.

رۇستەم اراقپايەۆ، كەسۋ سەحىنىڭ وپەراتورى:

- بۇل مەتالل نەيزيلبەردەن تۇرادى. كورىپ تۇرعاندارىڭىزداي، بۇل -  100 تەڭگەلىك مونەتانىڭ ورتاڭعى تۇسى. سونداي- اق 50, 20 تەڭگەلىك مونەتالار دا وسى مەتالدان جاسالادى. اقشا تابۋ ۇلكەن ەڭبەكتى تالاپ ەتەتىندەي، ونى دايىنداۋ ءۇشىن دە ءبىراز تەر توگۋ كەرەك ەكەن. جيەكتەپ، كۇيدىرۋ ارقىلى مەتالدى جۇمسارتادى. بۇدان كەيىن ماماندار ءونىمدى قىشقىلدانۋدان پايدا بولعان قابىرشىقتان اجىراتادى. ال بۇل سەحتە بولاشاق تيىن ارنايى تاسىمالداعىشقا سالىنىپ، ناقىشتى بەتكى قاباتىن دايىندايتىن ماماندارعا جونەلتىلەدى. مىنە، كادىمگى 50 تەڭگە وسىلاي پايدا بولادى. دايىن ءونىمدى تەحنيكالىق باقىلاۋ ءبولىمىنىڭ ماماندارى تەكسەرىپ الۋى ءتيىس.

يۋليا وسيپوۆا، باقىلاۋشى:

- تيىندار تالاپقا ساي بولۋى كەرەك. ءبىز ولاردىڭ سالماعىن ولشەپ، باقىلايمىز. ەگەر ولقىلىقتار بولىپ جاتسا، مەتالل سوعۋدى توقتاتامىز.

ارنايى تەكسەرۋدەن وتكەن تيىندار قاپتالىپ تىگىلەدى جانە ولارعا پلومبا سالىنادى. وسىلايشا ءتول تەڭگەمىز قازاقستاننىڭ ۇلتتىق بانكىنە جونەلتىلەدى. ايتپاقشى، وسكەمەندەگى تەڭگە سارايىندا «كوسموس» سەريالى قۇرامىندا تانتال قوسىلعان الەمدەگى تۇڭعىش مونەتالار دا دايىندالادى.

الەكساندر ترانوۆ، مونەتا دايىنداۋ سەحىنىڭ باسشىسى:

- تاۋەلسىزدىگىمىزدىڭ 25 جىلدىعىنا تەڭگە سارايى ەكى ءتۇرلى ەستەلىك تيىندارىن ازىرلەپ وتىر. كۇمىستىڭ 925 ۇلگىسىنە ازداپ التىن جالاتتىق. ديزاينىندا قازاقستاننىڭ تۋى، ەلىمىزدىڭ سان ۇلتتى حالقى مەن «قازاق ەلى» مونۋمەنتى بەينەلەنگەن.

تەڭگە -  تاۋەلسىز قازاقستاننىڭ بايلىعى، ەل تاريحىنىڭ ءبىر بولشەگى. سوندىقتان دا ساراي ماماندارى ءۇشىن ۇلتتىق قۇندىلىقتى دايىنداۋعا تىكەلەي قاتىسۋ -  زور ماقتانىش.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى