استاناداعى تىگىن اتەلەسىنەن شىققان وتاندىق كيىمدەر قولجەتىمدى باعامەن ساتىلادى

بۇگىنگى تاڭدا مەملەكەت ىسكەر ازاماتتارعا قول ۇشىن سوزىپ، قارجىلاي قولداۋ كورسەتەدى. لەيلا شيدەن تىگىنشىلىككە جاستايىنان قۇمارتىپ ءوستى. 5 جىل بۇرىن شەتەلدە وقىپ، وسى ماماندىقتىڭ قىر- سىرىن مەڭگەرگەن ول استانادا جەكە كاسىبىن اشۋعا بەل بۋدى. بيزنەستى اياققا تۇرعىزۋعا قاجەتتى العاشقى كاپيتالدى «دامۋ» قورى تومەن پايىزدىق مولشەرلەمەمەن بەردى. لەيلا ارىپتەسىمەن بىرگە 3 ميلليون تەڭگەگە 4 تىگىن ماشيناسى مەن كەرەكتى قۇرال- جابدىقتار ساتىپ الدى. «ازىرگە بۇل تەحنيكا ايەلدەر مەن بالالاردىڭ كيىمىن تىگۋگە جەتكىلىكتى»، - دەيدى جاس ديزاينەر.

لەيلا شيدەن، ديزاينەر:

- ءبىز «جاستار» باعدارلاماسى بويىنشا 5 جىلعا نەسيە الدىق. ەگەر كاسىبىمىز العا باسسا، قارىزدى ەرتە تولەپ تاستاماقپىز. جۇمىس ىستەپ جاتقانىمىزعا جارتى-اق جىل بولعانىمەن، وسى ۋاقىت ىشىندە 10 مىڭعا جۋىق كيىم تىگىپ، ساتتىق. كەلەشەكتە ءبىزدىڭ برەند تەك استانا اۋماعىندا عانا ەمەس، بۇكىل قازاقستاندا تانىمال بولادى دەگەن سەنىمدەمىز. ول ءۇشىن كوپ جۇمىس ىستەۋىم كەرەك. ال ءوز كاسىبىمەن اينالىسامىن دەگەندەرگە ەش قيىندىقتاردان قورىقپاۋعا كەڭەس بەرەمىن.

تىگىن اتەلەسىن اشقان كەزدە كليەنتتەر بازاسىن قۇرۋ قاجەتتىلىگى تۋىندادى. بۇل مىندەتتى لەيلانىڭ ارىپتەس قۇربىسى زيليارا اتقاراتىن بولدى. ول كاسىپورىن شىعاراتىن ءونىمدى نارىقتا زاماناۋي تاسىلدەر ارقىلى جارنامالايدى. سونداي-اق تاۋاردىڭ جەكەلەگەن تۇتىنۋشىعا عانا ەمەس، قاراپايىم حالىققا دا قولجەتىمدى بولۋىنىڭ جولدارىن ىزدەيدى.

زيليارا شايىقوۆا، تىگىن اتەلەسىنىڭ باسقارۋشى ديرەكتورى:

- ءبىز ەڭ الدىمەن الەۋمەتتىك جەلىلەردە ءوز پاراقشامىزدى اشتىق. ءقازىر ونىمدەرگە 2 مىڭداي قولدانۋشى قىزىعۋشىلىق تانىتىپ وتىر. بەينەجازبا ارقىلى ءار كويلەكتىڭ قالاي تىگىلەتىنىن كورسەتەمىز. قالا ورتالىعىنداعى دۇكەندە دۇڭگىرشەگىمىز بار. كيىم تىكتىرۋگە ۋاقىتى تىعىز ادامدار سول جەرگە كەلىپ، دايىن دۇنيەنى ساتىپ الا الادى.

جاس كاسىپكەرلەر ءوز ءونىمىن بارشاعا بىردەي قولجەتىمدى ەتىپ تىگۋگە تىرىسادى. سونىمەن قاتار جۇمىسقا دا، قىدىرعان كەزدە كيەتىن كويلەكتەردى دە ۇسىنىپ وتىر. بيزنەس زاڭىنا ساي، ولار ءاربىر تۇتىنۋشىنىڭ تالعامىنان شىعىپ، قويىلعان تالاپتى دەر كەزىندە ورىنداۋعا دايىن. اۆتورلارى: داريعا تاشەنوۆا، ەرجان قاناپيا ۇلى

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى