مۇناي باعاسىنىڭ قۇلدىراۋى قازاقستانمەن قاتار قىرعىزستان جانە وزبەكستانعا دا كەرى اسەرىن تيگىزدى
بۇل پىكىردى «استانا» كلۋبىنىڭ ەكىنشى وتىرىسى اياسىندا باق وكىلدەرىنە سۇحبات بەرگەن ا ق ش- تىڭ كارنەگي قورى رەسەي مەن ەۋرازيانى زەردەلەۋ باعدارلاماسىنىڭ اعا عىلىمي قىزمەتكەرى پول سترونسكي ءبىلدىردى، دەپ حابارلايدى قازاقپارات.
«ءبىز حالىقارالىق قاتىناستاردىڭ باستى پروبلەمالارىن، ولاردىڭ ورتالىق ازيا وڭىرىنە، ونىڭ ىشىندە ناقتى قازاقستانعا ىقپالىن تالقىلادىق. مۇنان بولەك، بولاشاقتىڭ پروبلەمالارىن دا قوزعادىق. ونىڭ ىشىندە ەكونوميكالىق ماسەلەلەر مەن تەرروريزم پروبلەماسى، بۇل پروبلەمالارعا ءتۇرلى مەملەكەتتەردىڭ قارسى ارەكەت ەتۋ مۇمكىندىكتەرى دە ءسوز بولدى. مەن بۇل جەردەگى ەكونوميكالىق پروبلەمالاردى جانە ونىڭ قاراپايىم ادامعا قالاي اسەر ەتەتىندىگىن جەتە ءبىلدىم. بۇل مەن ءۇشىن قىزىقتى ەدى»، - دەدى شەتەلدىك ساراپشى.
سونىمەن قاتار ول استانا كلۋبى سىندى سۇحبات الاڭىنىڭ ماڭىزدىلىعىن اتاپ ءوتتى. «امەريكا، ەۋروپا، قىتاي، ورتالىق ازيانىڭ بارلىق ساراپشىلارى باس قوسىپ، جاھاندىق كۇن تارتىپتەگى وزەكتى ماسەلەلەردى ءتۇرلى كوزقاراس تۇرعىسىنان تالقىلاۋى سيرەك كەزدەسەتىن جايت. مەن ءۇشىن ولاردىڭ پىكىرلەرىن تىڭداۋ پايدالى بولدى. مۇندا ءۇندىستان مەن يراننان دا ساراپشىلار كەلگەن. امەريكالىق رەتىندە مەنى يراندىقتاردىڭ ساراپتامالارىن تىڭداۋ بارىنشا قىزىقتى. بۇگىنگى كۇنى ساراپشىلاردى الاڭداتاتىن باستى ماسەلە مۇناي باعاسىنىڭ تومەندىگى مەن وڭىردەگى ەكونوميكالىق جانە ساياسي تۇراقتىلىق بولىپ وتىر. بۇل مۇنايلى مەملەكەت سانالاتىن قازاقستان ءۇشىن عانا ەمەس، سونىمەن بىرگە قارا التىنى جوق بولسا دا ەكونوميكالىق پروبلەمالارى بار كورشىلەس قىرعىزستان مەن وزبەكستانعا دا ماڭىزدى»، - دەدى سترونسكي.
ايتا كەتەرلىگى، كەشە قازاقستان پرەزيدەنتى نۇرسۇلتان نازاربايەۆ كلۋب وتىرىسىنا قاتىسىپ، ءسوز سويلەگەن بولاتىن. ال كلۋبتىڭ بۇگىنگى وتىرىسىنا الەمنىڭ 50 دەن استام ساراپشىسى، ساياسي جانە قوعام قايراتكەرلەرى، 21 ەلدىڭ عالىمدارى، سونىمەن بىرگە جەتەكشى قازاقستاندىق ساراپشىلار قاتىسۋدا. كلۋب وتىرىسىنا قاتىسۋشىلار «ەۋرازيا توعىسىندا: وڭىرلىك پروبلەمالارعا نەگىزگى الەمدىك ويىنشىلاردىڭ كوزقاراسى»، «ەۋرازيا رەسۋرستارى: «التىن عاسىردىڭ» سوڭى ما؟»، «ەۋرازيا ادامدارى: تۇراقسىزدىق كوزى مە الدە بايلىق كوزى مە؟» سىندى سەسسيالاردا ەۋرازيا وڭىرىنە قاتىستى وزەكتى ماسەلەلەردى جان-جاقتى تالقىلاۋدا.
استانا كلۋبى ق ر تۇڭعىش پرەزيدەنتى - ەلباسى قورىنىڭ جەتەكشى حالىقارالىق عىلىمي ورتالىقتار قىتاي قازىرگى زامانعى حالىقارالىق قاتىناستار اكادەمياسى، گەرمانيا سىرتقى ساياسات كەڭەسى، رەسەي حالىقارالىق ىستەر كەڭەسى جانە حالىقارالىق بەيبىتشىلىك ءۇشىن كارنەگي قورىمەن بىرلەسىپ قۇرعان حالىقارالىق پىكىرتالاس الاڭى سانالادى.
استانا كلۋبىنىڭ ءبىرىنشى وتىرىسى 2015 -جىلعى قاراشادا الەمنىڭ 15 ەلىنەن كەلگەن 47 ساراپشىنىڭ قاتىسۋىمەن وتكەن ەدى. ونىڭ بارىسىندا ەۋرازيا گەوەكونوميكاسىنىڭ نەگىزگى اسپەكتىلەرى، عالامدىق جانە وڭىرلىك ويىنشىلاردىڭ مۇددەلەرى، ەكونوميكالىق قاۋىپ-قاتەرلەر مەن مۇمكىندىكتەر ماسەلەلەرى تالقىلانعان بولاتىن.
اۆتور: مارلان جيەمباي
