قورعانىس مينيسترلىگى: جەمقورلىقتىڭ باسىم بولىگى اسكەري بيلەتتى بەرۋ كەزىندە ورىن الادى

ولاردىڭ نەگىزگى بولىگى اسكەري بيلەتتى بەرۋگە جانە اسكەري قىزمەتكە شاقىرتۋ مەرزىمىن شەگەرۋگە قاتىستى بولعان. بۇل جونىندە ق ر قورعانىس مينيسترلىگىنىڭ «قازاقپارات» اگەنتتىگىنىڭ رەسمي ساۋالىنا بەرگەن جاۋابىندا ءمالىم ەتىلگەن.

ۆەدومستۆونىڭ حابارلاۋىنشا، 2016-جىلدىڭ 10 ايىندا ق ر قورعانىس مينيسترلىگى قارۋلى كۇشتەرىندە 23 جەمقورلىق قىلمىسى تىركەلگەن. 2015-جىلمەن سالىستىرعاندا، اتالمىش كورسەتكىش 12 پايىزعا از. بىلتىر سايكەس كەزەڭدە 26 قىلمىس انىقتالدى.

«جاعىمدى ديناميكاعا جانە قولعا الىنىپ جاتقان شارالارعا قاراماستان، جەرگىلىكتى اسكەري باسقارۋ ورگاندارىنداعى جەمقورلىق فاكتىلەرىنىڭ دەڭگەيى الاڭداتادى. قارۋلى كۇشتەردە تىركەلگەن 23 جەمقورلىق قىلمىستىڭ 11 ءى اتالمىش ورگانداردا تىركەلگەن جانە 48 پايىزدى قۇرادى»، - دەلىنگەن ق ر ق م بەرگەن جاۋابىندا.

11 جەمقورلىق فاكتىلەرىنىڭ 4 ءۋى اسكەري بيلەتتى بەرۋگە قاتىستى بولسا، 3 ءۋى اسكەرگە شاقىرتۋ مەرزىمىن شەگەرۋگە بايلانىستى، تاعى 3 ءۋى اسكەري-تەحنيكالىق مەكتەپكە قابىلداۋعا قولداۋ جاساعانى ءۇشىن، 1 قىلمىس جۇمىسقا ورنالاسۋعا جاردەمدەسكەنى ءۇشىن بولىپ وتىر.

«قازىرگى ۋاقىتتا قورعانىس ىستەرى جونىندەگى ورگانداردا جەمقورلىقتىڭ تۋىنداۋىنا يتەرمەلەيتىن شارتتاردى جويۋ بويىنشا شارالار قولعا الىنۋدا. سونىمەن قاتار، قارۋلى كۇشتەردە جانە اسكەري بيلەتتى بەرۋدە جەمقورلىقتىڭ الدىن الۋعا باعىتتالعان قورعانىس مينيسترلىگى قارۋلى كۇشتەرى قىزمەتكەرلەرىنىڭ ءجۇرىس-تۇرىس ەرەجەلەرى بەكىتىلگەن»، - دەپ جازادى قورعانىس مينيسترلىگى.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى