قازاقستاننىڭ ەلورداسى مەن ۇلتتىق تاعامدارى سەربيا پرەمەرىنە قاتتى ۇنادى
تاراپتار ەكىجاقتى ىنتىماقتاستىقتىڭ نەگىزگى باعىتتارىن تالقىلاپ، حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى.
«ءسىزدى جانە بىرگە ەرىپ كەلگەن دەلەگاتسيانى قازاق جەرىندە قابىلداپ وتىرعانىمىزعا قۋانىشتىمىز. كەشە ءبىزدىڭ ەلوردامىزدىڭ كورىنىسىنە ءتانتى بولعانىڭىزدى ايتقان ەدىڭىز. استانا قازىرگى سۋىق پەن قارعا قاراماستان، كەلبەتتى شاھار. ءسىز قازاقتىڭ ءداستۇرلى تاعامدارىنان ءدام تاتتىڭىز جانە ءبىزدىڭ ۇلتتىق تاعامدار مەن ەلىمىز ۇنايتىنىن بايقادىق»، - دەدى ساعىنتايەۆ سەربيا پرەمەر-مينيسترىنە قاراتىپ ايتقان سوزىندە.
ق ر ۇكىمەت باسشىسىنىڭ سوزىنە قاراعاندا، بۇگىن شاعىن قۇرامداعى كەلىسسىوزدەردە مەملەكەت باسشىلارىنىڭ بەرگەن تاپسىرمالارى اياسىندا كوپتەگەن تاقىرىپتار قامتىلدى. وسى رەتتە شارالاردىڭ ارنايى جوسپارى قۇرىلىپ، ەكى ەلدىڭ مينيسترلىكتەرى مەن ۇلتتىق كومپانيالارى بويىنشا ارىپتەستەر بۇل تاپسىرمالاردى ورىنداۋ تۇرعىسىنداعى جۇمىستارعا كىرىسىپ كەتتى.
ءوز كەزەگىندە الەكساندر ۆۋچيچ قازاقستاندىق تاراپتىڭ جىلى شىرايمەن قارسى العانىنا العىسىن جەتكىزدى.
«سەربيا قازاقستان ۇستانىمىن، پرەزيدەنت نۇرسۇلتان نازاربايەۆتى وتە قاتتى قۇرمەتتەيدى. جالپى، ەلىمىز سىزدەردىڭ قادامدارىڭىزدى جوعارى باعالايدى جانە ءبىزدىڭ ەكىجاقتى بايلانىستارىمىز دوستىق قاتىناستارىمىزدى تاعى دا دالەلدەپ وتىر. بۇل رەتتە سەربياعا ناعىز سەنىمدى دوس رەتىندە ارقا سۇيەي الاسىزدار»، - دەدى ا. ۆۋچيچ.
ايتا كەتەيىك، بۇگىندە قازاقستان مەن سەربيا اراسىنداعى تاۋار اينالىمى سوڭعى 10 جىلدا 230 ميلليون دوللاردى قۇرادى، ونىڭ ىشىنە 2015-جىلى 56 دوللاردى قامتىدى.
اۆتور: رۋسلان عابباسوۆ
