الماتى وبلىسىندا الاۋ ەستافەتاسىنا دايىندىق ءجۇرىپ جاتىر
جۋىردا الاۋ جاعۋ ەستافەتاسىنىڭ باس رەپەتيتسياسى وتىكىزىلىپ، الاۋدى تاسىمالدايتىن شىنى ساۋىت تەستىلەندى، دەپ حابارلايدى قازاقپارات الماتى وبلىسى اكىمدىگىنىڭ باسپا ءسوز قىزمەتىنە سىلتەمە جاساپ.
الماتى وبلىستىق دەنە شىنىقتىرۋ جانە سپورت باسقارماسىنىڭ ءبولىم باسشىسى المات ۇشكەمپىروۆتىڭ ايتۋىنشا، تالدىقورعان قالاسىندا وتەتىن الاۋ ەستافەتاسىنا قازىرگى تاڭدا 2 جوعارى وقۋ ورنىنان، مادەنيەت، مەديتسينا جانە سپورت مەكەمەلەرىنەن 80 نەن استام سۇرانىس كەلىپ تۇسكەن. ارنايى كوميسسيا وتىرىسىندا سونىڭ ىشىنەن 60 الاۋگەر ىرىكتەلىپ الىنادى. قازىرگى كەزدە قالانىڭ ىشىمەن الاۋدى الىپ جۇرەتىن كوشەلەر بەلگىلەنىپ، باعىتتارى جاسالۋدا.
ەستەرىڭىزگە سالساق، 2017-جىلدىڭ 29- قاڭتارى مەن 8- اقپانى ارالىعىندا الماتى قالاسىندا XXVIII دۇنيەجۇزىلىك قىسقى ۋنيۆەرسيادا وتەدى. حالىقارالىق فەدەراتسياسىنىڭ (FISU) قولداۋىمەن وتەتىن بۇل حالىقارالىق سپورتتىق جارىسقا 17-28 جاس ارالىعىنداعى ستۋدەنتتەر قاتىسادى. قىسقى جارىسقا 55 ەلدەن 2 مىڭ سپورتشى قاتىسادى دەپ جوسپارلانۋدا. ۋنيۆەرسيادا كەزىندە شەتەلدەردەن جانە ەلىمىزدىڭ ايماقتارىنان 3000 ەرىكتى تارتىلادى. سونىمەن قاتار 30 مىڭداي شەتەلدىك قوناقتار مەن تۋريستەر كەلەدى دەپ كۇتىلۋدە. قازاقستان ت م د ەلدەرىنىڭ ىشىندە قىسقى ۋنيۆەرسيادانى ءبىرىنشى بوپ وتكىزگەلى وتىر.
