بايان ەسەنتايەۆانىڭ ادۆوكاتى سوت ۇكىمىنە قاتىستى شاعىم تۇسىرەدى

بۇل تۋرالى Tengrinews.kz تىلشىسىنە بايان ەسەنتايەۆانىڭ ادۆوكاتى مارات اسقاربەكوۆ حابارلادى.

«سوتتىڭ ۇكىمى زاڭسىز. بۇل ءىس القابيلەرىمەن قارالسا دا، زاڭ بۇزۋشىلىق بار. بۇل ءۇشىن سۋديا جاۋاپ بەرەدى. ونىڭ قىلمىسقا وقتالۋىنا قاتىستى دالەلدەردىڭ بولماۋىنا بايلانىستى بۇل شەشىم زاڭسىز، - دەدى اسقاربەكوۆ. - بۇل تۋرالى سوتتالۋشى باقىتبەك ەسەنتايەۆ تا ايتقان بولاتىن. سوندىقتان دا ءبىز سوتتىڭ بۇل ۇكىمى بويىنشا وبلىستىق سوتقا شاعىم تۇسىرەمىز، بىزگە جۇماعا دەيىن ۋاقىت بەرىلدى»، - دەدى ەسەنتايەۆانىڭ ادۆوكاتى.

سونىمەن قاتار، پروديۋسەردىڭ ادۆوكاتى باقىتبەك ەسەنتايەۆتىڭ ادۆوكاتىنىڭ سوتقا شاعىم تۇسىرگەنى جايلى بىلەتىنىن ايتتى. الماتى وبلىستىق سوتتىڭ باسپا ءسوز قىزمەتىندەگىلەر دە ەسەنتايەۆتىڭ ادۆوكاتى بەكبولات جەكسەيىتوۆتەن اپەللياتسيالىق شاعىمنىڭ تۇسكەنىن راستادى.

ايتا كەتەيىك، 3- قاراشادا بەلگىلى پروديۋسەر بايان ەسەنتايەۆانىڭ كۇيەۋى باقىتبەك ەسەنتايەۆ سوتتا سوڭعى ءسوزىن سويلەگەن بولاتىن. وسىدان كەيىن سوت ۇكىمىن شىعاردى. سوتتالۋشى «ادام ولتىرۋگە وقتالۋ» بابى بويىنشا 9 جىلعا باس بوستاندىعىنان ايىرىلدى. ەسەنتايەۆتىڭ ادۆوكاتى ۇكىمگە شاعىم تۇسىرەتىنىن مالىمدەگەن ەدى. «ءبىز اپەللياتسيالىق شاعىم تۇسىرمەكشىمىز، ۇكىم نەگىزسىز دەپ ەسەپتەيمىز (...) ول دەنە جاراقاتىن سالدى، ادام ولتىرۋگە وقتالعان جوق، ءبىز وسىنى دالەلدەيمىز»، - دەگەن ەدى بەكبولات جەكسەيىتوۆ.

ەسكە سالا كەتەيىك، 10- ماۋسىمدا بايان ماقسات قىزى تالعار اۋرۋحاناسىنا باسسۇيەك مي جاراقاتى، پىشاق جاراقاتى جانە مۇرىننىڭ سىنۋى دياگنوزىمەن تۇسكەن بولاتىن. الدىن الا مالىمەت بويىنشا، ونى كۇيەۋى باقىتبەك ەسەنتايەۆ ۇرىپ-سوققان. بۇل وقيعا قۇلجا تاس جولىندا بولعان. تالعار اۋداندىق ءى ءى ب باقىتبەك ەسەنتايەۆ ەكى ايعا قاماۋعا الدى، ال جابىرلەنۋشىگە ءۇش ساعات بويى وتا جاسالدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى